Luk 20

1Diyenn daal, g Yiesu tund niib Yendu maam jaanddeciɛɔnŋ n ninŋ, g muand’b Laabamann. G salg-yidkab ciɛnm yen Yendu Kadaaɔg gbanbanda yen doug n nikpela baal, g bual’o: 2« Maad’ti, a diɛ yikolann i g suun tuona nba ne i ? Lann i kaa, ŋmaa n cab’a l yikod i ? » 3K u ŋmiɛn’m: « N mɔ mɔg bonyenn g bu bual’i. Maad’n man, 4ŋmaa n bo cab San Nyunwultua k u wuul niib nyum i ? Yendu bii niib i ? » 5K b maad maad b ŋmiɛl n k nne: « T gii yed g Yendu u, u bu bual’ti, g laabaal k t bo g tuo g gaal San maam i ? 6T gii yed g niib mɔ i yaa, niib kul bu jaa’ti tana i g kpi’ti, k l maa b bo ban g San tie Yendu sogni i. » 7Lann i k b ŋmiɛn, k b g ban yua cab. 8G Yiesu maad’b: « N mɔ kan maad’i yua nba cab’n l yikod, k n suun l tuona. » 9L puol po g Yiesu pua niib makpanjam nba ne g maad: « Jua nne n bo ŋuun dimɔunŋ tiidi, g tug l kpaab g guun tuonsunna, g fiil g gad sɔnu g daan wai. 10Dimɔunŋ tiidi luana n yaan tan bie yaa youg, k u sun u naasenyend tuonsunna ŋann buol, k wan gad g gaal u tiidi luana biinu nii. Ama g tuonsunna ŋann pua’ɔg bonŋann, g bel’o g g tie’og siɛl. 11K u guan g sun naasenlua, k b pua u mɔ, g sugl sugl’o, g bel’o g g tie’og siɛl. 12K u biɛ guan g sun muntaa po yua, k b janm u mɔ, g bel’o. 13G kpaabdaan ji maad: “ N bu tien nle ? N bu sun n bija nba k n mand g bua’ɔg u. L g kand b bu cɔlm’o. ” 14Tuonsunna n yaan la’ɔg youg nba, k b joi yen lieb, g maad: “ Yua n tan bu di faal n nyan. T kpi’ug man, g yend l faal. ” 15K b suol’o g fil g nyan’o kpaab n ninŋ, g kpii’ug. Kpaabdaan ji bu tien u tuonsunna ŋann nle i ? 16U bu gad g biɛn tuonsunna ŋann i, g tug kpaab g guun nifanm. » L maam po, k b maad: « Yendu ń wuon lann. » 17G Yiesu nyuand’b suoo g maad: « I gbiɛ Yendu lanbona nba diɛn kadaaɔg n ninŋ ne nle i ? “ Tann nba g tanmaala bo yie g lu nyan, l tann n tan guan g te dieog fiɛgl tanjal. ” 18Yua nba kul baa l tann po, u bu kɔnn kɔnn i. L tann gii baa yua nba po mɔ, l bu nann’o i yom yom. » 19G Yendu Kadaaɔg gbanbanda yen salg-yidkab ciɛnm bann k l makpanjam nyuan banm i, k b ji kpaan k ban suol Yiesu l youg mɔno, g yen jie niib. 20L po k b ji legd Yiesu g sun niib nne u buol, k l niib yiin b kua nimɔnm, g ji kpaan k ban la jalgi u maam n ninŋ, k ban fid g suol’o, g kubn’o Rom gobna nui n ninŋ. 21K l niib bual’o: « Canbaa, t ban k a maad mamɔni g biɛ tund niib lan bual nand. A g jie sua, ama a ŋɔnŋ niib Yendu sɔnu yen mɔni. 22Maad’ti, l cab k tin pa Sesaar lonpo bii, l g cab i ? » 23Yiesu n yaan bann k l tie janmi maam, k u maad’b: 24« Ŋɔn’n man dibal ii ! Ŋmaa ninnaɔnŋ yen ŋmaa sann n be l po i ? » K b yed g Sesaar yal i. 25Lann i k u maad’b: « Te man Sesaar yal nba tie Sesaar yal, g te Yendu mɔ yal nba tie Yendu yal. » 26B bo g fid g la jalgi u maam n ninŋ niib nunŋ n. K u maam yaa g lid’b, k b ji ŋmin. 27Sadusien-nba, banm nba bo g tuo g kpienm tan bu yied nyan, b ninŋ siɛb bo nagn Yiesu buol g bual’o: 28« Canbaa, Moyis bo diɛn yiko ne g tie’ti, k l gii tie g nil kuan puo, g kpe g g mɔg big, u ninja ń tug u pekual g mal’o bid. 29To, jab banlile nne n bo be g tie ninjann, g ciɛn po kuan puo, g kpe g g mɔg big. 30Munle po yua yen muntaa po yua yen yab n tenn kul tug l puo, g kpe g g mɔg big. 32G puo mɔ tan yuand g kpe. 33To, kpienm yiedu daal, ŋmaa n ji bu yend puo i ? K l maa banm banlile kul kuan’o g la. » 34G Yiesu ŋmiɛn’m: « Tin daa be ŋanduna nba ninŋ ne, jab kuand puob, g puob mɔ kun jab. 35Ama yab nba g Yendu diid g sua k b dagd yen ban yied kpienm siign g kua ŋandunpaann n ninŋ nuan, jab kan kuan puob, puob mɔ kan kun jab, 36k l maa b naan yen malɛg‑nba i, b ji kan fid g kpe. B tie Yendu bid, g dugn wan yied’b nyan po. 37Yal nba nyuan kpienm yiedu po, Moyis mɔ bo maad lann n nyan g ŋɔn g kpienm tan bu yied. Youg nba k u bo be tuntuug nba bo so muu nyan buol, u bo yiin Yonmdaan k Abraham Yendu yen Isaak Yendu yen Sakɔb Yendu. 38Yendu g tie kpienm Yendu kaa, u tie fuodb Yendu i. K l maa u yaa po b kul fo i. » 39G Yendu Kadaaɔg gbanbanda n ninŋ, yenm gaal maam g maad: « Canbaa, a maad bonŋann. » 40B ji bo jie yen ban bual’o buali. 41G Yiesu maad’b: « L tien nle i k b maad g Kristo tie Dafiid yaabuonn i ? 42K l maa Dafiid mɔno bo diɛn g maad biɛyani kadaaɔg n ninŋ k nne: “ Yonmdaan Yendu maad n Yonmdaan: Kal n nuujendu, saa yen youg nba 43k n tan bu te a ninnanda kul ń gbaan a nintual n. ” 44Lann, Dafiid gii yi Kristo u Yonmdaan, l bu tien nle i, u Yonmdaan ń biɛ guan gii tie u yaabuonn i ? » 45Niib kul n yaan cenŋ’o nyan, k u maad u ŋuantieb: 46« Suol man i kua yen Yendu Kadaaɔg gbanbanda. Banm n bua ban tu liɛ liɛdfagd gii waa, g biɛ bua k b tu gii baal naan niib n ninŋ, niib ń gii fuond’b. G bua k ban gii kaal liig kinkaani po tintaann died n ninŋ, g biɛ bua k ban gii kaal nigbenŋa kinkaani po jaanm n be naan kul. 47Banm n fe pekɔa n mɔg yal kul, g tu jaand lan wai bonciɛnn g niib ń la’b. B tan bu dad b tubl hal lan gbad’b. »

will be added

X\