Luk 16

1Yiesu biɛ bo maad u ŋuantieb: « Ŋalmandaan nne n bo be, g mɔg tuonsunn k u guu u mɔgm. K b tan sɔb g maad’o k l tuonsunn diɛ u mɔgm g yad. 2K u yiin’o g bual’o: “ N gbiɛ k b maad a po g bɛ ɛ ? Baal g ŋɔn’n ŋan tu kub n bona nand k n diid. K l maa a ji kan gii nyuan n bona n ninŋ. ” 3K l tuonsunn maad u kua ninŋ: “ N canbaa n yaan nyanŋ’n u tuonn n ninŋ ne, n ji bu tien nle ? Kpakonu i yaa aa, n g mɔg paalu. Miɛdug mɔ i yaa aa, l baa mɔg’n fai. 4N ban min bu tien nand, k b gii bel’n tuonn, siɛb ń gaal’n b ŋai n ninŋ. ” 5G yiin yab nba bo mɔg u canbaa pana kul, yend yend. G maad cincinn yua: “ A mɔg n canbaa pann yinŋaa daan ii ? ” 6K l jua maad’o g kpam golnd kobg. K u maad’o: “ A pann kadaaɔg n nyan. Kal g diɛn g golnd piinmu. ” 7G biɛ maad lua mɔ: “ A mɔ mɔg pann yinŋaa i ? ” K u maad g dii kpalpiɛd kobg. K u maad’o: “ A pann kadaaɔg n nyan. Diɛn g piinniin. ” 8G canbaa pag l joddiil, yen wan sun ninfantuonn. Nnyan i g yab nba k b pala kɔn ŋanduna ne binbem po kukua, b mɔg ninfanm ban be nand yen b lieb g cie yab nba k b pala kɔn k ban gii mɔg Yendu yinyiem. » 9G Yiesu biɛ maad: « Min maad’i faa, tug man ŋanduna ne mɔgm gii kpaan dɔnn‑nba, g daal nba k l mɔgm tan bu gbenn, Yendu ń gaal’i u ŋaag n. 10Yua nba mɔn bonbid-bid n ninŋ, u mɔn yal nba yab n ninŋ mɔ. Yua nba mɔ g mɔn bonbid-bid n ninŋ, u g mɔn yal nba yab n ninŋ mɔ. 11L gii tie k i g ŋanm g kub ŋanduna ne mɔgm, ŋmaa n bu guun’i polu po mɔgm i ? 12L gii tie k i g ŋanm g kub yal nba g tie i yal, ŋmaa n bu te’i yal nba tie i yal i ? 13Tuonsunsua kan fid gii ŋua canbaa‑nba banle. U baa bua yend maam i, u kan gii bua lua nublu. U bu tug u kua g cab yend i, gii nund lua. I kan fid gii ŋua Yendu g biɛ ŋua ligli mɔ. » 14G Farisiɛn-nba gbad l maam kul, g ji laa’ɔg k l maa b bo buad ligli. 15K u maad’b: « Yinm, i ŋɔnŋ i kua k i tie nimɔnm niib nunŋ n ninŋ, ama Yendu ban i pala n ninŋ yal nba be. Niib n pag’i yal nba po, l tie juali i Yendu po. » 16« Moyis kadaaɔg yen Yendu sogni‑nba mɔ n bo diɛn yal nba bo be, saa yen San Nyunwultua youg. Lan cil San Nyunwultua youg, b muand Yendu bal Laabamann, g sua kul gbaa k wan tuo l bal. 17Polu yen tinŋ bodu kan gii paa g cie Yendu Mɔmaam n ninŋ baa diɛnbiyenŋ gii bua lan bod. 18Nil nba kul nyan u ŋaapuo, u gii guan g kuan puolua, u tien cunconm n nyan. G yua nba mɔ kuan puo nba k u sal nyan’o mɔ tien cunconm i. » 19« Jua nne n bo be g tie ŋalmandaan, g liɛ tiɛŋand nba k l daaɔg paa, g tie jaanm daal kul, g di manu. 20G talg nne mɔ be, k b yi’ug Lasar, g bo dua ŋalmandaan dimɔb n, k u gbannand po gbie yen nala. 21U bo sun k wan gii di jeyoli-yoli nba bo baal ŋalmandaan jedibuol. Sangbanni bo baad mɔno g lagi u nala. 22G talg ne tan kpe, g malɛg‑nba tug’o, g gad yen’o Abraham buol. G ŋalmandaan mɔ tan kpe, k b pii’ug. 23U bo laad fala bonciɛnn tinkpiiug n ninŋ, g tan yaad ninbina g diid g la Abraham hal fagm, g Lasar be u buol. 24Lann i k u tand g maad: “ N baa Abraham, jie’n ninbaaɔg. Sun Lasar k wan tuu u nuubil nyum n ninŋ, g sɔnŋ n lanm, k l maa n laad fala bonciɛnn muu ne ninŋ. ” 25K Abraham maad: “ N big, tiɛd k a daan la manu youg nba k a daan mɔg miɛl, ama Lasar nuan daan la fala. Mɔlane, u ji laad u fuom ne buol ne, k fin be walu n ninŋ. 26L kul kaa nyan. Buoug biɛ be g yab g paad tinm yen yinm, g yab nba bua ban nya ne g gad i buol kan fid, k i mɔ biɛ kan fid g nya l po g baal ne. ” 27G ŋalmandaan maad: “ Lann, n baa, n balm’a k a sun Lasar n baa ŋaag n, 28k l maa n mɔg ninjanm banmu, k wan tuod g cegl’b, k b mɔ ń tan daa baad fala ne ninŋ. ” 29K Abraham maad’o: “ A ninjanm mɔg Moyis kadaaɔg yen Yendu sogni‑nba n bo diɛn yal. Ban gii cenŋ’b. ” 30G ŋalmandaan maad: “ N baa Abraham, lann kua kan fid g te k ban lebd b binbem, ama l gii tie g sua nyiɛ tinkpiiug n g gad g maad’b, b bu lebd b binbem. ” 31K Abraham maad’o: “ L gii tie k b g cenŋ Moyis yen Yendu sogni‑nba, baa nil gii yied kpienm siign ninŋ g guan, b kan gaal ”. »

will be added

X\