San 6

1L puol po, g Yiesu puod Galile mɔgl g gad bɔngbanliel po. L mɔgl i k b biɛ yi Tiberiad. 2G niwulug ŋuan’o g dugn niib bo laad yaalidug bona nba k u bo tie g paagd yiɛnm. 3G Yiesu yen u ŋuantieb duo jual po g kal. 4L bo sua g Suif‑nba fielu jaanm nba k b yi Pak nyan nag o. 5Ban be jual po nyan, g Yiesu ŋaand ninbina g sua g niwulug ŋann baad u buol, k u bual Filiip: « T bu daa jied lɛ i, niib ne kul ń la g di i ? » 6Yiesu bo maad nnyan g bua k wan bign’o i, u bo tuod g ban wan bu tien yal nba. 7G Filiip ŋmiɛn’o: « T gii tug dibala kobiinle mɔno g daa kpanu, g tie sua kul baa kpanu jenn, l kan pund biinu. » 8Lann i k u ŋuantieb n ninŋ, yua nba bo tie Simɔn Piɛr ninja, k b bo yi’ug Andre nyan maad’o: 9« Naasenbig nne be ne g diɛ kpanu ŋanmu yen jani nle. Kpanu ŋanmu yen janbid ŋanle bu tien niwulug ne bɛ ? » 10G Yiesu maad: « Te man k ban kal. » L sua g muaɔg be l buol g yab. K b te g niib kul kal l po. B bo g luol jab tuda ŋanmu. 11G Yiesu gaal l kpanu g tien Yendu balg, g biid niib nba k u bo te k b kal nyan. G biɛ gaal jani mɔ g tie’b, g yua kul gaal wan bua nand. 12Ban dii g buo yaa youg, k u maad u ŋuantieb: « Taan man bonjena nba tenn kul g daa ŋaa siɛl ń biɛl. » 13K u ŋuantieb wod ban bo ŋman kpanu ŋanmu g tenn bonjena nba, g gbien kpancubd piig yen ŋanle. 14Niib n yaan la yaalidug bonn nba k u bo tien, k b maad: « U ne n tie Yendu sogni nba bo bu baal ŋanduna n ninŋ. » 15Yiesu n bo bann k b bu baal g nyii’ug g din’o bal nyan, k u nyiɛ l buol g guan g duo jual po u kukua. 16Daajuoug bo tan baal k u ŋuantieb jiid mɔgl kunŋ, 17g kua ŋadunŋ g fiil g bu puod bɔngbanliel po g gad Kafarnawunm. L bo tan bɔnn g Yiesu daa l g ŋuan’m. 18G faalu tan kpid mɔgl po yen paalu g fiind nyunguona. 19B bo kud ŋadunŋ g fagd, g tien nyan taabana tuda ŋanmu lann i kaa ŋanluob nyan yo, g tan sua g Yiesu sonm nyum po g nagd ŋadunŋ buol. G jiwaani kua’b. 20Lann i g Yiesu maad’b: « Min i, daa jie man siɛl. » 21K b yam duan, k b kuan’o b ŋadunŋ n ninŋ nne, b sua g ŋadunŋ ji be bɔngbann i, ban bo saa naan buol. 22L siŋaaɔg po, g niwulug nba won tenn bɔngbanliel po nyan tiɛd g ŋadnyeonŋ kua n won be, g Yiesu won g kua l ŋadunŋ n ninŋ yen u ŋuantieb, k u ŋuantieb kua n won kua l ŋadunŋ g yaad. 23L siŋaaɔg n, g ŋadnlied nyiɛ Tiberiad po g baal naan buol nba g Yonmdaan won tien Yendu balg kpanu po k b ŋman nyan. 24Ban yaan la g Yiesu yen u ŋuantieb kul sua g be l buol nyan, k b kua l ŋadnd g gad Kafarnawunm g daan bu kpaan Yiesu. 