1 Fielu jaanm bo tenn daa ŋanluob i, g Yiesu gad Betani. Wan bo yied jua nba k b yi’ug Lasar nyan doug n bo nyan. 2 K u baal k b tien jied g cand’o. Mart n bo tugd jied g tien niib, g Lasar kal yen saanm nba bo be yen Yiesu. 3 Lann i g Mari tug tilaali nne k b tien yen naar kukua k l daaɔg paa bonciɛnn, g bud Yiesu titala po. G nyaan tug wano mɔno yud g fiɛl fiɛl Yiesu titala. K l tilaali nubl g yend ŋaag kul. 4 Lann i g Suuda Iskariyɔt, Yiesu ŋuantieb n ninŋ, yua nba bo tan bu kuad’o nyan maad: 5 « Laabaal k b g tug tilaali ne g kuad g gaal dibala kobiintaa g biid tali i ? » 6 U bo g maad nnyan g dugn u pal siɛd taladdanm po kaa. U bo tie naayig i. Wano n bo diɛ b ligkpalpiɛg g jaan g ŋund ban ŋuun yal nba l n ninŋ. 7 G Yiesu maad: « Ŋaa’ɔg suoo, l tilaali tu be k wan tug g seln n kuum i. 8 Tali nuan baa l be yen’i nii youg kul, min nuan yen kan gii tund g be yen’i. » 9 Suif‑nba bonciɛnn bo gbad g Yiesu be Betani, k b baal. B bo g baal Yiesu po kua kaa, b bo bua ban la Lasar mɔ, yua nba g Yiesu bo yied’o g nyan’o kpienm n ninŋ nyan. 10 Lann i g salg-yidkab ciɛnm taan g lol k ban kpi Lasar mɔ. 11 G dugn u yaa po i g Suif‑nba bonciɛnn ji bo ŋaa’b g tug b dindann kul g tien Yiesu n ninŋ. 12 K l fann g niwulug nba bo tigl g bu di Fielu jaanm nyan gbad g Yiesu baad Serusalɛm. 13 K b tug kaadi faad g nyiɛ g ji togi’ug g yign g tua: « Osaana, Yendu ń yad u yedŋanm yua nba baad wano Yonmdaan sann po. Yendu ń yad u yedŋanm Israyɛl bad po. » 14 G Yiesu la bonbig g jag, k l tien nyan lan bo diɛn Yendu Kadaaɔg n ninŋ nand nyan: 15 « Siyɔn yab, daa jie man siɛl. I bad n baad nyan. U jag bonpanŋ i. » 16 U ŋuantieb daa bo g gbad l bona kul niimn ninŋ. U bo tan gaal u yudand yo, k b ji tiɛd k l kul ne bo tuod g diɛn Yendu Kadaaɔg n, g maad u maam. G niib n tien yal nba kul u po bo bu tien i. 17 Niwulug nba bo be yen Yiesu, g la yaa youg nba k u bo yiin Lasar k u nyiɛ kaaɔg n ninŋ, k u yied’o g nyan’o kpienm n ninŋ nyan bo muand niib l laabaal i. 18 Niib bonciɛnn n bo gbad k u daan sun l yaalidug tuonn nyan po n bo te k b tuog’o. 19 G Farisiɛn-nba ji maad b ŋmiɛl n ninŋ g tua: « I la ii ? I ji kan fid’o. Ŋanduna niib kul ji ŋua’ɔg u. » 20 Yab nba bo baal Serusalɛm jaanm youg g bu pug Yendu nyan, buolfanu yab bo be b siign ninŋ. 21 K b gad g la Filiip, yua nba bo nyiɛ Galile dingbanbig nba k b yi Bɛtsayida nyan, g maad’o: « Canbaa, t bo bua k t la Yiesu. » 22 G Filiip mɔ maad Andre, k banm banle gad g la Yiesu g maad’o. 23 G Yiesu guan g ŋmiɛn’m g maad: « Nifosaal Bija n bu gaal u yudand yaa youg nba pund o. 24 Yen mɔni, n maad’i, dibim gii g piin tinŋ n ninŋ g bed, l baa l tie dibinyenm i. Ama dibim nba piin tinŋ n ninŋ g bed n tu pa g nan dibim nba yab. 25 Yua nba mandg bua u miɛl u bu buon l miɛl. Ama yua nba g yiin u miɛl siɛl ŋanduna ne ninŋ, wano n bu la miɛl nba kan ban g gbenn. 