San 3

1Jua nne bo be k b yi’ug Nikodɛm. U bo tie Farisiɛn i, g biɛ tie Suif‑nba buolu n ninŋ yikodaan. 2Diyenn k u tan baal nyiɛɔg Yiesu buol g maad’o: « Canbaa, t ban g Yendu n sun’a k a gii tund niib, g dugn, sua kan fid g tien yaalidug bona nba k a tie ne, l gii g tie g Yendu be yen’o i kaa. » 3G Yiesu ŋmiɛn’o: « Yen mɔni n maad’a, b gii g guan g mal nil munle po i kaa, u kan fid g la Yendu diem. » 4G Nikodɛm bual’o: « Nil bu tien nle i ban guan g mal’o munle k u yen ciɛnd o i ? U bu fid g biɛ guan g kua u naa tug n ninŋ k wan guan g mal’o i ? » 5G Yiesu guan g ŋmiɛn’o: « Yen mɔni, n maad’a, yua nba k b g mal’o nyum yen Foŋanm malu, u kan kua Yendu diem n ninŋ. 6Nifosaal n mal yal tie nifosaal i, Foŋanm n mal yal mɔ tie Foŋanm yal i. 7N gii yed k l tie talad i k ban guan g mal’i, lan daa yaa g lid’a kaa. 8Faalu pieb wan bua naan i. A bu gbad u fuug, ama a yen g ban wan nyiɛ naan buol g bual wan saa naan. Yua nba g Foŋanm mal’o mɔ, l tie nnyan i u mɔ yaa po. » 9G Nikodɛm bual’o k l bu tien nle i g tien nnyan i ? 10G Yiesu guan g ŋmiɛn’o: « Fin tie yua tund niib Israyɛl buolu n ninŋ, g biɛ g gbiɛ l bona niimn ninŋ ii ? 11Yen mɔni n maad’a, t maad tin ban yal nba i, g biɛ kun mɔni tin la yal nba po, k i yen g tuo g gaal l mɔni. 12N gii maad yen’i tinŋ n ne bona po, k i g gaal n maam, l ji bu tien nle i min maad yen’i polu bona po yin tuo g gaal n maam i ? 13G dugn sua g ban g duo polu po, l gii g tie Nifosaal Bija nba nyiɛ polu g jiid i kaa. 14Nyan Moyis n bo don waaɔg nand tinkuonŋ n ninŋ nyan, b bu don Nifosaal Bija mɔ nnyan i, 15g nil nba dug u po kul ń la miɛl nba kan ban g gbenn. 16L kon tie mɔni i, Yendu buad ŋanduna niib hal bonciɛnn, g tan tie u Bijayenml, g yua nba dug u po kul wan daa biɛl kaa, k wan gii mɔg miɛl nba kan ban g gbenn. 17G dugn Yendu g sun u Bija ŋanduna n ninŋ k wan bu ŋanduna niib kaa, u sun’o g ŋanduna niib ń la fielu g dugn u po i. 18Yua nba tuo’og, g dug u po, buud kan di’ug, ama yua g tuo g dug u po nuan, buud tuod g dii’ug o, g dugn u g dug Yendu Bijayenml sann po. 19Wan bu bu’b yal nba po n ne: Yinyiem baal ŋanduna n ninŋ, g niib lugd bunbɔnn g ŋaa l yinyiem, g dugn b tuonbiid po. 20Yen mɔni, nil nba suun tuonbiid kul, u g bua yinyiem maam, u g baad yinyiem buol, g dugn u jie k u tuonbiid bu nya finfanm n ninŋ i. 21Yua nba suun mamɔni tuona n baad yinyiem n ninŋ, k u tuona ń ŋanm g nyuand k ban bann g Yendu taa u po u tuona nba k u suun kul n ninŋ. » 22L puol po i g Yiesu yen u ŋuantieb bo gad Suude dingbankunkogi n ninŋ, k u tien nyan daa ŋanŋaa nne l po, g wuul niib nyum. 23L sua g San mɔ be Enɔn. Enɔn bo g fag yen Salim. Nyum bo yab l buol bonciɛnn g niib baad g San wuul’b. 24L bo sua k b daa g suol San dansalg. 25G mɔniɛɔg tan tien San ŋuantieb yen Suif nne siign, biid ŋuulu bogda po. 26K b gad g la San g maad’o: « Canbaa, yua nba daan be yen’a Suurdɛn bɔnpuol po, k a daan kun mɔni u po nyan mɔ ji wuul niib i. Niib kul ji saa u buol i. » 27G San ŋmiɛn’m: « Sua kan fid g yend siɛl g Yendu g tie’og. 28Yinm mɔno, i tie n sieda‑nba, i bo gbad k n maad mii, “ Min kaa tie Kristo, min nuan b sun’n k n gaal u liig i. ” 29Yua nba kuan puo n tie puodaan. Ama puodaan dɔnn mɔ tu sie g cenŋ, u gii gbad puodaan niɛlu yaa youg u pal ń manŋ bonciɛnn. N mɔ, l tie’n nnyan i, n pal man hal bonciɛnn. 30L bual k u yaa yikod i ń gii pugd, k n yal waagd. » 31Yua nba nyiɛ polu po n cie niib kul. Yua nba tie tinŋ n yua nuan l tie tinŋ n yua i. U maad tinŋ n maam i. Yua nba nyiɛ polu po n cie niib kul. 32U maad wan la yal, g gbad yal i. Sua yen g tuo g gaal k l tie mɔni. 33Yua nba gaal u maam kon maad yen mɔni g Yendu tie mamɔni daan. 34Yua nba g Yendu sun’o, l daan maad Yendu maam i, g dugn Yendu tie’og Foŋanm nba g mɔg po. 35Yendu bua u Bija, g tug bonn kul g kubn u nuu n ninŋ. 36Daan nba dug Yendu Bija po, u baa mɔg miɛl nba kan ban g gbenn. Ama daan nba yie Yendu Bija, u kan la miɛl ; Yendu mutuol n baa ŋua’ɔg.

will be added

X\