1 K b kul fiil g gad yen’o Pilat buol. 2 K b cil g jalg’o, g maad: « T la nil ne k u baal yen ŋmadl t buolu n ninŋ. U yie k ban daa pa Rom badciɛn Sesaar lonpo, g biɛ maad k u tie Kristo, lan tie bad. » 3 G Pilat bual’o: « A tie Suif‑nba bad yaa aa ? » K u ŋmiɛn’o: « Fin n maad. » 4 G Pilat maad salg-yidkab ciɛnm yen niib kul: « N g la jua ne n biil yal, k l dagd yen suod. » 5 Ama k b yie g maad: « U tund niib Suude munn kul ninŋ, k u tundl sagnd niib yen dougdanm. U bo cil hal Galile n ninŋ i, g tan pund ne buol ne. » 6 Pilat n yaan gbad Galile sann nyan, k u bual: « Jua ne tie Galile yua yaa aa ? » 7 Wan yaan bann k u tie Erod diem n yua, k u te k b gad yen’o u buol, k l maa u mɔ bo be Serusalɛm l dana n ninŋ. 8 Erod n yaan la Yiesu k u pal manŋ bonciɛnn. L bo wai k u kpaan k wan la’ɔg, g dugn u bo gbiɛ ban yaan maad u po nand, g daan k u bu tien palug u nunŋ n ninŋ. 9 K u bual’o buali bonciɛnn, ama Yiesu g ŋmiɛn’o siɛl. 10 Salg-yidkab ciɛnm yen Yendu Kadaaɔg gbanbanda bo be l buol, g maad yen jad k u l biil i. 11 K Erod yen u sijenm sɔnd’o g laa laa’ɔg, g tug liɛdl nba nyili g lan’o, g te k b guan yen’o Pilat buol. 12 L daal i k Erod yen Pilat ji suol lieb dɔnnu, banm nba bo tu g man yen lieb. 13 G Pilat yiin salg-yidkab ciɛnm yen Suif‑nba yudanm yen niib kul, g maad’b: 14 « I baal yen jua ne n buol, g maad k u ŋmad doug. I kul yen la k n kpaan k n bann yin maad k u biil yal nba, g g la siɛl. 15 Erod mɔ biɛ g la siɛl. Lann n te k u te k b guan yen’o t buol. I la i, u g biil baa siɛl k l dagd yen kuum. 16 L yaa po, n bu te k ban pua’ɔg gbana, g fid g ŋaa’ɔg. » [ 17 Suif‑nba fielu jaanm kul, l bo tie g Pilat ń luod b po dansalyenŋ i, g ŋaa’ɔg.] 18 K b kul taan g tand g maad: « Te k ban kpi’ug, g ŋaa Barabas. » 19 B bo luon Barabas dansalg, k l maa u bo kpid wounŋ doug n ninŋ, g biɛ kpii kuum. 20 Pilat n bo bua wan ŋaa Yiesu nyan k u guan g maad yen niib, 21 ama k banm tand g maad: « Kpaa’ɔg dapunpɔnn po, kpaa’ɔg dapunpɔnn po. » 22 G Pilat guan g bual’b taal muntaa po: « U biil bɛ i ? N g la wan biil yal k l dagd yen kuum. Lann, n bu te k ban pua’ɔg gbana, g fid g ŋaa’ɔg. » 23 Ama k b ŋanm g tand g maad k ban kpaa’ɔg dapunpɔnn po, k b tintandi tan nyan Pilat yam. 24 K u tan cab k ban tien ban bua yal, 25 g luod ban bua daan nba, lann n tie yua nba bo kpid wounŋ doug n ninŋ, g biɛ kpii kuum, k b luon’o dansaldieog n ninŋ nyan. G nyaan cab Yiesu nuan, k ban tien’o nyan ban bua nand nyan. 26 Ban yaan saa yen’o, k b tuog Siirɛnn jua nne k b yi’ug Simɔn, k u nyiɛ kpaab n g kun, k b niin g bugn’o dapunpɔnn, k u ŋua Yiesu puol po. 27 Niib bonciɛnn bo ŋua’ɔg, b ninŋ puob nne bo buud g fabn u po. 28 G Yiesu gbeg b po g maad’b: « Serusalɛm puob, daa buud man n po. I buud man i kua po, yen i bid po. 29 K l maa dana baad k b tan bu maad: “ Puob nba tie ŋɔli, yen puob nba g ban g mal, g biɛ g ban g ŋaan big, pamann tie b yal i. ” 30 L youg, b bu cil g maad jɔa: “ Baa man t po. ” G maad gbingbana: “ Piin man’ti. ” 31 G dugn, b gii tie dasɔnŋl nne, b tan bu tien dakuounŋ nle ? » 32 B bo saa yen nibiid banle nne mɔ g daan bu taan g kpi’b yen Yiesu. 