1 Min Suud, n tie Yiesu Kristo tuonsunn i, g biɛ tie Saak ninja. N da kadaaɔg ne, g tien yinm nba k t Baa Yendu yiin’i, g bua’i, g biɛ te g Yiesu Kristo guu’i. 2 Yendu ń jie’i ninbaaɔg, gii bua’i bonciɛnn g biɛ te k i yam ń gii dua buga. 3 N dɔnn‑nba, n pal daan kɔn bonciɛnn yen k n diɛn’i t kul fielu po, ama mɔlane, n la k l ji tie mabl i n po, k min diɛn’i g paan i pala, k i kɔn yin dug Laabamann nba nyan po, Laabamann nba g Yendu bo tie u niib yenm kua nyan. 4 G dugn nisiɛb wuon g kua i siign ninŋ g g jie Yendu, g lebd laabaal nba ŋɔnŋ t Yendu ŋalbalg niimn k ban fid gii tie b gbannand n bua yal nba. B tie nnyan i g yied Yiesu Kristo, wano kukua nba tie t Canbaa g biɛ tie t Yonmdaan. B bo tuod g diɛn l biiddanm tubdadu po Yendu Kadaaɔg n hal k l wai. 5 Min bua n maad’i yal nba ne, n ban k i ŋanm g ban l kul. Ama n bua k n guan g tiɛd’i g Yonmdaan n bo nyan u buolu yonmd n ninŋ Esipt doug n, l puol po u bo te g yab yie g g dug u po kul biɛl. 6 Tiɛd man malɛg‑nba nba bo yie g Yendu n tie’b yikod nba g dagd b po, g nyɔl b binbebuol g yaad, g Yendu suol’b g lol’b, k b baa luol youg kul bunbɔncild n ninŋ, g guu digbenŋl daal nba g Yendu bu bu buud. 7 Sɔdɔm yen Gomɔr doi yen doi nba kpiɛ’b nyan niib mɔ bo sun nnyan i. L doi niib bo tug b yul g kun yen cunconm i, g ŋaa k ban gii dua yen puob o g dua yen jab. L po n te g Yendu dad l doi n niib tubl, k b be muu nba so g kan ban g junn n ninŋ. Niib kul bu la l buol i g cegd. 8 Yen l yaa kul, l niib mɔ biɛ l suun nnyan i, g diɛ b danŋd g suun yen tuonn k l kuand b gbannand jɔgnd n ninŋ, g nund Yendu yikod, g biɛ sugd malɛg‑nba nba be polu po g mɔg yudand. 9 Baa malɛg‑nba kul bad Miisiɛl mɔno, youg nba k wano yen Sitaan bo kɔn Moyis gbannand po, u bo g tuo g jiɛl u buud g sugl’o. Ama u bo maad’o g Yonmdaan ń dad u tubl. 10 G nyaan l niib nuan sugd ban g ban yal nba i. Ban biɛ mɔg banm nba mɔ tie bonkobd banm i, maalm g be l n. Lann n biɛ kuand’b muaɔg. 11 Fala bu gbad’b, k l maa b ŋmaa Kayɛn taabuod n, g ligbuam po k b kua tudm n ninŋ nyan Balaam nyan, g fiil g yie Yendu po nyan Kore nyan, g mɔ biɛl. 12 I gii taan g bu di jied, banm n tu ŋmad i naataanjedinu. B tu mali b kua po i, g mɔ k b gbanfiɛd ń gbie, g g jie fai. B tie nyan tawalgband nba g faalu tu piend k l yen g baad yen taag nyan i. B tie nyan tiidi nba g luon b lonyoug nyan i, tiidi nba k b figd’b k b kpe canyiin nyan. 13 B ŋɔnŋ b tuonjɔgna nba mɔg fai naan kul, nyan mɔgl nyunguona nba paa n tu tug jɔgnd g lu bɔngbann nand nyan i. B tie nyan ŋmaabid nba ŋaa b sɔnu g bund g sonm g Yendu bobn yiɛl g guu’m bunbɔncild n ninŋ, k b ji baa be l n ninŋ youg kul nyan i. 14 Lan cil t yaajacincinn Adam saa yen Enɔk, tuanu tuanu yaajanm n ninŋ, Enɔk tua munlile po i. Wano n bo liid g maad l niib po k nne: « Yonmdaan n baad yen u malɛg‑nba tudbanm nyan, 15 g bu bu ŋanduna niib kul, buud ń di niib nba kul g cɔln Yendu, g dugn ban sun tuonbiid nba yen ban maad mabiid nba kul u po. » 16 L niib buln buln kua i, g fabn b kua po, g tie b yam n bua yal nba. B tie niib nba maad jipaamaam i, g biɛ tu manŋ mɔb g kpaan b yul po nyuad. 17 Ama yinm, n dɔnn‑nba, tiɛd man t Yonmdaan Yiesu Kristo sundi n bo liid g maad’i yal. 18 B bo maad’i: « Dijijuog dani n ninŋ niib baa laa’i nii. B baa tie b yam n bua yal nba i g yie Yendu yal. » 19 I la l niib ii, banm n baad yen paadu Kristo‑yab siign. B mɔg nisaal maalm i, Yendu Fuom g be b ninŋ. 20 Ama yinm n dɔnn‑nba, yin gaal Laabamann nba Yendu buol nyan, nyii man l po gii saa liig i dindann n ninŋ, gii jaand yen Foŋanm paalu. 21 Yendu n bua’i buam nba nyan, i be man l buam n ninŋ, gii guu k t Yonmdaan Yiesu Kristo bu te’i miɛl nba kan ban g gbenn g dugn u pasiɛdug po. 22 Yab nba mali munle-le yin jie’b ninbaaɔg, 23 siɛb mɔ be k i bu fid g fiel’b g nyan’m muu n ninŋ. Lieb mɔ, yin jie’b ninbaaɔg ama gii ban i kua po, g daa nagd’b g dugn b tuonbiid jɔgn baa b tiɛd mɔno u. 24 Tin gii dond man Yendu, wano nba bu fid g guul’i k i kan baa bignn n ninŋ, g biɛ te yin nagn naan k u be yen u yudand nyan yen pamanciɛnn g daa mɔg siɛl yaa biid. 25 Wano nba tie Yenduyeno kua g fiel’ti t Yonmdaan Yiesu Kristo po, yudand yen paaciɛnu yen yikod tie u yal i youg nba pend yen mɔlane yen youg nba baad. Amɛnn.
