Luk 5

1Diyenn Yiesu bo be Senesarɛt mɔgl kunŋ i, g niib bonciɛnn kaan g lind’o, g nuul g kpaan k ban cenŋ Yendu maam. 2K u la ŋadnd tinle k l sie mɔgl kunŋ, g jansuola nyiɛ l ninŋ g ŋuni b janbaand. 3K u kua ŋadnyeonŋ n ninŋ, k l tie Simɔn yal, g miɛl’o k wan sud waam nyum n ninŋ yen’o. K u ji kal l ninŋ g tund niib Yendu maam. 4Wan yaan tund’b g gbenn, k u maad Simɔn: « Sud g gad nyunnyuaɔnŋ n ninŋ, k yin lu i janbaand, g suol jani. » 5G Simɔn ŋmiɛn g maad: « Canbaa, t won gbaa nyamunŋ kul g g suol baa siɛl. Ama, a yaa maam po, n bu lu. » 6K b lu, g baan jani bonciɛnn, k b janbaand ji cil g pad. 7Lann i k b kanm b lieb nba bo be ŋadnlieog n ninŋ nyan nuu, k ban baal nii g taan’m. K b baal g gbien b ŋadnd tinle kul, k l ji bua n mii mɔno. 8Simɔn Piɛr n yaan la nnyan, k u baa g gbaan Yiesu nunŋ n ninŋ g maad: « Yonmdaan, fagd n buol, k l maa n tie biiddaan i. » 9Jiwaani bo suol wano yen yab nba bo be yen’o, g dugn ban suol jani nba k l yab bonciɛnn nyan po. 10Jiwaani biɛ bo suol Saak yen San mɔ, Sebede bid nba bo tie Simɔn jansolieb nyan. G Yiesu maad Simɔn: « Daa jie kaa. Mɔlane, a ji baa taand niib i, ban gii ŋua’n. » 11L youg, k b don b ŋadnd bɔngbann, g nyɔl l kul g ji ŋua Yiesu. 12Yiesu bo be doyenu nne ninŋ, k l tuu g jua nne be l buol, g tie gbaadpienn. Wan la Yiesu, k u baa g gbaan u nunŋ n ninŋ, g miɛl’o g maad: « Yonmdaan, a gii bua, a bu fid g paag’n. » 13G Yiesu tand nuu g sii’ug g maad: « N, n bua, paag ! » L youg mɔno, k u gbaadm gbenn. 14K u kpaa’ɔg g maad: « Suol a mɔb g daa ŋaa sua ń gbad. Ama, gad g salg-yidkua ń la’a, k a te’og salg nba g Moyis bo maad g gbaadl gii paag wan te nyan, k lan ŋɔn k a paag. » 15Ama k b yad g maad Yiesu po, g niib ji baad cul cul, k ban cenŋ’o, k wan biɛ paag’b. 16Yiesu nuan bo tu piɛd naan nba g sua g be i, g daan jaand. 17Diyenn, Yiesu bo tund niib, g Farisiɛn-nba yen Yendu Kadaaɔg gbanbanda kal u buol. B bo nyiɛ Galile yen Suude doi kul n ninŋ, yen Serusalɛm n ninŋ i. G Yonmdaan paalu be yen Yiesu, g te k u paagd niib. 18G jab nne baal g tug yiɛn k u nui yen u titala kul kpe k u dua liɛnŋ po, g kpaan k ban kuan g duan’o Yiesu nunŋ n ninŋ. 19G niwulug po te k b g la ban bu tɔgn naan g kuan’o. K b duo deliɛkaɔg po, g lond bonn g jiin’o yen liɛnŋ niib siign ninŋ Yiesu buol. 20Yiesu n yaan la ban dug u po nand nyan, k u maad: « N ninja, a biid piin o. » 21G Yendu Kadaaɔg gbanbanda yen Farisiɛn-nba mali b pala n ninŋ g sɔbn: « U ne tie ŋmaa i, g sugd Yendu i ? Yendu kua i kaa ŋmaa n bu fid g piin nil biid i ? » 22Yiesu n yaan bann b maalm, k u bual’b: « Bɛ po n te k i mɔg l maalm i ? 23Lanbona nle ne ninŋ, n liɛ yal maadu paa i ? G maad: A biid piin, bii fiil g sonm i ? 24To ! Bann man g Nifosaal Bija mɔg paalu tinŋ ne po g bu fid g piin niib biid. » Lann i k u maad jua nba k u nui yen u titala bo kpe nyan: « Min n cab’a, fiil, tug a liɛnŋ gii kun. » 25L youg mɔno, k u fiil niib kul nunŋ n ninŋ, g tug u liɛnŋ g kun g dond Yendu. 26K l cɔg’b. G jiwaani suol’b k b ji dond Yendu g maad: « Dinne, t la tin g ban g la yal. » 27L puol po, g Yiesu nyiɛ g la lonpogaal nne k b yi’ug Lefi, k u kal ban pa lonpo naan nba, g Yiesu maad’o: « I ŋua’n. » 28K u ŋaa l kul, g fiil g ŋua’ɔg. 29G Lefi tien jaanciɛnm Yiesu po u ŋaag n ninŋ, g lonpogaala yen nilieb bonciɛnn taan g kal g di yen’m. 30G Farisiɛn-nba yen b Yendu Kadaaɔg gbanbanda buln buln g maad Yiesu ŋuantieb: « Bɛ n te k i taan g di g nyu yen lonpogaala yen biiddanm i ? » 31G Yiesu ŋmiɛn g maad’b: « Yab nba mɔg laafiɛ kaa kpaan dogda, yiɛnm n kpaan’o. 32N g baal k n yiin nimɔnm kaa, n baal k n yiin biiddanm i, k ban lebd b binbem. » 33Farisiɛn-nba yen b Yendu Kadaaɔg gbanbanda bo maad Yiesu: « San ŋuantieb paa g lolg mɔb, g tie jaandi, g Farisiɛn-nba ŋuantieb mɔ tie nnyan. Ama k a yab di g biɛ nyu. » 34G Yiesu maad’b: « I ban k b kan fid g te k ban yiin yab puokuanu jaanm ń lol mɔb, youg nba g puodaan daa be yen’m a, bii ? 35Ama youg baad g puodaan tan kan gii be b siign. L youg u k b ji baa lolg mɔb. » 36K u biɛ pua’b makpanjam ne: « Sua g pad tiɛpaaɔnŋ cabl g libn tiɛdudunŋ. U gii tien nnyan, u biil tiɛpaaɔnŋ n nyan, cabpaann ŋann mɔ kan nand yen tiɛkpel. 37Sua biɛ g piɛgd dikaam gband-lenkpela n ninŋ mɔ. Lann i kaa l daam tan gii bie, l gband-lenkpela bu pud i, daam ń yad, l lena mɔ ń biɛl. 38Ama l tie k ban tu piɛg dikaam gband-lenpaana n ninŋ i. 39Yua nba gii nyuu dikpel, u ji g bua dipaanm. Yen mɔni, u bu maad g dikpel n man. »

will be added

X\