San 19

1L youg u g Pilat te k b tug Yiesu g pua’ɔg gbana. 2G Rom sijenm tug kunkoni g lug feglg g yilm’o. G tug gaalmɔunŋ g lan’o. 3G ji tu nagn u buol g maad: « T fuond’a naa, Suif‑nba bad ! » G nyaan peb’o tanpaɔg. 4G Pilat biɛ guan g nyiɛ cincann g maad yab bo be l buol: « I la ii ? N bu nyan’o cincann, i buol ne, k yin bann k min g la wan biil yal nba. » 5Lann i k b nyan Yiesu k u yil kunkoni feglg, g liɛ gaalmɔunŋ. G Pilat maad’b: « Diid man, nil ne ! » 6Salg-yidkab ciɛnm yen b sijenm n la’ɔg yaa youg k b ji ta g maad: « Kpaa’ɔg dapunpɔnn po, kpaa’ɔg dapunpɔnn po. » G Pilat maad’b: « Tug’o man g daan kpaa’ɔg i kua, g dugn min g la wan biil yal nba. » 7G Suif‑nba yudanm guan g ŋmiɛn’o: « Tinm mɔg yiko nne, k l yiko ŋɔn k u kon l dagd yen ban kpi’ug, k l maa u maad k u tie Yendu Bija. » 8Pilat n gbad l maam, g jiwaani kua’ɔg bonciɛnn. 9K u guan g kua ŋaag n ninŋ g bual Yiesu, k u nyiɛ lɛ i ? Yiesu g jiin’o baa siɛl. 10Lann i g Pilat maad’o: « A ŋmin yen min yaa aa ? A g ban k n mɔg yikod g bu fid g te k ban luod’a, g biɛ mɔg yikod g bu fid g te k ban kpaa’a dapunpɔnn po ii ? » 11G Yiesu ŋmiɛn’o: « A bo kan fid g te ban tien’n baa siɛl, l bo gii g tie g Yendu tie’a nuu. L po n te g yua nba suol’n g tie’a nyan yaa biid ŋanm g yabd. » 12L youg u g Pilat ji cil g kpaan wan bu tien nand g luod Yiesu g ŋaa’ɔg. Ama g Suif‑nba yudanm ŋanm g tand g maad: « A gii luod jua ne g ŋaa’ɔg, lann a g taa Sesaar po. Yua nba yiin u kua bad kul, l daan tie Sesaar ninnand i. » 13Pilat n gbad nnyan, k u nyan Yiesu cincann, g kal buud kog po, naan buol nba k b kpaa yen tana. B bo yi l binbindl i Gabata, Ebro‑nba maam n ninŋ. 14L bo tie daal nba k b tu bobn Saaba i, k l Saaba daal tuu yen Fielu jaanm dana, yensiig po, g Pilat maad Suif‑nba: « I bad n nyan ! » 15K b tand g ŋmiɛn’o: « Kpi’ug, kpi’ug, kpaa’ɔg dapunpɔnn po. » G Pilat bual’b: « N kpaa i bad dapunpɔnn po ii ? » G salg-yidkab ciɛnm ŋmiɛn’o: « Tinm g mɔg badfano, Sesaar kua i kaa. » 16G Pilat cab mɔb k ban kpaa Yiesu dapunpɔnn po. K b tug Yiesu g gad yen’o. 17Yiesu mɔno n bo bug u dapunpɔnn hal k b daan nyiɛ doug n ninŋ, g gad naan buol nba k b yi Yukpabug buol, k Ebro‑nba maam n ninŋ k b yi Gɔlgota. 18L buol i k b kpaa Yiesu dapunpɔnn po. G kpaa niib banle nne mɔ g kpiɛn’o, g yend be u nuujendu po, g lua be u nuuganŋ po, k u be sinsiign ninŋ. 19G Pilat te k b diɛn diɛni nne g tabn dapunpɔnn po. L diɛni n bo maad yal nba n ne: « Nasarɛt Yiesu, Suif‑nba bad ». 