1 Yiesu bo maad: « Min n tie dimɔunŋ tiig yen mɔni, k n Baa tie dimɔunŋ tiidi kpadaan. 2 Bendl nba be n po, g g luon luana, u tu cua’ɔg u. Yua nba luon mɔ, wan gbad gbad’o, lan ŋanm g lon g pugn. 3 Yinm nuan, min muand’i laabaal nba tuod g ŋanm i pala o. 4 I be man yen’n, k n mɔ baa be yen’i. Tibendl gii g be tinyagl po, u kan fid g lon luana. I mɔ gii g be yen’n, i mɔ kan fid g lon luana. 5 Min n tie dimɔunŋ tiig, k i tie benda. Yua nba be yen’n k n mɔ be yen’o, l daan bu lon luana bonciɛnn, g dugn i gii paad i kua, i kan fid g tien baa siɛl. 6 Yua nba g be yen’n, b bu lu’ug cincann i, nyan dikuounŋ nyan. B tu gann l dikuond i g kuun muu n ninŋ lan di g buod. 7 I gii be yen’n, k n maam mɔ be i ninŋ, yin bua yal nba kul yin miɛl, i bu la. 8 I gii luon luana bonciɛnn, g ŋɔnŋ k i tie n ŋuantieb, lann n baad yen yudand n Baa po. 9 N bua’i nyan n Baa n buad’n nand nyan i. I be man n buam n ninŋ. 10 I gii kub n mɔmaam, i baa be n buam n ninŋ i, nyan min yaan kub n Baa mɔmaam g be u buam n ninŋ nyan. 11 N maad’i l kul ne k yin gii mɔg pamann nba k n mɔg i, k i pala ń l manŋ canyiin. 12 N mɔmaam n ne: I bua man i lieb nyan min bua’i nand nyan. 13 Buam g be g cie g nil ń lu u miɛl g dugn u dɔnn‑nba po. 14 I tie n dɔnn‑nba i, l gii tie k i suun min yed k i sun yal nba. 15 N ji kan gii yi’i n tuonsunna, g dugn tuonsunn g ban u canbaa n suun yal nba. N ji baa yi’i n dɔnn‑nba i, k l maa n ŋɔn’i min banŋ yal nba kul n Baa buol o. 16 Yinm kaa lugd’n. Min n lugd’i g sun’i k yin gad g lon luana nba bu wai. Nnyan, i gii miɛl n Baa yal nba kul n sann po, u bu te’i. 17 Min n maad’i yal nba n ne: I bua man i lieb. 18 Ŋanduna niib gii g bua i nublu, yin gii ban k b bo kpiɛ g g bua n yaa nublu i. 19 I bo gii tie ŋanduna yab, ŋanduna niib pala bo baa man i po g dugn banm n yen’i. I yen g tie ŋanduna yab. Min yaan lugd’i, g nyan’i ŋanduna n ninŋ po n te k b g bua i nublu. 20 I tiɛn man min maad’i yal nba: “ Tuonsunn g cie u canbaa. ” B gii ŋɔn’n fala yin gii ban k b bu ŋɔn i mɔ fala. B gii gaal n maam, b bu gaal i mɔ yaa maam. 21 B bu tien’i l kul ne n yaa sann po i, g dugn b g ban yua nba sun’n. 22 L bo gii tie k n g baal, g biɛ g maad yen’m, sua bo kan jalg’b k b tien biid. Mɔlane po, b ji kan fid g nya b biid n ninŋ. 23 Yua nba g bua n nublu, u g bua n Baa mɔ. 24 N bo gii g baal b siign, g tien bona nba g sua g ban g tien, sua bo kan jalg’b k b tien biid. Ama b la l kul ne yo, g biɛ l g bua min yen n Baa kul nublu. 25 L bona tie nnyan, g yal nba bo diɛn b Mɔmaam kadaaɔg n ninŋ ń te mɔni i. L kon bo diɛn: “ B l yie k b g bua n nublu finfam i. ” 26 Yaa youg nba k n tan bu sun i Todkua Foŋanm nba tie mamɔnmaad, wan nya n Baa buol g baal nyan u bu kun mɔni n po. 27 I mɔ biɛ bu kun mɔni n po, g dugn yinm n tu l be yen’n hal cilg youg.