25B bo puod bɔngbanliel po i g ji la’ɔg g bual’o: « Canbaa, a pund ne buol bɛ youg u ? » 26G Yiesu ŋmiɛn’m: « Yen mɔni n maad’i, yaalidug bona nba k i won la po kaa te k i kpaan’n, i kpaan’n g dugn kpanu nba k i won ŋman g buo nyan po i. 27Daa suun man tuona jied nba bu biil po kaa, i suun man miɛl nba g mɔg gbennu jied po, jied nba g Nifosaal Bija bu te’i, g dugn t Baa Yendu n cab’o mɔb. » 28Lann i k b bual’o: « T bu tien nle i gii suun Yendu n bua yal nba i ? » 29G Yiesu ŋmiɛn: « Yendu n bua k yin sun yal nba tie k yin gaal wan sun yua nba, gii dug u po i. » 30K b guan g bual’o: « A bu tien bɛ yaalidug bonn i, tin la gii dug a po i, a bu sun bɛ tuonn i ? 31T baa‑nba n bo be tinkuonŋ n ninŋ yaa youg, b bo dii jied nba k b yi mann. L diɛn Yendu Kadaaɔg n nnyan i: “ U bo tie’b jied nba nyiɛ polu po i k b dii ”. » 32G Yiesu guan g maad’b: « Yen mɔni n maad’i, Moyis kaa bo tie’i jied nba nyiɛ polu po, n Baa n tien’i jied nba nyiɛ polu po, lann n tie jemɔnd, 33g dugn Yendu jied tie yal nba nya polu po g tien ŋanduna niib miɛl i. » 34Lann i k b biɛ maad’o: « Canbaa, i tien’ti l jied youg kul. » 35G Yiesu maad’b: « Min n tie miɛl jied. Yua nba baal n buol, kom ji kan ban g suol’o. Nyunnyuglu mɔ kan ban g suol yua nba dug n po. 36Min yen tuod g maad’i no ; i la’n g yen g dug n po. 37N Baa n tie’n yab nba kul bu baal n buol. Yua baal n buol mɔ, n kan ban g yie’og ; 38k l maa n g nyiɛ polu po g jiid k n tien min bua yal nba kaa, n jiid k min tien yua nba sun’n nyan n bua yal nba i. 39Yua nba sun’n nyan n bua yal nba n ne: U bua k wan tie’n yab nba kul, min daa buon sua, k min yied b kul dijijuog daal. 40Yen mɔni, n Baa n bua yal n nyan: G nil nba kul la u Bija n tie yua nba, g dug u po, l daan ń la miɛl nba kan ban g gbenn, k n tan yied’o dijijuog daal. » 41G Suif‑nba ji buln, g dugn wan bo maad k wano n tie jied nba nyiɛ polu g jiid nyan po. 42G ji buln g tua: « U ne g tie Sosɛf bija Yiesu kaa aa ? Tinm ban u naa yen u baa, k l tien nle i k u ji tua k u nyiɛ polu po i, g jiid i ? » 43G Yiesu ŋmiɛn’m g maad: « Daa buln man i ŋmiɛl n ninŋ. 44Sua kan fid g baal n buol, l gii g tie k n Baa nba sun’n i kaa dad’o g baal yen’o n buol. Yua baal n buol kul, n tan bu yied’o dijijuog daal. 45Yendu sogni‑nba kadaaɔg n ninŋ, l diɛn g maad: “ Yendu bu fand b kul. ” Nil nba cenŋ n Baa Yendu n maad yal, g biɛ gaal u tundl, l daan bu baal n buol. 46L g bua n maad g sua ban g la n Baa Yendu kaa. Yua nba nyiɛ Yendu buol kukua n ban g la’ɔg. 47Yen mɔni n maad’i: Yua nba dug n po, u la miɛl nba kan ban g gbenn n nyan, 48k l maa min n tie miɛl