Luk 18

1G Yiesu biɛ pua u ŋuantieb makpanjam ne g bua ban bann k l tie k ban gii jaand youg kul i, g daa wad b pala. 2U bo maad’b: « Doyenu nne ninŋ, buuddaan nne n bo be g g jie Yendu, k u baga g be yen nil. 3K l doug n ninŋ, pekual nne mɔ bo be, g tund g baad g laad’o, g maad k wan kun mɔni wano yen yua nba mɔg maam ne siign ninŋ. 4G buuddaan ne tund g yied. G diyenn, k u tan mali g maad: “ N l g jie Yendu, k n baga biɛ g be yen nil. 5Ama pekual ne n baad g mabnd’n nand ne, n bu bu u buud, k wan ji daa baad g nyanŋ n yam. ” » 6G Yonmdaan guan g maad: « I cenŋ man buuddanbiɛdo ne n yaan maad yal nba. 7I mali g Yendu nuan kan kun mɔni u nigannkab po, banm nba yign u po yendu n yen nyiɛɔg uu ? U biɛ daa baa biɛnd yaam yaa aa ? 8N maad’i, u bu gbaa g kun mɔni b po. Ama min Nifosaal Bija n tan bu guan, n bu l la niib nba biɛ daa l dug n po ii ? » 9G Yiesu biɛ pua makpanjam nne, k l nyuan niib nba mali k b tie nimɔnm g nund lieb. 10« Jab banle nne bo duo jaanddeciɛɔnŋ n ninŋ, g daan bu jaand. Yend bo tie Farisiɛn i g lua tie lonpogaal. 11Ban yaan pund, g Farisiɛn sie g jaand u pal n ninŋ nne: “ N Yendu, n tiend’a balg yen min g tie nyan nilieb nyan. Banm tie naayiga i, nibiid, cuncona. N biɛ g tie nyan lonpogaal ne nyan. 12N lolg mɔb taal munle i laad n ninŋ, k min mɔg yal kul, n tu bɔgd g bil kpega piig i, g tug kpegyenn g te’a. ” 13G lonpogaal nuan sie fagm, g taan g bua wan yaad yul mɔno, ama g tiib g taag nuu g maad: “ N Yendu, diid min biiddaan yen ninbaaɔg ”. » 14G Yiesu ji maad’b lann i: « N maad’i g lonpogaal ne i, g Yendu pii’ug sugl k u lebd g kun ŋaag. L g tie u lua ŋano kaa. K l maa yua nba kul donŋ u kua, b bu jiin’o. Yua nba jiind u kua mɔ, b bu don’o. » 15Niib bo baal yen binyidi mɔno Yiesu buol, k wan maan nuu b po. U ŋuantieb n yaan la nnyan, k b fu yen’m. 16Ama g Yiesu te k b nagn yen’m, k u maad: « Ŋaa man g bid ń baal n buol, daa biel’b man, g dugn yab nba tie nyan banm nyan, Yendu diem tie b yal i. 17Yen mɔni n maad’i, yua g tuo g gaal Yendu bal nyan big nyan, u kan kua u diem n ninŋ. » 18Suif‑nba yudaan nne bo bual Yiesu: « Canbaa, fin nba mɔn, n bu tien bɛ i, g tan la miɛl nba kan ban g gbenn i ? » 19G Yiesu maad’o: « Laabaal k a yed k n mɔn i ? Baa sua g mɔn, Yendu kua i kaa. 20A yen ban Yendu mɔmaam ne: “ A kan conm, a kan kpi nil, a kan jan, a kan kun mɔnkunninkpind, cɔln a baa yen a naa. ” » 21K l jua maad: « N cil g cɔln l kul ne g daa tie naasenbig i. » 22Yiesu n yaan gbad nnyan, k u maad’o: « Bonyenn kua n ji pɔd’a. Kuad ŋan mɔg yal kul, g tug l ligli g biid tali. Nnyan i k a bu la mɔgm Yendu ŋaag n. A gii tien nnyan, ŋan baal gii ŋua’n. » 23Wan yaan gbad l maam nnyan, k u pal biil, k l maa u bo mɔg ŋalman nba yab. 24Yiesu n yaan la’ɔg nnyan, k u maad: « L paa yen ŋalmandanm ń kua Yendu diem n ninŋ. 25Lan paa yuoyuoug po nand k u kan fid g kua kpalpienu bonn n nyan, ŋalmandaan gii bua n kua Yendu diem n, l baa paa u po g cie nnyan. » 26G yab nba gbad l maam bual k l gii tie nnyan, g ŋmaa n bu fid g la fielu i? 27K u maad’b: « Nifosaal n kan fid yal nba, Yendu nuan bu fid. » 28G Piɛr maad: « Diid a, tinm n ji ŋaa tin mɔg yal nba kul g ŋua’a ne ii ? » 29G Yiesu maad’b: « Yen mɔni n maad’i, nil gii yaad g ŋaa u ŋaag, u puo, u ninjanm, u danm lann i kaa u bid, k l tie Yendu diem po, 30l daan bu la nyuad lan gii yab tinŋ po ne, g youg nba baad wan biɛ tan la miɛl nba kan ban g gbenn. » 31G Yiesu yiin u ŋuantieb piig yen banle nba nyan g maad’b: « I la ii ? T do Serusalɛm n nyan. G yal nba kul g Yendu sogni‑nba bo diɛn Nifosaal Bija po, l bu tien. 32B bu tug’o g cab buolfanu yab, ban laa laa’ɔg g sugd’o, g sii mɔsand u po, 33g pua’ɔg yen naapuna g kpi’ug, daa ŋantaa daal wan yied. » 34Ama b bo g gbad l niimn ninŋ. L maam bo duag’b, k b g ban Yiesu n bua n maad yal. 35Yiesu yen u ŋuantieb n yaan nagd Seriko doug n ninŋ, l sua g juan nne kal sɔnkunŋ g miɛd. 36Wan yaan gbad g niib bonciɛnn pend k u bual lan tie yal. 37K b maad’o g Nasarɛt Yiesu n pend. 38K u tand g maad: « Yiesu, Dafiid Bija, jie’n ninbaaɔg. » 39G yab nba bo be liig nyan, gaal jad u po, k wan suon. Ama k u ŋanm g yign yen paalu: « Dafiid Bija, jie’n ninbaaɔg. » 40Lann i g Yiesu sed g te k b baal yen’o u buol. Wan yaan nagn youg nba, k u bual’o 41k u bua k wan tien bɛ i u po i ? K u maad: « Yonmdaan, n bua k ŋan te k n guan g nyuand i. » 42G Yiesu maad’o: « Nyuand, a paag n nyan g dugn a dug n po. » 43L youg mɔno, k u nyuand, g ji ŋua Yiesu g pag Yendu. Niib kul n yaan la nnyan, k b dond Yendu.

will be added

X\