26 Yua nba bua wan gii suun n tuonn, wan gii ŋua’n. Min be naan buol, n tuonsunn mɔ baa be l buol i. Yua nba suun n tuonn, n Baa bu don’o. » 27 « Mɔlane n yam kul ŋmad k n ji g ban min bu maad yal nba. N maad n Baa k wan nyan’n fala nba baad ne ninŋ ii ? N n, l po n te k n baal g tan pund yaa youg ne. 28 N Baa, te k a sann ń do. » G niɛlu nne nyiɛ polu po g maad: « N te k n sann duo o, ama n biɛ bu te lan ŋanm g do g pugn. » 29 Niwulug nba bo be l buol n gbad nnyan, g yenm yed g tatintandi i, g lieb yed g malɛg n maad yen’o. 30 G Yiesu guan g maad: « L g tie n yaa po kaa g niɛlu ne maad. L maad k lan tod yinm i. 31 Ŋanduna ne buud youg pund n nyan. B bu nyan ŋanduna ne bad g lu’ug cincann. 32 Ama min nuan gii nyiɛ tinŋ n ne g duo polu po, n bu dad niib kul g baal yen’m n buol. » 33 U bo maad nnyan g ŋɔnŋ wan bu kpe kubuolu nba i. 34 G niwulug guan g ŋmiɛn’o: « Yendu Mɔmaam maad’ti g Kristo baa be g mɔg miɛl youg kul, k fin yed k l tie g Nifosaal Bija ń do polu po i. Nifosaal Bija daa tie ŋmaa i nuan i ? » 35 Lann i g Yiesu maad’b: « Yinyiem daa be i buol, ama l ji kan wai. I sonm man yaa youg nba k i daa mɔg yinyiem, g bunbɔnn ń tan daa naag’i. G dugn yua nba sonm bunbɔnn n ninŋ, u g ban wan saa naan buol. 36 Yaa youg nba g yinyiem daa be yen’i, yin tuo g gaal yinyiem gii dug u po, g te yinyiem bid. » Yiesu n maad nnyan g gbenn k u yaad g ŋaa’b g gad g wuon. 37 Yen Yiesu n bo l sun yaalidug tuona nba kul b nunŋ ninŋ, Suif‑nba bo g dug Yiesu po. 38 L bo tien nnyan g Yendu sogni Esaayi n bo maad yal nba ń te mɔni i. U kon bo maad: « Yonmdaan, ŋmaa tuo g gaal t maam i ? Yendu ŋɔn ŋmaa i u paalu i ? » 39 Esaayi biɛ bo ŋɔn yal po te k b kan fid gii mɔg dindann. Lann n tie g: 40 « Yendu n juan’m, g kuan kangbadm b pala n ninŋ, k b ninbina ń daa nyuan siɛl, k ban biɛ daa gbad bona niimn, k ban daa fid g lebd b binbem g guan n buol k n paag’b. » 41 Esaayi bo maad nnyan g dugn u bo la Yiesu yudand i g maad u maam. 42 Yen l kul ne Suif‑nba yudanm siign ninŋ mɔno, bonciɛnn bo tug b dindann g tien Yiesu ninŋ, ama ban bo jie Farisiɛn-nba nyan, b bo kan tuo g kad g maad, g dugn b bo jie k b bu bel’b g nyan’m tintaann dieog n i. 43 B bo bua niib pinpagd i g cie Yendu yal. 44 G Yiesu tand g maad: « Yua nba dug n po, u g dug n po kaa, u dug yua nba sun’n po i. 45 Yua nba la’n, u la yua nba sun’n n nyan. 46 Min n tie yinyiem. N baal ŋanduna n ninŋ g yua nba dug n po, wan ji daa be bunbɔnn n ninŋ i. 47 Yua nba cenŋ n maam g yen g tug g sun yenn tuonn, min kaa bu bu’ug. N g baal k n bu ŋanduna kaa, n baal k n fiel’o i. 48 Yua nba yie’n, g biɛ g gaal n maam, l daan mɔg yua nba bu jiɛl u buud. N maam nba k n maad ne n tan bu jiɛl u buud dijijuog daal. 49 K l maa n g maad n yul po maam kaa, n maad n Baa n sun’n, g tie’n mɔb k n maad g yed yal nba i. 50 N biɛ ban k n Baa mɔbonn n tie miɛl nba kan ban g gbenn. Lann n te k min n maad yal nba, n maad nyan wan tie’n mɔb k n maad nand nyan i. »