20Suif‑nba bonciɛnn bo lii l diɛni k l maa ban bo kpaa Yiesu naan buol bo g fag yen doug n ninŋ, k b biɛ bo diɛn l diɛni Ebro‑nba maam n ninŋ yen Rom yab maam n ninŋ yen Grɛk‑nba maam n ninŋ. 21Lann i g Suif‑nba salg-yidkab ciɛnm gad g maad Pilat: « A bo kan diɛn k u ne tie “ Suif‑nba bad ” kaa, a bo bu diɛn g “ jua ne maad k wano n tie Suif‑nba bad ”. » 22G Pilat ŋmiɛn’m: « Min n diɛn yal nba, lann n nyan. » 23Rom sijenm n kpaa Yiesu g gbenn, k b tug u tiɛd g bɔgd kpega ŋanna g yua kul gaal kpegyenn. K l ji tenn gaalug. Lann bo tie cabmunn i, l bo g mɔg nyalm baa siɛl buol. 24G Rom sijenm maad b ŋmiɛl n ninŋ: « T kan pad gaalug ne kaa, t bu tɔ tiɛ tiɛ i g bann yua nba bu yend’o. L bo tien nnyan g Yendu Kadaaɔg n diɛni ne ń tien yen mɔni i: “ B biid n tiɛd, g tɔ tiɛ tiɛ g tug n gaalug. ” » Rom sijenm bo sun l tuonn n nyan. 25L sua g Yiesu naa sie g kpiɛ ban bo kpaa Yiesu dapunpɔnn nba po. Wano yen u niipuo yen Kleyopas ŋaapuo Mari yen Magdala Mari n bo sie. 26Yiesu n yaan la u naa, k u ŋuantua nba k u bo bua’ɔg nyan sie u buol, k u maad u naa: « Diid, a bija n nyan. » 27Lann i g maad u ŋuantua mɔ: « Diid, a naa n nyan. » L daal i k l ŋuantua ji kun yen’o k u be u ŋaapo. 28L puol po, Yiesu n ji bo ban g bonn kul tien g gbenn nyan, k u maad: « Nyunnyuglu mɔg’n. » L bo tien nnyan g yal nba bo diɛn Yendu Kadaaɔg n ninŋ kul ń tien g juod i. 29L sua g sual sie l buol g gbie yen dimiigl. K b tug ciesuobu g nyua l dimiigl n ninŋ, g tuun daaɔg po g gad yen u mɔb po. 30Yiesu n l nyuu yaa youg k u maad: « Bona kul ji tien g gbenn. » Lann i g tibn, g ji jiin. 31L bo tie ban tu bobn Saaba yaa daal nba i. Suif‑nba yudanm bo g bua k ban kpaa niib nba ń gii juan dapunpɔna po Saaba daal, g dugn l Saaba daal bo tie digbenŋl i b po. Lann i k b gad g miɛl Pilat k wan cab g Rom sijenm ń kɔnn kɔnn ban kpaa niib nba nyan titala k ban kpe tonm, k ban nyan’m dapunpɔna po. 32G sijenm baal ban bo kpaa yab nba g kpiɛn Yiesu nyan buol, g kɔnn yend titala, g guan g kɔnn lua titala. 33B pund Yiesu buol g sua k u kpe u. L po n te k b ji bo g kɔnn u yaa titala. 34Yen l kul g sijenm ninŋ yend tug kpann g cɔg u logl n ninŋ g sɔm yen nyum nyiɛ l youg. 35Yua nba maad l bona kul ne la yen u ninbinn i. Wan maad yal nba tie mɔni i. U ban k u maad mɔni k i mɔ ń tuo g gaal i. 36L bo tien nnyan g Yendu maam ne ń tien yen mɔni i: « Baa u kpabyenn kan mud. » 37L biɛ diɛn liel buol g maad: « B ninbina tan baa maa yua nba k b cɔg g lond’o po i. » 38L bona po n pend, k Arimati jua nne k b yi’ug Sosɛf gad g miɛl Pilat k wan cab’o k wan tug Yiesu gbannand. U mɔ bo tie Yiesu ŋuantua i g yen wuod, g dugn u bo jie Suif‑nba yudanm. G Pilat cab’o k u gad g tug Yiesu gbannand. 39G Nikodɛm, jua nba bo gad diyenn nyiɛɔg g la Yiesu nyan baal yen tilaali cilo piintaa. B bo tien l tilaali yen tiidi nne siim i, k b yi l tiidi miir yen alowɛs. 40Banm jab banle n bo tug Yiesu gbannand g pɔbn caba n ninŋ, g tien tilaali nyan Suif‑nba n bo tu tien nand g pii b kuum nyan. 41Ban bo kpaa Yiesu naan buol nba nyan, gɔglug nne bo be l buol, g kakupaann nne be l n ninŋ, k b daa g ban g pii sua l kakul n ninŋ. 42Lan bo tie Suif‑nba Saaba bobnu daal, k l kakul biɛ kɔb yen l buol nyan, k b gad g duan Yiesu l n ninŋ.

will be added

X\