San 13

1Fielu jaanm bo nag, g Yiesu ban g youg pund yen wan nya ŋanduna ne ninŋ g guan u Baa buol. L sua k u bo tuod g buad yab nba tie u niib ŋanduna ne ninŋ, k u ŋɔn k u l bua’b i saa yen juog. 2Yiesu yen u ŋuantieb bo di daajuoug jied i. L sua g Sitaan kuan maalm Simɔn bija Suuda Iskariyɔt pal n ninŋ k wan kuad Yiesu u. 3Wano Yiesu mɔno bo ban g Yendu tug bonn kul g kubn u nuu n ninŋ, k u nyiɛ Yendu buol g biɛ bu guan g lebd Yendu po. 4K u fiil jied po, g land u tiɛd g bil, g tug cabl g lol siɛg n ninŋ. 5Lann i g tug nyum g kuol tadug n ninŋ, g ji tu ŋuul ŋuul u ŋuantieb titala g tug cabl nba k u bo lol u siɛg n ninŋ nyan g fiɛl fiɛl. 6K u tan pund Simɔn Piɛr buol k u bual’o: « Yonmdaan, fin mɔno n bu ŋuul n titala aa ? » 7G Yiesu ŋmiɛn’o g maad: « A daa g ban min tie yal nba ne niimn ninŋ, ama l gii yann waam, a bu gbad l niimn ninŋ. » 8G Piɛr yie g maad: « Kai, Yonmdaan, a kan ŋuul min yaa titala. » G Yiesu ŋmiɛn’o: « A gii yie k n kan ŋuul a titala, lann a ji g mɔg siɛl n buol. » 9G Simɔn Piɛr maad: « Yonmdaan, l gii tie nnyan nuan ŋan daa ŋuul n titala kukua kaa, ŋuul n nui yen n yul kul. » 10G Yiesu maad: « L g bual g yua nba wul ń biɛ guan g wul g led, l gii g tie k wan ŋuul u titala i kaa. K l maa wano ji g mɔg siɛl yaa jɔgnd. Yinm nuan ji g mɔg jɔgnd. Ama i kul biɛ kaa. » 11U bo ban yua nba bu kuad’o. Lann n te k u bo maad k b kul kaa g mɔg jɔgnd. 12Wan yaan ŋuul b titala g gbenn, k u guan g tug u tiɛd g liɛ g guan u kinkaanu n ninŋ, g bual u ŋuantieb: « I ban min tien yal nba i po ne niimn ninŋ ii ? 13I yi’n k i Canbaa yen i Yonmdaan. I mɔg mɔni k yin gii yi’n nnyan, g dugn n kon l tie wano i. 14K min nba tie i Yonmdaan yen i Canbaa gii ŋuul i titala i, l g dagd yen k i mɔ ń ŋuul i lieb titala ii ? 15N tien nnyan k yin la n buol g mɔ ń gii tie i lieb min tien’i yal nba i. 16Yen mɔni n maad’i, tuonsunn g cie u canbaa, yua nba k b sun’o mɔ g cie yua n sun’o. 17Yal nba k i ji ban ne, i gii tug g sun yenn tuonn, i bu sua k i be pamann n ninŋ i. 18N g maad i kul kaa, n ban min lugd yab nba. L yen bual g Yendu Kadaaɔg n bo maad yal nba ne ń tien i. L bo diɛn g maad: “ Yua nba daan taan g di yen’n, wano n biɛ guan g lind n puol. ” 19N tuod g maad’i k l bonn daa g tien ne, k l tan gii tien yaa youg nba yin gii dug n po, k min n l be. 20Yen mɔni n maad’i, daan nba gaal min sun yua nba, u gaal min i. Daan nba gaal’n mɔ, u gaal yua nba sun’n i. » 21Yiesu n maad nnyan k u yam kul ŋmad k u maad: « Yen mɔni n maad’i, i ninŋ ne yend bu kuad’n. » 22K u ŋuantieb yaad g diid diid lieb, b yen g fid g bann wan maad yua nba. 23L sua k u ŋuantieb n ninŋ yend, yua nba k wano Yiesu bo bua’ɔg nyan kpaag g kuul’o. 24G Simɔn Piɛr gognd yul g ŋɔn’o k wan bual Yiesu g liɛ u maad ŋmaa i ? 25K l ŋuantua nagn Yiesu g bual’o: « Yonmdaan, a maad ŋmaa i ? » 26G Yiesu ŋmiɛn’o: « N gii ŋuu kpanu jenn g tie yua nba, ŋan gii ban k wano n nyan. » Lann i g ŋuu kpanu jenn g tie Suuda, Simɔn Iskariyɔt bija. 27Suuda n l gaal kpanu jenn yaa youg, g Sitaan kua u ninŋ. G Yiesu maad’o: « Tien tonm g sun ŋan bu sun yal nba. » 28Banm nba bo be l buol kul, sua g bann yal nba po te k u maad’o nnyan. 29Suuda n bo diɛ b ligli kɔl nyan, g siɛb mali g Yiesu baa maad’o k wan gad g daa ban bu tug yal nba g di jaanm i, lann i kaa k wan te tali siɛl i. 30G Suuda gaal u kpanu jenn g fiil l youg mɔno g nyiɛ. L sua k l bɔnn o. 31Suuda n nyiɛ yaa youg g Yiesu maad: « Mɔlane po Nifosaal Bija gaal yudand, g biɛ te g Yendu mɔ gaal yudand. 32Yendu gii gaal yudand g dugn u Bija po, wano Yendu mɔ bu ŋɔn u yudand u Bija n ninŋ. L ji kan wai yen lan tien. 33N bid, n ji kan gii be yen’i lan wai. I bu kpaan’n. N ji maad i mɔ min daan maad Suif‑nba yudanm yal nba i: Min saa naan buol nyan, i kan fid g gad l buol. 34Mɔmapaanm n nyan k n tien’i: I bua man i lieb. I bua man i lieb nyan min buad’i nand nyan. 35I gii bua i lieb i, g niib kul bu bann k i tie n ŋuantieb. » 36G Simɔn Piɛr bual Yiesu: « Yonmdaan, a saa lɛ i ? » G Yiesu ŋmiɛn: « Min saa naan buol, a daa kan fid g ŋuan’n mɔlane. Ama a tan bu ŋuan’n siɛnyoug. » 37G Piɛr bual’o: « Yonmdaan, bɛ po i k n kan fid g ŋuan’a mɔlane i ? L gii bual k n kpe a po mɔlane mɔno, min be i. » 38G Yiesu ŋmiɛn’o: « A bu kpe n po i ? Yen mɔni n maad’a, dinne a bu nai taal muntaa k a g ban’n g kolg daa g mɔ. »

will be added

X\