Luk 2

1L dana n ninŋ, g Rom badciɛn Ogust nyan yiko k ban cɔd u niib kul. 2L cɔdcincinn bo tien youg nba g Kiriniyus bo tie Siiri doug n ninŋ yudaan i. 3L bo tie g nil kul ń kun u danm doug n i, k ban cɔd’o. 4G Sosɛf mɔ fiil Nasarɛt, Galile doug n ninŋ, g duo Bɛtlɛm, Suude doug n ninŋ, Dafiid danm doug n, k l maa u bo tie Dafiid yaabuonn i. 5Wano yen u sikpenŋ Mari bo gad k ban cɔd’b. L youg l sua g Mari mɔg puol i. 6Ban be l doug n ninŋ nyan, k u mad daal pund. 7K u mal bijabg u sipaanmad, g fun fun’o caba, g duan’o bonkobd jedibonn n ninŋ, k l maa banm nuan ji bo g la yiɛl saanm gaal buol. 8Pekpaali bo be l doug n ninŋ, g dua pekpamuaɔg n ninŋ, g tu sie nyiɛɔg sindl, g guu b pei. 9K b tan sua g Yonmdaan malɛg sie b buol, g Yonmdaan yinyiem fand g lind’b, g jiwaani suol’b paaa. 10G malɛg maad’b: « Daa jie man, k l maa n baal k n muand’i laabaal i. L laabaal baa tie pamanciɛnn i, buolu kul po. 11Dinne mɔno, Dafiid doug n ninŋ, b mal Fietua i po, wano n tie Kristo g biɛ tie Yonmdaan. 12Yin bu la yal g bann’o n ne: i bu la sanpandg k b fun fun’o caba g duan’o bonkobd jedibonn n ninŋ. » 13L youg mɔno, g malɛg‑nba bonciɛnn nyiɛ polu g baal g pugn cincinn yua po, k b dond Yendu g maad: 14« Yendu sann ń do, wano nba be hal polu po. G tinŋ n ninŋ ne, laafiɛ ń gii be niib po, banm nba k u bua’b. » 15Youg nba g malɛg‑nba yaad g ŋaa pekpaali g lebd g duo polu po, g pekpaali maad yen b lieb: « Ŋaa man tin gad Bɛtlɛm g daan diid yal nba tien l po, g Yonmdaan ŋɔn’ti. » 16K b ŋmaa tonm g gad g daan la Mari yen Sosɛf yen big, k u dua bonkobd jedibonn n ninŋ. 17Ban yaan la nnyan, k b dugn malɛg‑nba n bo maad’b yal l big po. 18K l yaa g lid yab nba kul bo gbad pekpaali maam. 19G Mari nuan gaan l maam kul, g bilg u pal n ninŋ, g ji mali l po. 20G pekpaali nyiɛ l buol g ji leb g kun, g dond Yendu, g pag u sann, g dugn b bo gbad g biɛ la bona kul nyan malɛg‑nba n bo maad’b nand nyan. 21Daa ŋanniin daal n pund, k b kɔnd big, g pul’o Yiesu, nyan malɛg n yaan bo pul’o nand, g sua k u naa daa g pil’o nyan. 22Daal nba k b bo bu tien bogda nba g Moyis yiko bo bual g puo gii mal ban tien g nyan jɔgnd ji bo pund, k b gad yen’o Serusalɛm, k ban ŋɔn’o Yendu, 23nyan lan diɛn g maad nand Yonmdaan Mɔmaam kadaaɔg n ninŋ nyan. L maad g bikpelg nba l tie bonjag kul baa tie Yonmdaan yua i. 24B biɛ bo bu yid salg yen muaɔg n lanjeli nle, lann i kaa ŋaag lanjepaani nle, nyan Yonmdaan Mɔmaam n yaan bual nand. 25Nil nne bo be Serusalɛm n ninŋ, g yi Simeyɔn. U bo tie nimɔn i, g cɔln Yendu, g guu Israyɛl Fietua baalu, g Foŋanm be yen’o. 26Foŋanm bo tuod g maad’o, k u daa kan kpe g g la Yonmdaan n sun yua nba, wano n tie Kristo. 