San 9

1Yiesu bo paa sɔnu po, g tan la jua nne k b bo mal’o k u tie juan. 2K u ŋuantieb bual’o: « Canbaa, l tien nle i k b mal jua ne k u tie juan i ? Wano n tien biid bii u danm i ? » 3G Yiesu ŋmiɛn’m: « U biid po kaa, l biɛ g tie u danm yal mɔ. L bo tien nnyan g niib ń la u buol i Yendu tuona. 4Min daa be yensiig n ne, l tie k min sun yua nba sun’n tuona i. Nyiɛɔg baad, sua ji tan kan fid g sun siɛl. 5Min daa be ŋanduna n ninŋ ne, n tie ŋanduna yinyiem i. » 6Yiesu n maad nnyan g gbenn, k u sii mɔsand tinŋ n ninŋ g buun tand yen l mɔsand, g faan juan ninbina. 7Lann i g maad juan: « Gad g daan faal Silowe nyuncinn n ninŋ. » (Silowe niimn tie sundu.) G juan gad g faal, g nyiɛ l buol, g ji nyuan. 8K u kunkuanyuag‑nba yen yab nba daan tu nyuan’o k u miɛd nyan ji maad: « U ne kaa daan tu l kal g miɛd ii ? » 9G yenm yed k wano i, g lieb yed k wano kaa, k b naan i. G yua bo nyuand nyan maad: « Min i ». 10K b bual’o k l tien nle i k u nyuand i ? 11K u ŋmiɛn: « Jua nba k b yi’ug Yiesu nyan n buun tand g faan n ninbina, g maad’n k n gad g daan faal Silowe nyuncinn n ninŋ. K n gad g daan faal g ji sua k n nyuan. » 12K b bual’o k l jua be lɛ ? K u ŋmiɛn’m k u g ban. 13K b tug jua nba daan tu tie juan nyan g gad yen’o Farisiɛn-nba buol. 14Yiesu n bo buun tand g faan juan ninbina k u nyuand yaa daal nyan bo tie Saaba daal i. 15L po n te g Farisiɛn-nba mɔ bo bual l jua lan tien nand k u ji nyuan. K u maad: « U buun tand i waam nne g faan n ninbina k n gad g faal, g ji nyuan. » 16G Farisiɛn-nba ninŋ yenm yed g yua nba sun l tuonn g tie Yendu nil kaa, g dugn u g cɔln Saaba daal kual. G lieb yie g biiddaan kan fid g sun yaa yaalidug tuona ne. K b paad caga ŋanle. 17G Farisiɛn-nba biɛ bual jua nba bo nyuand nyan: « Fin mɔno a mali bɛ i yua nba te k a nyuand ne po i ? » K u ŋmiɛn: « U tie Yendu sogni i. » 18Suif‑nba yudanm bo g tuo yen mɔni g jua ŋano bo tu tie juan i, g ji tan nyuand. Lann i k b sun g yiin u danm g bual’b: 19« Yen mɔni i g jua ne tie i big ii ? K u bo mal g tie juan ii ? L tien nle i k u ji nyuan i ? » 20K l jua danm ŋmiɛn: « T ban k u tie t big, k u bo mal g tie juan. 21Ama t g ban lan tien nand k u ji nyuan mɔlane. T biɛ g ban yua nba te k u nyuand mɔ. Bual’o man a, u yen ji g tie big kaa, u bu fid g maad u kua. » 22L jua danm bo maad nnyan g dugn b bo jie Suif‑nba yudanm i. Suif‑nba yudanm bo tuod g bobn g yua nba kul bu sed g maad g Yiesu tie Kristo, b bu nyan’o b tintaann dieog n ninŋ i. 23L po n te k u danm bo maad k u ji g tie big kaa, k ban bual’o. 24G Farisiɛn-nba biɛ guan g yiin juan nba bo nyuand nyan g maad’o: « Jie Yendu g maad mɔni, tinm yen ban g jua ŋano tie biiddaan i. » 25K u ŋmiɛn: « Wan tie biiddaan ii, wan g tie biiddaan ii, min g ban. Ama n ban bonyenn kua i, n daan tu tie juan i, mɔlane n ji nyuan. » 26K b bual’o: « U tien’a bɛ i ? U tien nle i k a nyuand i ? » 27K u ŋmiɛn’m: « N bo maad’i l kul o. Bɛ po i k i g cenŋ i ? Bii i mɔ bua yin te u ŋuantieb yaa aa ? » 28K b sugd sugd’o g maad: « Fin n tie u ŋuantua, tinm tie Moyis ŋuantieb i. 29T ban g Yendu bo maad yen Moyis, u ne nuan, t taan g ban wan nyiɛ naan mɔno. » 30G jua ŋano ŋmiɛn’m: « To, yal nba mɔg yaalidug n nyan a, i yed k i g ban wan nyiɛ naan buol, ama k u yen te k n nyuand. 31T ban g Yendu g cenŋ biiddanm. U cenŋ yua nba cɔlm’o, g tie wan bua yal i. 32Sua daa g ban g gbad, g nil te g yua nba mal g tie juan nyuand. 33Jua ne bo gii g nyiɛ Yendu buol, u bo kan fid g tien siɛl. » 34K b ŋmiɛn’o g maad: « Fin mal yen biid i a munn kul, g mɔ ji mɔg biɛ cegli i g bu te’ti nii ? » Lann i k b bel g nyan’o b tintaann dieog n ninŋ. 35Yiesu bo gbad k b bel’o. Lann i k u gad g la’ɔg g bual’o: « A dug Nifosaal Bija po ii ? » 36K u maad: « Canbaa, maad’n wan tie yua nba, k n gii dug u po. » 37G Yiesu maad’o: « A la’ɔg o, wano n taan maad yen’a ne mɔno. » 38K l jua maad: « Yonmdaan, n dug a po. » Lann i g gbaan g pug Yiesu. 39G Yiesu maad: « N baal ŋanduna n ninŋ k n bu buud i, g yab nba tu g nyuan ń nyuand, yab nba tu nyuan mɔ ń te juanm. » 40Farisiɛn-nba ninŋ siɛb bo be yen’o, g gbad wan maad yal, g bual’o: « T mɔ tie juanm yaa aa ? » 41G Yiesu ŋmiɛn’m: « I bo gii tie juanm, i bo kan gii mɔg biid. Ama yin yed k i nyuan nyan, i biid baa l be i. »

will be added

X\