1 Canbaa Tewofiil, niib bonciɛnn bo cil g diɛn yal nba bo tien t siign, 2 nyan yab nba bo be cilg youg, g la yen b ninbina g ji muand Yendu maam n dugn’ti nand nyan. 3 L yaa po n te, k n ŋanm g bual bual yal nba kul bo tien hal cilg youg, g la k l ŋan yen k n mɔ ń diɛn nyua nyua g te’a, 4 k a fid g bann k ban tund’a yal tie mɔni. 5 Youg nba k Erod bo tie Suude doug n bad, salg-yidkua nne bo be k b yi’ug Sakari. U bo be Abiya salg-yidkab cagl n ninŋ i, k u ŋaapuo tie Aharɔn yaabuonn, k b yi’ug Elisabɛt. 6 B banle kul bo tie nimɔnm i Yendu nunŋ n ninŋ, g sonm u sɔnu n ninŋ, g cɔln u mɔmaam kul, g g mɔg siɛl yaa jalgi. 7 Ama b bo g mɔg big, k l maa Elisabɛt bo tie ŋɔlg i, k banm banle kul biɛ bo ciɛnd o. 8 Dana nba ninŋ g Sakari yen u cagl n niib bo bu sun jaanddeciɛɔnŋ n tuonn Yendu nunŋ n ninŋ nyan, g diyenn 9 k b tɔ tiɛ tiɛ, nyan ban bo tu tie nand, k l suol Sakari, k wan kua jaanddeciɛɔnŋ gɔnn n ninŋ, g ŋubn ŋubl. 10 Niib kul bo be lijɔug n ninŋ, g jaand youg nba k b ŋubnd ŋubl. 11 G Sakari tan la Yonmdaan malɛg, k u sie ŋubl binbindl jendu po. 12 Sakari n yaan la’ɔg nnyan, k u yam pud, g jiwaani suol’o. 13 Ama g malɛg maad’o: « Sakari, daa jie k l maa Yendu gaal a jaandi. A ŋaapuo Elisabɛt bu mal bijabg, ŋan pul’o San. 14 A baa kpanm yen pamann, g niib bonciɛnn pala ń biɛ manŋ u malu po, 15 k l maa u baa mɔg sann Yonmdaan nunŋ n ninŋ. U kan gii nyu dimɔunŋ g bual dipaalm. U bu tuod gii gbie yen Foŋanm, g daa be u naa tug n ninŋ i. 16 U bu te k Israyɛl yab bonciɛnn ń guan Yonmdaan b Yendu buol. 17 U tan baa mɔg Yendu Fuom yen u paalu nba k Eli bo mɔg, g gaal Yonmdaan liig g te g bibaa‑nba ń guan g manŋ yen b bid, g te g kangbada ń mɔ ń ji gii mɔg nimɔnm yam. Wano n bu te g niib ń bobn gii guu Yonmdaan. » 18 G Sakari maad malɛg: « Bɛ n bu te min bann k l tie mɔni i ? K l maa n ciɛnd o. N ŋaapuo mɔ biɛ ji tie puciɛnn i. » 19 G malɛg ŋmiɛn g maad’o: « Min n tie Gabriɛl, n be Yendu buol i. U sun’n k n baal g pag yen’a, g maad’a l laabamann i. 20 A yen g gaal k min maad’a yal tie mɔni. Lann, a bu te muug, g ji kan fid g maad, saa yen daal nba k l bona kul ne tan bu tien, nyan Yendu n sen k l tan bu tien youg nba. » 21 Niib bo guu Sakari, k l yaa g lid’b yen wan wai jaanddeciɛɔnŋ gɔnn n ninŋ. 22 Wan nyiɛ youg nba, u g fid g maad yen’m. Lann i k b bann k u la siɛl jaanddeciɛɔnŋ gɔnn n ninŋ. U ji bo tie muug i, g maad muudm. 23 Wan yaan gbenn u tuonn dana jaanddeciɛɔnŋ n ninŋ, k u kun ŋaag. 24 L puol po, k u ŋaapuo Elisabɛt suol puol, g wuon dieog n ŋmaali yinmu. U bo mali u pal n ninŋ: 25 « Yonmdaan n yaan tien yal nba n nyan n po: mɔlane u diid’n yen nunmanŋ, g nyan’n fai n ninŋ niib buol. » 26 Elisabɛt n suol puol, l ŋmaali yinluob po i, g Yendu sun malɛg Gabriɛl, k wan gad Galile doug nne ninŋ, k b yi Nasarɛt. 27 U bo sun’o sipaan nne buol i, k b yi’ug Mari, k u tie Dafiid cugl n jua nne sikpenŋ. B bo yi l jua Sosɛf i. 28 G malɛg kua Mari buol, g maad’o: « A pal ń gii man, fin i g Yendu tie’a ŋalbalg nba g mɔg l liel. Yonmdaan be yen’a. » 29 Mari n yaan gbad nnyan, k u yam ŋmad, k u mali l maam niimn. 30 G malɛg maad’o: « Mari, daa jie, k l maa Yendu tie’a ŋalbalg nba g mɔg l liel. 31 A bu suol puol g mal bijabg, g pul’o Yiesu. 