Luk 3

1Rom badciɛn Tibɛr n yaan dii bal, l piig yen bina ŋanmu ninŋ, l sua g Pɔns Pilat kal Suude doug n Rom badciɛn sann po, g tie l doug n gobna. K Erod mɔ tie Galile bad, k u ninja Filiip tie Iture yen Trakonit bad, g Lisaniyas tie Abilɛnn bad. 2Ann yen Kaayif mɔ n bo tie Suif‑nba salg-yidkab kul ciɛnm. L youg, l sua g Sakari bija San be tinkuonŋ n ninŋ. L buol i k u gbad Yendu maam 3g gad Suurdɛn fuann n ninŋ kul, g muand niib k ban wul nyum, g ŋaa b tuonbiid g lebd binbem, g Yendu ń piin b biid 4nyan lan bo diɛn Yendu sogni Esaayi kadaaɔg n ninŋ nand nyan. L bo diɛn g maad: « Nil kpaand tinkuonŋ n ninŋ g maad: “ Ŋanm man Yonmdaan sɔnu, sond man u sɔni. 5G baalɔdi kul ń piin, g jɔa yen gbingbana kul ń sal, g sɔngɔga kul ń sond g sɔnbuod kul ń biɛ sal. 6G niib kul ń la yen b ninbina Yendu fielu ”. » 7San bo maad danm nba baad k wan wul’b nyum nyan: « Yinm waalaba ne, ŋmaa n maad’i k yin nya Yendu mutuol nba baad ne ninŋ i ? 8I yie g tien yal ŋɔn k i lebd binbem o, gii kal g tua k Abraham tie i yaaja. N maad’i faa, Yendu nuan bu fid g te g tana ne ń kpand Abraham yaabuona. 9Piɛg ji dua tiidi nyaga n i. Tiig nba g luon luanŋana kul, b bu cua’ɔg u g lu muu n ninŋ. » 10Lann i g niib bual San: « T yen ji bu tien nle i ? » 11K u ŋmiɛn’m: « Yua n mɔg liɛda ŋanle, wan bɔgd g te yua nba g mɔg. Yua n mɔg jied mɔ ń tien nnyan. » 12G lonpogaala mɔ baal k wan wul’b nyum, g bual’o: « Canbaa, t bu tien nle ? » 13K u maad’b: « Daa gaan man lonpo k lan gii cie ban ŋɔn’i yal nyan. » 14G sijenm mɔ bual’o: « K tinm i, t mɔ bu tien nle ? » K u maad’b: « Daa tug man jad yen faaɔg gii ŋua niib g fe b ligli. Yin gaan ligli nba, i pala ń gii man l po. » 15Niib bo guu Kristo, g ji bual b kua n ninŋ g San kan gii tie wano kaa aa ? 16G San ŋmiɛn g maad b kul: « Min nuan wuul’i nyum n i. Ama sua baad, g mɔg paalu g cie’n. K n g dagd yen k n lod u taacagbani. Wano tan bu tug Foŋanm yen muu i g wul’i. 17U diɛ u dilennŋmantonn g saa jalg n, g bu lenn u dii. U bu wod diŋani g ŋuun u bunbual n. G nyaan tug feonŋ g lu muu nba kan ban g junn n ninŋ. » 18San biɛ bo tien niib cegllei bonciɛnn, g muand’b Laabamann. 19Ama u bo jalg bad Erod, k l maa u bo fiel u ninja ŋaapuo Erodiad g kuan, g biɛ tien bontitebiid nba yab. 20Erod biɛ bo tien biid g pugn, k l maa u bo suol San g luon’o dansalg. 21San n yaan wul niib g gbenn, g wul Yiesu mɔ, g Yiesu sie g jaand, b tan sua g polu po luod, 22g Foŋanm jiid u po g naan lanjelg. G niɛlu nne nyiɛ polu po g maad: « A tie n bija i, n pal kɔn a po bonciɛnn. N tug n buam kul g tien a ninŋ. » 23Yiesu n yaan cil u tuonn, l sua k u mɔg nyan bina piintaa nyan i. Niib bo mali k u tie Sosɛf bija i. K u yaaja tie Eli, 24k Eli baa tie Matat, g Matat baa tie Lefi, g Lefi baa tie Mɛlki, g Mɛlki baa tie Yanaayi, g Yanaayi baa tie Sosɛf, 25g Sosɛf baa tie Matatiyas, g Matatiyas baa tie Amɔs, k Amɔs baa tie Nahum, g Nahum baa tie Ɛsli, k Ɛsli baa tie Nagaayi, 26g Nagaayi baa tie Maat, g Maat baa tie Matatiyas, g Matatiyas baa tie Semeyinn, g Semeyinn baa tie Sosek, g Sosek baa tie Soda, 27g Soda baa tie Suanan, g Suanan baa tie Resa, g Resa baa tie Sorobabɛl, g Sorobabɛl baa tie Salatiɛl, g Salatiɛl baa tie Neri, 28g Neri baa tie Mɛlki, g Mɛlki baa tie Adi, k Adi baa tie Kosam, g Kosam baa tie Ɛlmadam, k Ɛlmadam baa tie Ɛr, 29k Ɛr baa tie Yiesu, g Yiesu baa tie Eliesɛr, k Eliesɛr baa tie Sorim, g Sorim baa tie Matat, g Matat baa tie Lefi, 30g Lefi baa tie Simeyɔn, g Simeyɔn baa tie Suuda, g Suuda baa tie Sosɛf, g Sosɛf baa tie Sonam, g Sonam baa tie Eliakim, 31k Eliakim baa tie Meleya, g Meleya baa tie Mena, g Mena baa tie Matata, g Matata baa tie Natan, 32g Natan baa tie Dafiid, g Dafiid baa tie Sese, g Sese baa tie Obɛd, k Obɛd baa tie Bos, g Bos baa tie Sala, g Sala baa tie Naasɔnn, 33g Naasɔnn baa tie Aminadab, k Aminadab baa tie Adminn, k Adminn baa tie Arni, k Arni baa tie Ɛsrɔm, k Ɛsrɔm baa tie Faarɛs, g Faarɛs baa tie Suuda, 34g Suuda baa tie Sakɔb, g Sakɔb baa tie Isaak, k Isaak baa tie Abraham, k Abraham baa tie Tara, g Tara baa tie Nahɔr, 35g Nahɔr baa tie Seruk, g Seruk baa tie Rago, g Rago baa tie Falɛk, g Falɛk baa tie Ebɛr, k Ebɛr baa tie Sala, 36g Sala baa tie Kaayinam, g Kaayinam baa tie Arfasad, k Arfasad baa tie Sem, g Sem baa tie Nowe, g Nowe baa tie Lamɛk, 37g Lamɛk baa tie Matusala, g Matusala baa tie Enɔk, k Enɔk baa tie Sarɛd, g Sarɛd baa tie Malaliɛl, g Malaliɛl baa tie Kaayinam, 38g Kaayinam baa tie Enɔs, k Enɔs baa tie Set, g Set baa tie Adam, k Adam baa tie Yendu.

will be added

X\