Luk 21

1Yiesu bo yaad g diid yab nba kpiend ligli jaanddeciɛɔnŋ n ninŋ. B bo tie ŋalmandanm i. 2K u tan la g pekɔtalg nne mɔ baal g kpien dibala ŋanle nba g mɔg fuom. 3K u maad: « Yen mɔni n maad’i, pekɔtalg ne n kpien ligli nba yab g cie nil kul n kpien yal. 4G dugn b kul ne kpien ligli nba kan wad b mɔgm i. Ama pekual ne nuan tond wan mɔg yal g baa di kul n nyan g baal g kpien. » 5L puol po g siɛb maad jaanddeciɛɔnŋ n ŋan nand. K b maa’ɔg yen tanŋana, g tug paab nba k b tie Yendu nyan g tien’o naasend k l kul ŋan paaa. G Yiesu maad’b: 6« Yal nba k i nyuan ne kul, dana baad k l kul tan bu bed g duan tinŋ n sa‑la‑la-la, g baa tanyenn kan tenn gii tua liel po. » 7K b bual’o: « Canbaa, bɛ youg u, k l bona kul tan bu tien i ? Bɛ n tan bu ŋɔn, k l youg pund i ? » 8K u maad: « Suol man i kua g daa ŋaa baa sua ń bɔnd’i. Niib bonciɛnn tan bu baal gii kub n sann g tua k banm n tie Kristo, g youg biɛ ji g fag. Daa ŋua’b man. 9I tan gii gbiɛ k b maad tɔb yen ŋmadl maam, yin daa jie. L bual k l kul ne ń tien yo, ama l youg mɔno daa kaa baa tie ŋanduna juodu. » 10K u biɛ maad’b: « Buolu tu tan bu fiil g kɔn yen buollua, doug ń fiil g kɔn yen dolieog. 11Tinŋ tu tan bu jeg bonciɛnn. Yiɛli yen kom ń baa buol buol. Bona nba mɔg jijei yen yaalidug bonciɛnn bu tien polu po. 12Ama l kul ne n tan fid g tien, b bu suol’i, g ŋɔn’i fala, g gad yen’i g te’i Suif‑nba tintaann died n nikpela, k ban bu’i. B bu luon’i dansaldied n ninŋ, g gad yen’i batieb buol, yen dougdanm buol, g dugn n po. 13Nnyan i, k i bu kun mɔni n po. 14I ban man k yinm kaa daan bu mali yin bu ŋmiɛn’m yal nba g kɔn i kua po. 15K l maa min mɔno n bu te’i lanbona nba k i bu maad yen yanfuom, k i ninnanda n ninŋ sua kan fid g jiin siɛl l po, lann i kaa g nai yin maad yal nba. 16Baa i danm, yen i ninjanm, yen i naataani, yen i dɔnn‑nba mɔno bu te ban suol’i, g kpi yenm i siign ninŋ. 17Baa sua tan kan gii bua i nublu g dugn n po. 18Ama baa i yuyeonŋ kan biɛl. 19I bu la miɛl g dugn i mindl po. » 20« I tan gii la g yab nba pua tɔb yen’i kaan g lind Serusalɛm, yin gii ban k u mudyoug nag n nyan. 21L youg, yab nba be Suude n ninŋ, ń gii siɛn g kua jɔa n ninŋ. Yab nba be Serusalɛm doug n ninŋ ń nya g fagd. Yab nba be kpaand n ninŋ ń daa kpend doug n ninŋ. 22K l maa l dana n ninŋ, Yendu bu dad u buolu tubl. Nnyan i g Yendu sogni‑nba n bo diɛn yal nba ji bu tien g gbenn. 23L dani n ninŋ, fala bu gbad puotinpunma yen sanpandi naa‑nba. Fala bonciɛnn bu baa l doug n ninŋ, g Yendu mutuol ń lag b po. 24B bu kpi yenm yen jugi, g suol lieb g gad yen’m dofani kul n ninŋ. Buolfanu yab bu sɔnd Serusalɛm yab, saa yen b youg n yaan tan bu gbenn. 25I bu la bona k l mɔg yaalidug yendu n ninŋ, yen ŋmaalg n ninŋ, yen ŋmaabid n ninŋ. Tinŋ ne po buoli kul niib yam bu ŋmad, g dugn b bu gbad g mɔgl begl. 26Jiwaani bu kpi niib gbanu, b gii mali yubɔnn nba bu baal ŋanduna po. K l maa yal nba be polu po kul g mɔg paalu bu jeg. 27L youg u, k b bu la Nifosaal Bija, k u be tawalgband n ninŋ g baad yen u paaciɛnu yen yudand nba yab. 28I tan gii la k l bona cil g tie, yin fiil g sed, i yula ń yaad, k l maa i fielu nag. » 29G Yiesu tug maninnaɔnŋ nba ne g maad’b: « Diid man kinkanŋ yen tiidi kul. 30B gii bund youg nba, k i nyuan, i tu bann g kpanyil nag o. 31Nnyan, i mɔ tan gii la k l kul ne tie, yin bann g Yendu bal nag o. 32Yen mɔni, n maad’i, l kul ne bu tien g sua g mɔlane niib nba be ne, g siɛb daa g kpe. 33Polu yen tinŋ bu pend, ama n maam nuan kan ban g pend. 34I ceg man i kua po. I daa tug i yula g lol yen jied yen daam. G biɛ daa cagn i kua ŋanduna ne ninŋ binbenu po. Lann i kaa l daal bu baal g cib’i nii, 35nyan janbaaɔnŋ nyan, g baan ŋanduna niib kul. 36Daa guand man, gii jaand youg kul, g Yendu ń te’i paalu k i fid g nya bonbiil nba baad ne ninŋ kul, g sed Nifosaal Bija nunŋ n ninŋ. » 37Yentunn n ninŋ, Yiesu bo tu be jaanddeciɛɔnŋ n i, g tund niib Yendu maam. Nyiɛɔg, wan gad Oliif tiidi jual po. 38G siŋapanpan kul, niib ń tigl u buol jaanddeciɛɔnŋ n ninŋ, gii cenŋ’o.

will be added

X\