32 U tan baa tie nicinŋl i, ban gii yi’ug Yendu Badciɛn Bija. Yonmdaan Yendu bu te’og u yaaja Dafiid badkog, 33 wan gii tie youg kul Sakɔb buolu bad, yua k u bal kan ban g gbenn. » 34 G Mari maad malɛg: « L bu tien nle i, k n yen g ban jua i ? » 35 G malɛg ŋmiɛn’o g maad: « Foŋanm bu jiid a po, g Yendu Badciɛn paalu ń kua a ninŋ. L yaa po n te g yua nba k a bu mal’o ne baa tie niŋan, gii yi Yendu Bija. 36 I ban k a naataanu Elisabɛt mɔ pil bijabg, ŋmaali yinluob n nyan, g yen ciɛnd o, wano nba k b yi’ug ŋɔlg, 37 k l maa baa siɛl g be g paa Yendu po. » 38 G Mari maad: « N tie Yonmdaan tuonsunn i. Lan tien n po nyan ŋan maad nand. » G malɛg ji cab’o. 39 L dana n ninŋ g Mari fiil g ŋmaa tonm, g gad doyenu nne ninŋ k l be Suude jɔa n ninŋ, 40 g kua Sakari ŋaag, g fuond Elisabɛt. 41 Elisabɛt n yaan gbad Mari fuondi, k u big kpanm u tug n ninŋ, k Elisabɛt gbie yen Foŋanm, 42 g ji tand yen paalu g maad: « Yendu yad u yedŋanm a po g cie puob kul, g biɛ yad u yedŋanm a tug n big mɔ yaa po. 43 L tien nle i, k n Yonmdaan naa baal n buol i ? 44 Diid, a fuondi n baa n tubl n ninŋ youg nba, k n big kpanm n tug n ninŋ. 45 Pamann tie a yal i, fin nba tuo g gaal g Yonmdaan n maad’a yal nba bu tien yen mɔni. » 46 G Mari maad: « N dond Yonmdaan yen n pal kul, 47 k n pal ŋanm g man g dugn Yendu n Fietua po, 48 k l maa u juog u tuonsunn nba k b g yi’ug siɛl. L yaa po, niib kul ji baa pag’n youg kul, 49 k l maa Paaciɛnudaan tien n po ŋanm nba yab. U sann ŋan. 50 U diid yen nunmanŋ youg kul yab nba cɔlm’o. 51 U ŋɔn u paalu, g yaan jagbeldanm. 52 U fiin batieb b kogi po, g don yab nba k b g yi’b k b tie siɛl. 53 U tien taladdanm ŋanm bonciɛnn, g bel ŋalmandanm yen nuukuoni. 54 U tebl Israyɛl yab, u tuonsunna. U g sunm ŋanm nba k u tien 55 Abraham yen u yaabuona po, nyan wan bo puon t yaajanm nand, k l ŋanm g mɔg juog. » 56 G Mari tien nyan ŋmaali ntaa nyan Elisabɛt buol, g lebd g kun ŋaag. 57 Elisabɛt mad daal n yaan pund, k u mal bijabg. 58 U kunkuanyuag‑nba yen u naataani n yaan gbad Yonmdaan n tien ŋanm nba u po, k b mɔ yaa pala manŋ. 59 Daa ŋanniin daal, k b baal k ban kɔnd big. B bo bua ban pul’o Sakari, nyan u baa nyan i, 60 k u naa gaal maam g maad: « N n, b baa yi’ug San i. » 61 K b maad’o: « Sua g be i ŋaag n ninŋ g yi nnyan. » 62 K b bual u baa muudm n ninŋ, k u bua ban gii yi big nle i ? 63 K u te k b tie’og kalagl, k u diɛn l po: « U sann n tie San. » K l yaa g lid b kul. 64 L youg mɔno, k u lanm tabd, k u ji fid g maad g pag Yendu. 65 G jiwaani kua u kunkuanyuag‑nba kul, k l maam yad dingbana kul nba be Suude jɔa n ninŋ. 66 Yab nba kul bo gbad l maam, bo bil b pala n ninŋ i g bual b kua: « L big tan baa tie ŋmaa yaa a ? » Mɔni, Yonmdaan paalu kon bo be yen’o. 67 K u baa Sakari gbie yen Foŋanm, g maad Yendu lanbona ne: 68 « Ban gii dond Yonmdaan, Israyɛl Yendu, k l maa u gɔnn u buolu g fiel’o. 69 U te k t paaludaan, yua n tie t Fietua, nyiɛ u tuonsunn Dafiid cugl n ninŋ, 70 nyan yaa youg po Yendu sogni‑nba n yaan bo maad nand nyan. 71 B bo maad k wano n bu fiel’ti t ninnanda nui n ninŋ, yen yab nba kul g bua k b la’ti yen ninbinn. 72 Nnyan i g Yendu tien t baa‑nba ŋanm, g tiɛd u dɔnnu po, 73 lan tie puoni nba k u bo puon t yaaja Abraham, 74 k u bu nyan’ti t ninnanda nui n ninŋ, k tin gii suun u tuonn g ji daa jie siɛl, 75 gii tie papiendanm yen mɔnkundanm u nunŋ n ninŋ daal kul. 76 Fin, sanpandg ne, b bu yiin’a Yendu Badciɛn sogni i, k l maa a bu gaal Yonmdaan liig, g ŋanm u sɔni 77 k u buolu ń fid g bann k b biid bu piin k ban la fielu, 78 g dugn t Yonmdaan bua’ti g biɛ jie’ti ninbaaɔg. U bu te yinyiem ń nya polu po gii naan nyan yendupudkaɔg yinyiem nyan, 79 g baal g fand yab be bunbɔnn n ninŋ yen kuum fiɛl n ninŋ g ŋmagd’ti laafiɛ sɔnu n ninŋ. » 80 L big nuan bo kped, k u yam pugd. U bo tan gad g be tinkuonŋ n ninŋ i, saa yen daal nba k u ŋɔn u kua Israyɛl buolu.