jied. 49I baa‑nba n bo be tinkuonŋ n ninŋ yaa youg, b bo dii jied nba k b yi mann, ama b yen bo tan l kpe i. 50Jied nba ne n nyiɛ polu po g jiid, g yua nba dii l jied wan daa kpe. 51Min n tie jied nba fo, g nyiɛ polu po g jiid. Yua nba dii l jied, u baa fo mɔlane saa yen youg nba g mɔg juog. Min bu te jied nba tie n gbannand i. N bu te l jied, g ŋanduna niib ń fid gii mɔg miɛl i. » 52L maam po, g Suif‑nba yaan ji gag yen lieb g maad: « U ne bua n tien nle i g te’ti u gbannand tin ŋman i ? » 53Lann i g Yiesu ŋmiɛn’m: « Yen mɔni n maad’i, i gii g ŋman Nifosaal Bija gbannand g biɛ nyuu u sɔm, i kan gii mɔg miɛl i ninŋ. 54Yua nba ŋman n gbannand g biɛ nyuu n sɔm, wano n mɔg miɛl nba kan ban g gbenn. N tan bu yied wano i, dijijuog daal. 55G dugn, n gbannand n tie jied yen mɔni, k n sɔm mɔ tie bonnyukal yen mɔni. 56Yua nba ŋman n gbannand g biɛ nyuu n sɔm, u be n ninŋ k n mɔ be u ninŋ. 57N Baa nba sun’n fo, k n mɔ fo g dugn u po. Nnyan yua nba ŋman n gbannand mɔ baa fo g dugn n po i. 58Jied nba nyiɛ polu po g jiid n nyan. L g tie i baa‑nba n bo dii yal nba g yen tan kpe nyan kaa. Yua nba dii yaa jied ne nuan, u baa l mɔg miɛl i youg kul. » 59Yiesu bo maad l bona kul ne, yaa youg nba k u bo tund niib Suif‑nba tintaann dieog n, Kafarnawunm doug n ninŋ i. 60Yiesu ŋuantieb n gbad u maam, k b ninŋ bonciɛnn ji maad: « Maam ne paa, ŋmaa n bu fid g cenŋ i ? » 61G Yiesu mɔno bann k u ŋuantieb buln b ŋmiɛl n l maam po. Lann i k u maad’b: « L maam ŋmad i yam yaa aa ? 62K i ji tan gii la g Nifosaal Bija guan g duo wan bo kpiɛ g be naan buol i ? 63Yendu Fuom n tien miɛl, nifosaal g tie siɛl. Lanbona nba k n maad’i ne tie Yendu Fuom yal i, g biɛ tie miɛl. 64Ama siɛb yen be i ninŋ ne, g g gaal k l tie mɔni. » Yen mɔni, hal cilg youg yo, k wano Yiesu bo tuod g ban yab nba g dug u po yen yua nba bo bu kuad’o. 65G Yiesu pugn lann i g maad: « L po n te k n maad’i g sua kan fid g baal n buol, k n Baa g cab’o. » 66Lan cil l daal, k u ŋuantieb bonciɛnn ji sud g gɔ puol, b ji bo g yegd yen’o. 67Lann i g Yiesu bual u sundi piig yen banle ŋann: « K yinm i, i mɔ bua n yad yaa aa? » 68G Simɔn Piɛr ŋmiɛn’o: « T Yonmdaan, t mɔ mɔg ŋmaa g saa u buol i ? A maam n tien miɛl nba kan ban g gbenn. 69K t mɔ tuo g gaal yen mɔni, k fin n tie Yendu niŋan. » 70G Yiesu guan g ŋmiɛn’m: « Min kaa lugd yinm piig yen banle ne ii ? Ama i ninŋ ne, yend yen tie Sitaan yua i. » 71U bo maad Suuda i, Simɔn Iskariyɔt bija. Wano n bo bu kuad Yiesu g mɔ yen bo tie u sundi piig yen banle ŋann n ninŋ yend.

will be added

X\