San 5

1L puol po i g Suif‑nba jaanm nne bo be, g Yiesu gad Serusalɛm. 2Serusalɛm mɔg nyunpindbuol nne k b yi Ebro‑nba maam n ninŋ g Bɛtɛsda. L kpiɛ yen Pei dimɔb i, g ciɛd tinmu nne mɔ be l kunŋ k b liɛ l polu po. 3Yiɛnm bonciɛnn bo be l ciɛd n ninŋ. Siɛb bo tie juanm, g lieb tie diɛni, g lieb mɔ yaa titala yen b nui kul kpe. [B bo tu guu g nyum ń danm i, g dugn 4Yonmdaan malɛg bo tu be be g tan jiid l nyunpindbuol g danm nyum. U gii danm nyum yaa youg g yiɛn nba cind g jiid l nyum n ninŋ, u gii yiɛl baa yiɛlbuolu nba, u bu paag i.] 5L sua g jua nne be l buol g yiɛl hal bina piintaa yen ŋanniin n nyan. 6Yiesu n la’ɔg k u dua l buol, g biɛ bann k u wai l buol, k u bual’o: « A bua k a paag ii ? » 7G yiɛn ŋann ŋmiɛn’o: « Canbaa, n g mɔg sua k u bu yugd’n g jiin’n nyum n ninŋ lan tu danm yaa youg. N tu yed k min gad nne g sua g lua liid’n g jiid o. » 8G Yiesu maad’o: « Fiil, tug a dunduanu gii saa. » 9L youg g jua ŋann paag, g fiil g tug u dunduanu g paan g saa. L daal bo tie Saaba daal i. 10G Suif‑nba yudanm maad jua nba bo paag nyan: « Dinne tie Saaba daal i, l g cab k a gii tug a dunduanu. » 11K u guan g ŋmiɛn’m: « Yua nba te k n paag nyan n maad’n k min tug n dunduanu gii saa. » 12K b bual’o k l daan tie ŋmaa i g maad’o k wan tug u dunduanu gii saa i ? 13Jua nba bo paag nyan bo g ban yua bo te k u paag. Niib n bo yabd l buol nyan, g Yiesu kua niwulug n ninŋ k u ji g la’ɔg. 14L puol po i, g Yiesu tan la’ɔg jaanddeciɛɔnŋ n ninŋ g maad’o: « N tua a la waa, a paag n nyan, ji daa fann g tien biid, g siɛl yaa bonbiiug ń tan daa baal’a gii cie cincinn yal. » 15G jua ŋann gad g maad Suif‑nba yudanm g Yiesu n paag’o. 16L po n te g Suif‑nba yudanm ji bo cil g kɔn yen Yiesu g dugn u bo sun l tuona Saaba daal i. 17Lann i g Yiesu kɔn u kua po g maad’b: « N Baa daa l suun tuonn i saa yen mɔlane, k n mɔ suun. » 18L po n te g Suif‑nba yudanm ji bo ŋanm g kpaan k ban kpi’ug mɔno. G dugn l g tie k u bo tien Saaba daal yiko n g cab yal nba kua kaa, ama wan biɛ bo yed g Yendu tie u Baamad nyan, u bo bua n ŋɔn k wano yen Yendu kul ji ja n nyan. 19Lann i g Yiesu gaal maam g maad’b: « Yen mɔni n maad’i, Yendu Bija kan fid g tien siɛl u yul po, k l g tie k u la u Baa buol. Ama u Baa n suun yal nba kul, u mɔ suun lann i. 20G dugn Yendu bua u Bija, g ŋɔnŋ’o wan suun yal nba kul. U biɛ bu ŋɔn’o tuona nba yab g cie yin la yal ne, lan yaa g lid’i. 21Nyan Yendu n yied kpienm g tien’m miɛl nyan, u Bija mɔ tie nnyan i, wan bua yua i k u tien’o miɛl. 22Yendu biɛ g bu sua mɔ, u tug buud kul g cab u Bija i ; 23g niib kul ń gii cɔln u Bija nyan ban cɔln wano Yendu nand nyan. Yua nba g cɔln Yendu Bija, lann u g cɔln wano Yendu nba sun’o i. 24Yen mɔni n maad’i, yua nba gbad n maam g dug yua nba sun’n po, l daan la miɛl nba kan ban g gbenn n nyan. U kan kua buud n ninŋ. Wano nyiɛ kuum n ninŋ g kua miɛl n ninŋ n nyan. 25Yen mɔni n maad’i, youg baad, l youg taan pund o, g kpienm bu gbad Yendu Bija niɛlu. Yab nba bu gbad l niɛlu, b bu la miɛl. 26G dugn Yendu n tie miɛl daan nyan, u te k u Bija mɔ tie miɛl daan i ; 27g cab’o mɔb k wan bu buud, g dugn u tie Nifosaal Bija i. 28Lan daa tie yaalidug kaa i po ; youg baad g yab nba be kakula n ninŋ kul tan bu gbad u niɛlu, 29g nya. Yab nba tien ŋanm bu yied g la miɛl, g yab nba tien biid mɔ ń yied ban bu’b. » 30Min kan fid g tien siɛl n kukua. N gbiɛ Yendu n maad’n nand i, g bu buud. K n buud biɛ tie mamɔni buud g dugn, n g kpaan k n tien min bua yal kaa, n kpaan k n tien yua nba sun’n yanbuam i. 31L gii tie k n kun mɔni n kukua po, n mɔnkund g tie mɔni. 32Ama nifan n kun mɔni n po k n ban k l daan mɔnkund tie mɔni. 33I sun niib San buol, g San kun mɔni mamɔni po. 34Min nuan g kpaan nifosaal n kun mɔni nba kaa, n maad k yin fid g la fielu i. 35San bo tie nyan fidl nba k b tu son lan gii so g fand niib nyan i ; k i tuo k u fand’i waam k i pala manŋ. 36Min n yen mɔg yal nba, l cie San mɔnkund. G dugn, n Baa n tie’n tuona nba k n sun, k n kon suun nyan, l tuona mɔno n ŋɔnŋ k wano n sun’n. 37N Baa nba sun’n, wano n kun mɔni n po. I g ban g gbad u lantɔug, i g ban g la u nunŋ, 38i biɛ g diɛ u maam mɔ i pala n ninŋ, g dugn yua nba k u sun’o nyan, i g dug u po. 39I fiid diɛni nba be Yendu maam Kadaaɔg n ninŋ, g dugn i mali k l n ninŋ i, k i bu la miɛl nba kan ban g gbenn. L diɛni maad n yaa po i. 40K i biɛ l g tuo k yin baal n buol g la miɛl. 41Min g kpaan niib pinpagd kaa. 42N ban yin tie yab nba. I pala n ninŋ, i g bua Yendu palb. 43N baal n Baa sann po i, k i g gaal’n. Ama nifan gii baal wano mɔno sann po, i bu gaal’o i. 44I kpaan pinpagd i lieb buol i, i g kpaan pinpagd nba nya Yendu buol, wano nba tie Yenduyend. L bu tien nle i yin gii dug n po i ? 45Daa mali man k min n bu jalg’i n Baa buol. Moyis n bu jalg’i, wano nba k i tug i dindann kul g tien u ninŋ. 46G dugn i bo gii gaal Moyis maam, i bo bu gaal n mɔ yaa maam, k l maa wan diɛn yal nba, l maad n po i. 47K yin g tuo g gaal wan diɛn yal nba nyan i, l bu tien nle i yin tuo g gaal n maam i ?

will be added

X\