Luk 13

1L youg, g niib baal g maad Yiesu g Pilat bo te k b kpii Galile niib nne. L bo sua k l niib yid Yendu salg i. 2G Yiesu ŋmiɛn’m: « I mali k l Galile niib bo kpe l kuum g dugn b bo tie biiddanm g cie Galile yab kul yaa aa ? 3N n, n maad’i l g tie nnyan kaa. Ama i mɔ yen gii g lebd i binbem, i kul bu biɛl nnyan i. 4Bii, i mali g piig yen niib banniin nba g Silowe detuadug bo baa g nyag’b, k b kpe nyan, bo biil Yendu g cie Serusalɛm yab kul i ? 5N n, n maad’i l g tie nnyan kaa. Ama i mɔ yen gii g lebd i binbem, i kul bu biɛl nnyan i. » 6K u pua’b makpanjam g maad: « Nil bo be g mɔg kinkanŋ u kpaab n ninŋ, g tan baal k wan pual kinkana, g yen g la. 7Lann i k u maad kpaguul: “ Diid a ! Bina ŋantaa n nyan, k n tu baal k n pual kinkana, g yen g laad siɛl. Cua’ɔg, k wan daa sie g biid yiɛl fam. ” 8Ama g kpaguul ŋmiɛn g maad: “ Canbaa, daa ŋaa’ɔg binn nba ne o, k n gbiil u nyagl n ninŋ g tien dulm. 9L g kand u bu lon binn po. U tan gii g lon, ŋan cua’ɔg. ” » 10Yiesu bo tund niib Yendu maam Suif‑nba tintaann dieog n ninŋ Saaba daal. 11L sua g puo nne be l buol g sanpola ŋua’ɔg g te k u yiɛl bina piig yen ŋanniin, g nyiɛ golg g kan fid g yaad g sed baa waam nne. 12G Yiesu la’ɔg, g yiin’o g maad’o: « Puo, a paag n nyan. » 13G maan nui u po. L youg mɔno, k u yaad g sed, g ji dond Yendu. 14Ama g Suif‑nba tintaann dieog n canbaa pal bie yen Yiesu n yaan paag nil Saaba daal, k u gaal maam g maad niib: « Daa ŋanluob n tie g nil kul ń sun tuonn. Lann, tu baal man l dana n ninŋ, k wan paag’i, k lan daa tie Saaba daal. » 15G Yonmdaan ŋmiɛn’o g maad: « Munafigidanm ! I siign ninŋ ne, sua kul g lod u naab, lann i kaa u bonŋ g saa g nyunŋ’o Saaba daal ii ? 16G puo ne nba tie Abraham yaabuonn, g Sitaan lol’o piig yen bina ŋanniin n ne, l bo g dagd yen ban lod’o Saaba daal ii ? » 17Wan yaan maad nnyan, g fai suol u nantieb, ama g niib kul pala manŋ tuonŋana nba kul k u suun po. 18G Yiesu biɛ maad: « Yendu diem naan yen bɛ i ? N bu bogn’o yen bɛ i ? 19Yendu diem naan yen kpinbuolg nba k b yi mutard nyan bii i ; g nil tug g bul u gɔglug n ninŋ. K l piɛ g tan te tiig, g nuani ted b tedd u benda po. » 20K u pugn g maad: « N bu bogn Yendu diem yen bɛ i ? 21L tie nyan dibina nyan i, g puo tug g buun yen kpanu yom nba yab, k l kpanu yom kul tan fid fid g gbie tadd. » 22Yiesu bo paa sɔnu po g saa Serusalɛm g pend g lɔ doi, g tuad dingbana, g tund niib Yendu maam. 23G nil nne bual’o: « Yonmdaan, niib banŋaa nne kua n tan bu la fielu uu ? » 24K u maad niib: « I nyign man g kua dimɔb nba yiɛb, k l maa n maad’i, niib bonciɛnn bu kpaan k ban kua, g yen kan fid. 25Youg nba g ŋaagdaan bu fiil g luon dimɔb, l bu sua k i be cincann i. L youg, i bu kuo gann g maad: “ Yonmdaan, luod gann k t kua. ” U bu ŋmiɛn g maad’i: “ N g ban yin nyiɛ naan. ” 26L youg, i bu maad: “ T daan di g nyu a nunŋ n ninŋ, k a tund Yendu maam t doi n ninŋ. ” 27Wan maad’i: “ N g ban yin nyiɛ naan. Sud man n buol ne, yinm nba kul tiend bonbiil. ” 28B bu lu’i cincann po i. L buol i k i baa buud g ŋman nyina youg nba k i bu la Abraham yen Isaak yen Sakɔb yen Yendu sogni‑nba kul Yendu ŋaag n ninŋ. 29Niib bu nya hal puol yen nintual, yaanŋ yen yanbaɔnŋ, g kal g di jaanm Yendu ŋaag n ninŋ. 30Lann, yab nba juod ninŋ, siɛb tan bu gaal liig, g yab nba be liig n ninŋ mɔ, siɛb ń guan puol. » 31L youg mɔno, g Farisiɛn-nba ninŋ, yenm nagn Yiesu buol g maad’o: « Fagd ne buol ne, k l maa Erod kpaan k wan kpi’a. » 32K u maad’b: « Gad man g daan maad l jun‑g‑pieb g dinne yen wonn, n bu bel sanpola g paag yiɛnm. G daa ŋantaa daal, n tuonn bu gbenn. 33Lann dinne yen wonn yen wontunm, l tie k n min guan g tug n sɔnu gii saa i, k l maa l g cab g Yendu sogni ń kpe fann po, l gii g tie Serusalɛm n ninŋ i kaa. 34Serusalɛm ! Yinm Serusalɛm yab, yinm nba kpi Yendu sogni‑nba, g jaag wan sun yab i buol tana, taal munŋaa i k n kpaan k n taan’i, nyan kuunaanŋ n yaan tu taan u kuubid u kpinkpana n ninŋ nand nyan, k i yie i ? 35L po n te g Yendu bu nyɔl i ŋaag. N maad’i k i ji kan ban g la’n, saa yen youg nba k i tan bu maad: “ Yua baad Yonmdaan sann po u sann ń do. ” »

will be added

X\