San 20

1Laad daal siŋapanpan Magdala Mari bo gad kakul po g sua k l daa bɔn. U baal g sua g kakutann biid g dua siɛl po. 2K u san g gad g la Simɔn Piɛr yen Yiesu ŋuantelua nba g Yiesu bo bua u maam nyan, g maad’b: « B nyan t Yonmdaan kakul n ninŋ, t yen g ban ban bil’o naan buol nba. » 3G Piɛr yen ŋuantelua ŋano nyiɛ g saa kakul po. 4B kul bo siɛn i, g lua ŋano yen san g liid Piɛr g kpiɛ g pund kakul po, 5g dɔnn g la g caba dua, ama u yen g kua. 6G Simɔn Piɛr yuand g pund, g kua kakul n ninŋ g diid g sua g caba dua. 7Ama cabl nba k b bo tug g fun Yiesu yul nuan bo g be yen cablaa kaa, l bo piɛd g dua l kua i. 8Lann i g ŋuantelua nba bo kpiɛ g pund kakul buol nyan mɔ ji kua, g la g ji tuo g gaal yen mɔni. 9B daa bo g gbad Yendu Kadaaɔg n diɛni niimn. Diɛni bo maad k l tie talad i k wan yied kpienm siign ninŋ. 10G Yiesu ŋuantieb lebd g kun ŋaag. 11Mari nuan bo l sie kakul buol i g buud. Wan bo buud nyan, k u tan dɔnn k wan diid kakul n ninŋ. 12U sua g malɛg‑nba banle liɛ tiɛpiend g kal ban daan duan Yiesu naan buol nyan. G yend kal yul kpagn buol, g lua kal titala bil buol. 13G malɛg‑nba bual’o: « Puo ne, bɛ po i k a buud i ? » K u ŋmiɛn’m: « B nyan n Yonmdaan k n g ban ban bil’o naan buol. » 14Wan maad nnyan k u gbeg g sua g Yiesu sie, ama u bo g bann k wano i. 15G Yiesu bual’o: « Puo ne, bɛ po i k a buud i ? A kpaan ŋmaa i ? » Mari bo mali g yua nba guu gɔglug u, lann i g maad’o: « Canbaa, l gii tie k fin n tug’o, ŋan maad’n ŋan bil’o naan buol k n bu gad g daan juab’o. » 16G Yiesu yiin’o: « Mari. » K u gbeg g maad Ebro‑nba maam n ninŋ: « Rabuni. » L niimn tie g Canbaa. 17G Yiesu maad’o: « Daa so’n, k l maa n daa g duo n Baa po. Gad g daan la n ninjanm g maad’b k n do n Baa po n nyan, yua nba tie i mɔ yaa Baa ; k n do n Yendu po, yua nba tie i mɔ yaa Yendu. » 18Lann i g Magdala Mari gad g la Yiesu ŋuantieb g maad’b k u la Yonmdaan. G dugn’m Yiesu n maad’o yal nba. 19L laad daal daajuoug Yiesu ŋuantieb bo be ŋaag nne ninŋ, g luon g kpal gana g dugn b bo jie Suif‑nba yudanm. B tan sua g Yiesu sie b siign ninŋ, g maad: « Laafiɛ ń gii be yen’i. » 20Wan maad nnyan yaa youg, k u ŋɔn’m u nui yen u logl. K u ŋuantieb pala manŋ bonciɛnn yen ban la Yonmdaan. 21G Yiesu biɛ guan g maad: « Laafiɛ ń gii be yen’i. N Baa n sun’n nand nyan, n mɔ suun’i nnyan i. » 22Wan maad nnyan, k u pieb faam b po g maad: « Gaal man Foŋanm. 23I gii dii sugl yab nba biid po, b biid piin n nyan, i gii g dii sugl yab nba biid po mɔ, b yaa biid baa l be i. » 24Yiesu n bo baal yaa youg, l bo sua k u ŋuantieb piig yen banle ŋann n ninŋ Toma g be. B bo yi wano Toma i Didiim. 25U ŋuantelieb n bo maad’o k b la Yonmdaan. G Toma guan g ŋmiɛn’m g maad: « Min gii g la penbona u nui n ninŋ, g g suun n nuubil l penbona n ninŋ, g biɛ g suun n nuu yiɛɔg nba be u logl n nyan ninŋ, n kan ban g gaal k l tie mɔni. » 26L daa ŋanniin po, g Yiesu ŋuantieb yaan be ŋaag n ninŋ, l sua g Toma be yen’m l daal. K b yaan luon g kpal gana kul. B tan sua g Yiesu sie b siign ninŋ, g maad: « Laafiɛ ń gii be yen’i. » 27Lann i g maad Toma: « Nagn g suun a nuubil ne, diid n nui, nagn a nuu g suun n logl n ninŋ. Daa mali munle-le, tuo g gaal yen mɔni. » 28G Toma ŋmiɛn’o: « N Yonmdaan, n Yendu. » 29G Yiesu maad’o: « Ŋan la’n nyan po n te k a ji tuo g gaal yen mɔni waa ! Yab nba tuo g gaal g yen g la, pamann tie b yal i. » 30Yiesu biɛ sun yaalidug tuona bonciɛnn k u ŋuantieb la, k l yen g diɛn kadaaɔg ne ninŋ. 31Ama yal nba be kadaaɔg ne ninŋ diɛn k lan tod’i, yin tuo g gaal yen mɔni g Yiesu tie Kristo, Yendu Bija. I gii gaal yen mɔni, i bu la miɛl g dugn u sann po.

will be added

X\