27Youg nba g Yiesu danm bo kua yen’o jaanddeciɛɔnŋ n ninŋ, k ban tien Yonmdaan Mɔmaam n maad yal, l sua g Foŋanm te g Simeyɔn gad l n ninŋ o. 28Lann i k u gaal big u nui n ninŋ, g dond Yendu g maad k nne: 29« Yonmdaan, ŋan bo maad yal ji tien, ji cab mɔlane k a tuonsunn ń kpe gii saa yen laafiɛ. 30K l maa n ninbina la fielu 31nba k a bobn buoli kul po. 32L tie yinyiem nba bu fand buolfani niib k ban bann’a, g te k a buolu Israyɛl niib ń gaal yudand. » 33Maam nba kul k u maad Yiesu po bo yaa g lid u naa yen u baa. 34G Simeyɔn yad yedŋanm b po g biɛ maad u naa Mari: « Yendu te k a big ne po, Israyɛl buolu n ninŋ, yenm bu baa, g lieb ń la fielu. U tie banm i g Yendu ŋɔn. Ama niib bu yie’og. 35Nnyan, niib bonciɛnn maalm bu dɔgd. Ama fin nuan, fala tan bu kua’a, nyan b cɔg a pal jugsieg nyan. » 36Yendu sogni nne mɔ bo be k b yi’ug Ann, u bo tie Fanuwɛl bipuo i, Asɛr buolu n big. U bo ciɛnd hal bonciɛnn. U bo tien bina ŋanlile kua i yen u sal, 37g ji te pekual g tan pund piinniin yen bina ŋanna. U bo tund g be jaanddeciɛɔnŋ n ninŋ, g lolg mɔb g jaand g pug Yendu, yendu n yen nyiɛɔg. 38L youg k u mɔ baal, g dond Yendu, g maad big ne maam danm nba kul bo guu Israyɛl buolu fielu daal. 39Ban yaan tien bogda kul g gbenn, nyan Yonmdaan Mɔmaam n bual nand, k b lebd g kun Nasarɛt, Galile doug n ninŋ. 40K l big ji kped g pugd, g gbie yen yanfuom, g Yendu ŋalbalg be yen’o. 41Binn kul, u danm bo tu gad Serusalɛm g di Suif‑nba fielu jaanm. 42Yiesu n yaan la piig yen bina ŋanle, k b duo l doug n ninŋ, nyan ban bo tu tie nand. 43L jaanm dana n yaan pend, g Yiesu danm leb g kun g ban g Yiesu ŋua i, k u yen be Serusalɛm. 44B sonm yentunmunn, g mali k u be yen b yegni i. B tan kpaan’o b naataani n ninŋ, yen yab nba ban’m buol, 45g g la’ɔg. K b lebd Serusalɛm, g ŋanm g kpaan’o. 46Daa ŋantaa daal, k b ji tan la’ɔg jaanddeciɛɔnŋ n ninŋ, k u kal Yendu Kadaaɔg gbanbanda canbaa‑nba siign ninŋ, g cenŋ b maam g biɛ bual’b buali. 47Yab nba kul bo cenŋ u maam, bo yaa mɔi i yen ban la k u yam fo, k u biɛ ŋmiɛnd yen banm nba. 48U danm n yaan la’ɔg, k l yaa g lid’b, k u naa maad’o: « N big, bɛ n te k a tien’ti nnyan i ? Diid, min yen a baa kul kpaan’a k t yam ŋmad. » 49K u maad’b: « Bɛ po i k i kpaan’n nii ? I g ban k l tie k min gii be n Baa ŋaag n ninŋ ii ? » 50K banm yen g gbad maam nba k u bo maad’b nyan niimn. 51K u yeg yen’m g jiid Nasarɛt, g tiend b buam kul. K u naa bilg l bona kul u pal n ninŋ. 52G Yiesu kped, k u yanfuom pugd, k u manŋd Yendu yen niib pala.

will be added

X\