1 Lonpogaala yen biiddanm kul bo baad Yiesu buol g cenŋ u maam. 2 G Farisiɛn-nba yen Yendu Kadaaɔg gbanbanda buln buln g maad: « Nil ne gaan biiddanm g kaal g di yen’m. » 3 Lann i k u pua’b makpanjam ne: 4 « I siign ninŋ ne, nil gii mɔg pei kobg g yend bod b ninŋ, u kan ŋaa pei piinwai yen banwai nba tenn muaɔg n ninŋ, g gad g kpaan yua nba bod, saa yen youg nba k u tan bu la’ɔg uu ? 5 U gii la’ɔg youg nba, u bu juab’o g bug’o yen pamann, 6 g kun ŋaag g taan u dɔnn‑nba yen u kunkuanyuag‑nba g maad’b: “ I kpanm man yen’n, k l maa n pieog nba daan bod nyan, n la’ɔg o. ” 7 N maad’i, l baa tie nnyan i. Youg nba g biiddanyeno kukua lebd u binbem, l tu tie pamanciɛnn i Yendu po, g cie pamann nba k u mɔg, g dugn nimɔnm piinwai yen banwai nba tenn, g ji g mɔg k ban lebd b binbem. 8 Daa bii puolano po n baa mɔg dibala piig, g dibayenn ń bod k u kan son fidl g tign dieog g ŋanm g kpaan bonŋann, saa yen youg nba k u tan bu la i ? 9 Wan bu la youg nba, u bu taan u dɔnn‑nba yen u kunkuanyuag‑nba g maad’b: “ I kpanm man yen’n, k l maa n dibal nba daan bod nyan, n guan g la o. ” 10 N maad’i, l baa tie nnyan i. Youg nba g biiddanyeno kukua lebd u binbem, l tu tie pamanciɛnn i malɛg‑nba buol. » 11 G Yiesu biɛ maad: « Nil nne n bo be g mɔg bijabi banle, 12 g sanbiɛn tan maad u baa: “ N baa, te’n faal nba tan baa tie n yal. ” Lann i g bibaa biid’b u mɔgm. 13 Daa ŋanŋaa nne n pend, g sanbiɛn taan taan wan mɔg yal nba kul, g fiil g gad doug nba fag, g daan dii u mɔgm kul yen jadm. 14 Wan dii g gbenn youg nba, k l tuu g kom baa l doug n ninŋ g mɔn, g jied ji pɔd’o. 15 K u gad l doug n niyend nne buol, k wan gaal’o k wan gii tie u tuonsunn, k l nil gaal’o k u kpaa u duoli. 16 U bo sun k wan gii di duoli jied, ama g sua yen bo g tien’o. 17 K u baa yam, g mali suoo g maad: “ N baa ŋaag n, tuonsunna be g yab, g di b yam n ninŋ k l biɛ tend, k min yen ji kpenn kom ne buol ne. 18 N bu fiil g kun n baa buol, g daan maad’o: ‘N baa, n biil Yendu, g biɛ biil’a mɔ. 19 N ji g dagd yen ŋan yiin’n k a bija. I kub’n nyan a tuonsunna n ninŋ yend nyan.’ ” 20 Lann i k u fiil g kun u baa buol. Wan daa bo paa fagm, k u baa la’ɔg, k u pal siɛ u po, k u san g daan wob’o. 21 K u big maad’o: “ N baa, n biil Yendu, g biɛ biil’a mɔ. N ji g dagd yen ŋan yiin’n k a bija. ” 22 Ama k u baa maad u tuonsunna: “ Kagn man, g baal yen gaalug nba mand g ŋan g lan’o, g pilm’o nuubinyinn, g biɛ pilm’o taacaad. 23 Suol man naatonpaanŋ nba mɔg kpam g kpi, k tin tien jaanm. 24 K l maa n bija ne daan kpe o, g guan g la miɛl. U daan bod i, k n guan g la’ɔg. ” L po k b ji tiend jaanm. 25 L sua g bijakpel be kpaab po. Wan tan kpend g nag ŋaag, g gbad gingana yen yani, 26 k u yiin tuonsunyeno, g bual’o l nyɔgl niimn. 27 K l tuonsunn maad’o k u waag n kpen, k u baa kpii naatonpaanŋ nba mɔg kpam, k l maa u la’ɔg yen laafiɛ. 28 L po g bijakpel pal bie, k u yie k u kan kua. K u baa nyiɛ g balm’o. 29 K u ŋmiɛn g maad u baa: “ Bina ŋanŋaa n nyan, k n tiend a buam, g g ban g yie a maam i ? Yen l yaa kul, a g ban g tie min baa ŋuab, k n tien jaanm yen n dɔnn‑nba. 30 Ama a bija nba ne, yua nba biil a mɔgm yen puocuncona n yaan tan kpen, k a kpii naatonpaanŋ nba mɔg kpam u yaa po ! ” 31 K u baa maad’o: “ N big, fin tund g be yen’n youg kul. K min mɔg yal nba kul tie a yal i. 32 L tie k t pala ń gii man k tin tien jaanm, k l maa a waag ne daan kpe o, g guan g la miɛl. U daan bod i, k t guan g la’ɔg. ” »
