Luk 22

1Jaanm nba k b tu ŋman kpanu nba k b g tien yen dibina nyan bo nag, l jaanm i k b yi Suif‑nba fielu jaanm. 2Yendu salg-yidkab ciɛnm yen Yendu Kadaaɔg gbanbanda bo kpaan ban bu tien nand g biɛn Yiesu g yen jie niib. 3G Sitaan kuan maalm Suuda nba k b yi’ug Iskariyɔt nyan pal n ninŋ. U bo tie Yiesu ŋuantieb piig yen banle ŋann ninŋ yend i. 4K u gad g daan la Yendu salg-yidkab ciɛnm yen jaanddeciɛɔnŋ sijeciɛnm, k b joi wan bu tien nand g suol Yiesu g te’b. 5K b pala manŋ, k b maad’o k b bu te’og ligli. 6K u tuo, g ji kpaan youg nba k u bu suol Yiesu g te’b g niib g be l buol. 7Daal nba k b bo tu cil g ŋman kpanu nba k b g tien yen dibina nyan bo pund. L daal i k b tu kpi pebid g di Fielu jaanm. 8G Yiesu sun Piɛr yen San g maad’b: « Gad man g bobn man Suif‑nba fielu jaanm jied k tin di. » 9K b maad’o: « A bua k tin gad lɛ i g bobn l jaanm jied i ? » 10K u maad’b: « I ban ii ? I daan gii kua doug n ninŋ, i bu tuog jua nne k u tug sual yen nyum. Yin gii ŋua’ɔg. U daan gii kua ŋaag nba ninŋ, 11yin maad ŋaagdaan: “ Canbaa n sun’ti k t bual’a k a ŋɔn’ti dieog nba ninŋ k u bu di Fielu jaanm yen u ŋuantieb. ” 12U bu ŋɔn’i deciɛɔnŋ nne k l be detuadug po, g bona kul be l n ninŋ. L deciɛɔnŋ n ninŋ i, k i bu bobn Fielu jaanm. » 13K b gad g la nyan wan bo maad nand nyan, g bobn Fielu jaanm. 14L youg n yaan pund, k u kal yen u sundi g bu di 15g maad’b: « N bo mand g niɛn k n taan g di yen’i Fielu jaanm ne yo, g fid g la fala. 16K l maa, n maad’i: N ji kan ban g di l jaanm saa yen youg nba k l jaanm tan bu guan g tien Yendu ŋaag n ninŋ. » 17Lann i k u juab dimɔunŋ, g tien Yendu balg, g maad: « Gaal man ne g bɔgd i lieb g nyu. 18K l maa n maad’i, n ji kan ban g nyu dimɔunŋ ne, saa yen youg nba g Yendu tan bu kaan u bal g gbenn. » 19K u biɛ juab kpanu, g tien Yendu balg, g jend jend g tie’b g maad: « Ne tie n gbannand i k n tug g yid salg i po. I tie man nnyan, gii tiɛd n po. » 20Ban yaan dii g gbenn youg nba, k u tug dimɔunŋ yen ŋmanŋ g biɛ tien nnyan g maad: « Dimɔunŋ ne tie Yendu yen u niib dɔnnpaanu sɔm i, sɔm nba k n wul i po. 21Ama i ban man, g yua nba kuad’n taan g kal g di yen’n. 22Mɔni, Nifosaal Bija ji tɔgn sɔnu nyan Yendu n bo cab nand nyan i. Ama fala bu gbad yua nba kuad’o. » 23K b ji cil g bual b ŋmiɛl n ninŋ k b siign ninŋ ne, ŋmaa n bu fid g tien nnyan i ? 24Mɔniɛɔg bo tien Yiesu ŋuantieb siign ninŋ, k ban liɛ ŋmaa n tie ciɛn i ? 25G Yiesu maad’b: « Dougdanm kub b niib yen paalu. G yab nba mɔg yikod bua k ban gii yi’b bulcindanm. 26I yaa po, l kan gii tie nnyan kaa. Ama yua nba tie ciɛn i siign ninŋ, wan tien u kua nyan big nyan, g yua nba yen yul ń gii tie yua nba suun lieb po. 27I ban g ŋmaa n tie ciɛn i ? Yua nba kal g di bii, yua nba nyanŋ jied i ? L g tie yua nba kal g di kaa aa ? Ama min tie nyan yua nba nyanŋ jied nyan i, i siign ninŋ ne. 28Yinm n tie danm nba bo juun g be yen’n youg nba kul k b bo ŋɔnŋ’n fala. 29L po n te k n din’i bal, nyan n Baa n din’n bal nand nyan, 30k yin tan gii di g biɛ nyu yen’n n diem n ninŋ, g biɛ gii kal badkogi po g bu Israyɛl cuga piig yen ŋanle. » 31G Yiesu maad Piɛr: « Simɔn Simɔn, a gii ban g Sitaan bual Yendu g bu lenn’i nyan ban tu lenn dii nand nyan. 32Ama n miɛl Yendu a po, k a daa buon a dindann, k a tan gii guan g ŋuan’n yaa youg nba, ŋan paan a ninjanm pala. » 33G Piɛr maad’o: « Yonmdaan, n tuo k l gii tie baa dansalg min yen fin n bu taan g kua, lann i kaa l gii tie kuum tin taan g kpe. » 34Ama g Yiesu maad: « Piɛr, n maad’a, dinne mɔno, a bu nai taal muntaa k a g ban’n g sua g kolg daa g mɔ. » 35K u biɛ maad’b: « Min daan sun’i youg nba, k i g diɛ ligli, g