Luk 19

1Yiesu bo kua Seriko doug n ninŋ g pend. 2L sua g nil nne be, k b yi’ug Sase. U bo tie lonpogaala ciɛn i, g biɛ tie mɔgd. 3U bo kpaan k wan la Yiesu n tie yua nba, g g fid g dugn niwulug po, k l maa u bo tie nijinjenŋ i. 4K u san g gaal liig, g daan duo tiig po, k wan fid g la’ɔg, k l maa u bo bu tɔgn l sɔnu i. 5Yiesu n yaan tan pund l tiig buol youg nba, k u yaad g diid g maad’o: « Sase, jiid tonm. N bu can fin i dinne. » 6G Sase gbaa g jiid g gaal’o yen pamann. 7Niib kul n yaan la nnyan, k b buln buln g maad: « U gad g daan can biiddaan i. » 8L puol po g Sase fiil g sed g maad Yonmdaan: « To, Yonmdaan, n bu te tali n mɔgm bɔgdm. L gii tie k n dii sua jod, n bu ŋmiɛn’o taal munna l po. » 9G Yiesu maad: « Dinne mɔno fielu baal ŋaag ne ninŋ, k l maa nil ne mɔ tie Abraham yaabuonn i. 10Yen mɔni, Nifosaal Bija baal k wan kpaan g biɛ fiel niib nba bod i. » 11Niib n yaan bo cenŋ Yiesu nyan, k u biɛ pua makpanjam g pugn, k l maa u ji bo g fag yen Serusalɛm, g niib biɛ mali g Yendu bu kaan u bal l youg mɔno i. 12U bo maad: « Bad bija nne bo be, g tan saa doug nba fag, k ban din’o bal k wan guan g kpen u doug n ninŋ. 13Lann i k u yiin u tuonsunna piig, g tie yua kul dibala tudl, g maad’b: “ Tug man gii tie kpinkpeonŋ saa yen n guanu. ” 14Ama k u doug n niib g bua’ɔg, g sun tondi u puol po, k ban daan maad, k b g bua k wan gii tie b bad. 15Yen l yaa kul, k u dii bal g guan g kpen u doug n ninŋ, g yiin u tuonsunna nba k u daan tie’b ligli nyan, k wan diid yua kul n kpend g la nand. 16G cincinn yua baal g maad: “ Canbaa, n la nyuad a ligli ŋann po dibala tuda piig. ” 17G bad maad’o: “ N faa, a tie tuonsunmɔn i. N tie’a ŋalman waam nne k a ŋanm g kub. L yaa po, n cab’a dingbana piig, k l baa tie a diem. ” 18G munle po yua baal g maad: “ Canbaa, n la nyuad a ligli ŋann po dibala tuda ŋanmu. ” 19G bad maad’o: “ A mɔ, n cab’a dingbana ŋanmu, k l baa tie a diem. ” 20G lua mɔ baal g maad: “ Canbaa, a ligli n nyan, k n daan gbin cabl n g wuon. 21N daan jie’a, k l maa a tie nil nba biɛ i. A wo yal nba k a g den, g yend yal nba k a g bul. ” 22K u canbaa maad’o: “ Tuonsunyuonn, a maam n bu guan g suol’a. A daan ban k n tie nil nba biɛ, g wo yal nba k n g den, g yend yal nba k n g bul, 23bɛ n te k a daan g juab n ligli g bil ban bilg ligli naan, k n tan gii kpen yaa daal, min gad g gaal n ligli yen l nyuad i ? ” 24K u maad yab nba bo be l buol: “ Fiel man u ligli, g te yua nba mɔg piig nyan. ” 25K b maad’o: “ Canbaa, wano mɔg piig o waa ! ” 26K u ŋmiɛn’m: “ N maad’i, yua nba mɔg kul, b bu pugn wano i. Ama yua nba g mɔg, b bu fiel baa wan mɔg yal mɔno. 27K n ninnanda mɔ, yab nba daan yie k n kan gii tie b bad nyan, baal yen’m man ne buol ne, g kpi’b n nunŋ n ninŋ. ” » 28Yiesu n yaan maad nnyan, k u yeg yen’m g be liig g do Serusalɛm. 29Wan yaan nag dobid nne k b yi Bɛtfaase yen Betani, k l g fag yen Oliif tiidi jual, k u sun u ŋuantieb n ninŋ banle, g maad’b: 30« Gad man doug nba be liig ne. I daan gii pund l doug n, i bu la g bonbig daag, g sua daa g ban g jag’o. Yin dagd’o g guan yen’o nii. 31Nil daan gii bual’i g laabaal k i dagd bonbig i ? Yin maad g Yonmdaan n bua. » 32K u ŋuantieb ne gad g daan la nyan wan yaan bo maad’b nand nyan. 33Ban yaan bua n dagd bonbig nyan, g yab yen l bonbig bual’b: « Laabaal k i dagd bonbig ne i ? » 34K b maad: « Yonmdaan n bua’ɔg. » 35K b guan yen l bonbig Yiesu buol, k b land b tiɛd g maan u po, g jagn Yiesu. 36Wan yaan jag l bonbig g saa nyan, g niib land b tiɛd g lad u sɔnu po. 37Wan ji nagd Serusalɛm g jii Oliif tiidi jual, k u ŋuantieb kul pala man k b kpanm, g ji tand g yiin g dond Yendu, g dugn palug nba kul k b daan la nyan po, 38g maad: « Yendu ń yad u yedŋanm bad nba baad Yonmdaan sann po. Laafiɛ ń gii be Yendu buol. Yendu sann ń do hal polu po. » 39Farisiɛn-nba nne bo be l niwulug n ninŋ, g maad Yiesu: « Canbaa, kɔn yen a ŋuantieb ne k ban suon ! » 40K u ŋmiɛn g maad: « N maad’i, banm gii suon, tana n ji baa yign. » 41Youg nba g Yiesu bo nag Serusalɛm g gbenn, g la l doug, k u ji buud l doug n yab po g maad: 42« L bo gii tie k i mɔ ban dinne yal nba bo bu baal yen i po laafiɛ, l bo baa ŋan ! Ama mɔlane, l kul daa duag’i nii. 43Dana baad k i ninnanda bu pign’i g kaan g lind’i, g pib’i kaannaa kul, 44g biɛn yinm yen i bid kul, g mud i died kul som som, k l maa i g bann youg nba g Yendu gɔnn’i. » 45Lann i g Yiesu gad g kua jaanddeciɛɔnŋ n ninŋ, g ji biel kpinkpenda g maad’b: 46« L diɛn Yendu Kadaaɔg n g maad: “ N ŋaag ne baa tie jaandi ŋaag i ”, k yinm yen ji tug g tien naayiga tintaanbuol. » 47Daal kul, u ji bo tund niib Yendu maam jaanddeciɛɔnŋ n ninŋ i. G Yendu salg-yidkab ciɛnm yen Yendu Kadaaɔg gbanbanda yen doug n nikpela kpaan k ban biɛn’o, 48ama b yen bo g ban ban bu tien nand, g dugn niib kul bo luod tuba i g cenŋ’o.

will be added

X\