33 Ban tan pund naan buol nba k b yi Yukpabug nyan, k b kpaa Yiesu yen l nibiid mɔ, yend u nuujendu po, lua u nuuganŋ po. 34 G Yiesu maad: « N Baa, di sugl b po, k l maa b g ban ban tiend yal. » G sijenm tɔ tiɛ tiɛ g biid u tiɛd. 35 Niib bo sie l buol g nyuan. G Suif‑nba yudanm laa’ɔg g maad: « U daan fiel nilieb. L gii tie k u tie Kristo, Yendu n lugd yua nba, wan ji fiel u kua mɔ. » 36 G sijenm mɔ laa’ɔg, g nagn u buol, g tie’og dimiigl, g maad: 37 « A gii tie Suif‑nba bad, ŋan fiel a kua. » 38 B bo diɛn diɛni nba ne g tabn dapunpɔnn po, Yiesu yul po: « U ne tie Suif‑nba bad i. » 39 G nibiid banle nba k b bo kpaa’b dapunpɔnn po nyan, b ninŋ yend sugd Yiesu g maad: « A g tie Kristo kaa aa ? Fiel a kua, g fiel’ti mɔ. » 40 Ama g lua gaal jad u po, g maad: « A mɔ bu kpe nyan wano nyan i, a g jie Yendu uu ? 41 Tinm nuan kan fid g nai, t be fala n ninŋ g dugn t bontitied po i. Wano nuan g biil siɛl. » 42 K u biɛ maad: « Yiesu, a gii dii bal g guan ŋan gii tiɛn n po. » 43 G Yiesu maad’o: « Yen mɔni, n maad’a, dinne mɔno, a baa be yen’n Yendu nimɔnm binbebuol. » 44 L bo tie yensikpikpalg po i g yendu libn, g doug kul bɔnn cinmm, saa yen daajuoug kud muntaa. G cincenciɛɔnŋ nba tu juan jaanddeciɛɔnŋ n ninŋ nyan, pad ŋanle. 46 G Yiesu tand g maad: « N Baa, n kubnd n miɛl a nui n ninŋ. » Wan maad nnyan, k u fuod g jiin. 47 Rom sijenm ciɛn n yaan la nnyan, k u dond Yendu g maad: « Yen mɔni, nil ne kon tie Yendu nimɔn i. » 48 G niib nba kul bo tigl l buol g diid nyan, n yaan la yal nba kul bo tien, k b ji leb g kun g fabn. 49 Yiesu dɔnn‑nba kul yen puob nba bo nyiɛ hal Galile g ciɛn’o bo be l buol, g sie fagm g nyuan yal nba tie kul. 50 L sua g jua nne be k b yi’ug Sosɛf k u nyiɛ Suif‑nba doug nba k b yi Arimati nyan. U bo tie nimɔn i, g cɔln Yendu g biɛ guu Yendu bal baalu. U bo tie Suif‑nba buuddanm n ninŋ yend i, g yen bo g tuo u lieb n jag g suol yal nba Yiesu po yen ban bo tien’o yal nba kul. 52 K u gad g la Pilat g miɛl’o k wan cab’o Yiesu gbannand, k u cab’o. 53 Lann i k u kpaad’o dapunpɔnn po, g kadm’o g gad g daan duan’o kakul nne ninŋ, k b bo lugl tangbaɔnŋ n, k b daa g ban g pii sua l n ninŋ. 54 L bo tie Saaba bobnu daal daajuoug u, g Saaba ji bua n cil. 55 Puob nba bo ŋua Yiesu hal Galile bo ciɛn Sosɛf g daan diid kakul, yen ban pii Yiesu nand. 56 L puol po, k b kun b ŋai n ninŋ, g bobn tilaali yen kpam g bu tien Yiesu gbannand po. G Saaba daal, k b kal g fei, nyan Mɔmaam n bual nand nyan.