g kub kɔl, g g diɛ taacaad, siɛl daan pɔd’i nii ? » K b ŋmiɛn: « Baa siɛl daan g pɔd’ti. » 36K u maad’b: « Mɔlane nuan, yua nba ji mɔg ligli, wan juab. Yua nba mɔg kɔl, u mɔ ń juab. G yua nba g mɔg jug, wan tug u liɛdl g kuad g daa. 37K l maa n maad’i, yal nba bo diɛn Yendu Kadaaɔg n ninŋ n po, l tie k lan tien i. L bo diɛn k nne: “ B taan’o yen nibiid. ” Mɔni, ban bo diɛn yal n po, ji bu tien i. » 38K b maad’o: « Diid a, Yonmdaan, jugi nle n nyan. » K u maad’b: « Ŋaa man. » 39Lann i g Yiesu nyiɛ l buol g gad Oliif tiidi jual po, nyan wan bo tu tie nand nyan, k u ŋuantieb mɔ ciɛn’o. 40Wan pund l buol, k u maad’b: « I jaand man, g daa baa bignn n ninŋ. » 41G piɛd nyan taabana ŋanŋaa nne, g gbaan g jaand g maad: 42« N Baa, l gii tie k a bua, ŋan fagn n buol fala nba baad ne. Ama, lan daa tie n buam kaa, lan tien nyan ŋan bua nand nyan. » [ 43L youg g malɛg nyiɛ polu po, g jiid g paan u pal. 44Wan be l cicagciɛnm n ninŋ nyan, k u ŋanm g jaand bonŋann. K u tuntonjena ji tan tie nyan sɔm nyan, g cien g baal tinŋ n ninŋ.] 45U jaandi puol po, k u fiil g guan u ŋuantieb buol, g sua k b guand, k l maa b bo be pabɔnn n ninŋ. 46K u maad’b: « Laabaal k i guand i ? Fiil man gii jaand, g daa baa bignn n ninŋ. » 47U daa bo g maad g gbenn mɔno, g niib bonciɛnn pund. K u ŋuantieb piig yen banle ŋann n ninŋ yend, yua k b yi’ug Suuda nyan be b liig, g nagn Yiesu buol, g bu muad u tankpinn. 48G Yiesu maad’o: « Suuda, a bu muad Nifosaal Bija tankpinn i g kuad’o oo ? » 49Yab nba bo be yen Yiesu n yaan la yal nba bu tien nyan, k b bual’o: « Yonmdaan, t nɔd jugi g cua’b ii ? » 50L youg mɔno k b ninŋ yend cua g jiɛl salg-yidkab kul ciɛn tuonsunn nuujendu tubl. 51G Yiesu maad: « Ŋaa’b man. » G sii l daan tubl g paag’o. 52G Yiesu maad salg-yidkab ciɛnm yen jaanddeciɛɔnŋ sijenm yen Suif‑nba nikpela nba bo baal g bu suol’o: « N tie bibiɛdg yaa aa, k i baal g diɛ jugi yen lanbana aa ? 53Daal kul n daan tu be yen’i jaanddeciɛɔnŋ n ninŋ, k i daan g suol’n. Ama mɔlane, i youg n pund ; g bunbɔnn n paaludaan suun u tuonn. » 54Ban yaan suol Yiesu nyan, k b gad yen’o salg-yidkab kul ciɛn ŋaag. G Piɛr be hal puol g ŋua’b. 55K b son muu lijɔug n, g niib taan g kal, g Piɛr mɔ kal b siign ninŋ. 56G tuonsunsipaan nne tan la’ɔg k u kal muu yinyiem n ninŋ, k u ŋanm g diid’o g maad: « U ne mɔ daan tu be yen’o. » 57G Piɛr nai g maad l puo: « Kai, min g ban’o. » 58Lan yann waam, g jua nne mɔ la’ɔg g maad: « A mɔ tu be yen’m. » G Piɛr maad l jua: « Min g be b ninŋ. » 59Lan tien nyan kudyeonŋ nyan, g lua nne biɛ ŋanm g maad: « L g tie tama tama kaa, u ne mɔ daan tu l be yen’o. K l maa u tie Galile yua i. » 60G Piɛr maad: « N g ban ŋan maad yal. » U daa bo g maad g gbenn, g kuutounŋ buud l youg mɔno. 61G Yonmdaan gbeg g nyuand Piɛr, g Piɛr tiɛd maam nba g Yonmdaan bo maad’o: « Dinne, a bu nai taal muntaa k a g ban’n g sua g kolg daa g buud. » 62K u ji nyiɛ cincann g buud nyan u bu kpe nyan. 63Niib nba bo guu Yiesu bo laa’ɔg g puag’o. 64G tu tug cabl g pibn u nunŋ po g maad’o: « Bund g bann yua nba pua’a. » 65K b sugd’o sugdbuoli kul. 66L fann siŋapanpan g Suif‑nba nikpela yen salg-yidkab ciɛnm yen Yendu Kadaaɔg gbanbanda tigl g te k b baal yen Yiesu b buud buol. 67K b maad’o: « A gii tie Kristo, ŋan maad’ti. » K u ŋmiɛn’m: « N gii maad’i, i kan gaal. 68N biɛ gii bual’i buali, i kan ŋmiɛn’n. 69Lan nya mɔlane g ji gii saa, Nifosaal Bija baa kal Yendu paaludaan jendu. » 70K b kul maad: « Lann, a tie Yendu Bija yaa aa ? » K u maad’b: « Yinm n yed k n tie. » 71K b maad: « L ji g tie k tin kpaan sieda‑nba kaa. Tinm mɔno gbad wan maad yal. »

will be added

X\