San 11

1Betani jua nne bo be k b yi’ug Lasar, k u tan duan yiɛlu. Betani bo tie Mari yen u niipuo Mart mɔ yaa doug u. 2Wano Mari n bo bud tilaali Yonmdaan Yiesu titala po, g fiɛl fiɛl yen u yud nyan. Jua nba k b bo yi’ug Lasar k u yiɛl nyan bo tie u ninja i. 3Mari yen Mart bo sun k ban maad Yiesu k u dɔnn yiɛl. 4K b gad g maad Yiesu, k u maad k l yiɛlu kan baal yen kuum kaa, k l bua lan ŋɔn Yendu yudand i. K l buol i, g Yendu Bija bu gaal yudand. 5Yiesu bo bua Mart yen u niipuo yen Lasar bonciɛnn. 6Wan gbad g Lasar yiɛl nyan, k u biɛ daa tien dana ŋanle wan bo be naan buol nyan. 7L puol po i, k u ji maad u ŋuantieb k ban lebd Suude. 8K u ŋuantieb maad’o: « Diid a, Canbaa, l daa g wai mɔno k l po yab daan bua n jaa’a tana g kpi’a ; k a biɛ bua n lebd l po i ? » 9G Yiesu ŋmiɛn’m: « Daal n ninŋ g mɔg piig yen kud munle kaa aa ? Yua nba sonm yensiig n ninŋ g sonm g tuud, g dugn u nyuan ŋanduna ne yinyiem. 10Yua nba sonm nyiɛɔg n tuud g dugn u g mɔg yinyiem u ninŋ. » 11Yiesu n maad nnyan, k u biɛ pugn: « T dɔnn Lasar guand i, n yen bu gad g find’o. » 12K u ŋuantieb maad g Canbaa, g Lasar gii guand nuan k lann k u bu paag o. 13Yiesu bo bua n maad k u kpe i, k banm yen mali k u maad gɔmɔnm i. 14K u ji gbal g kad g maad’b g yed: « Lasar kpe o. 15Ama n pal n man yal nba tie k t ninŋ ne baa sua bo g be l buol. Lann n bu te yin gaal n maam. T gad man u buol. » 16G Toma, yua nba k b bo yi’ug Didiim nyan maad u lieb: « Ŋaa man k t kul ń gad, k tinm yen t Yonmdaan ń daan taan g kpe. » 17Yiesu tan pund Betani g gbad k ban pii Lasar l daa ŋanna po n nyan. 18Betani bo g fag yen Serusalɛm, l bo tie nyan taabana tuda ŋantaa nyan i. 19L po n te g Suif‑nba bonciɛnn bo baal Mart yen Mari buol k ban fuond’b b ninja kufuondi. 20Mart n gbad g Yiesu baad, k u nyiɛ g tuog’o g nyaan ŋaa g Mari kal dieog n ninŋ. 21G Mart maad Yiesu: « Yonmdaan, a daan bo gii be ne, n ninja daan bo kan kpe. 22N biɛ yen l ban g baa mɔlane mɔno a gii miɛl Yendu yal nba kul, u bu te’a. » 23G Yiesu maad’o: « A ninja bu yied ». 24G Mart guan g ŋmiɛn: « N ban k u tan bu yied dijijuog daal, kpienm kul n bu yied yaa daal nba. » 25G Yiesu maad: « Min n tie yiedu, min n biɛ tie miɛl. Yua nba dug n po u baa fo yen mɔni, baa u gii kpe. 26Yua nba biɛ fo yen mɔni g dug n po mɔ u kan ban g kpe. A tuo k min maad yal ne tie mɔni i ? » 27G Mart yed k ɛɛn, k u tuo. G pugn: « N ban k fin n tie Kristo, Yendu Bija nba bo bu baal ŋanduna n ninŋ. » 28Mart n maad nnyan, k u gad g yiin u niipuo Mari g sɔb g maad’o g Canbaa baal g kpaan’o. 29Mari n gbad nnyan k u kud g fiil g san g tuog Yiesu. 30L sua g Yiesu daa g kua doug n ninŋ. K u daa l be Mart n bo tuog’o naan buol nyan i. 31Suif‑nba nba bo be ŋaag n ninŋ g paand Mari pal nyan n la k u kud g fiil g siɛn g nya, k b mɔ fiil g siɛn g ŋua’ɔg. B bo mali k u saa kakul po i, g daan baa buud. 32Mari n pund Yiesu buol g la’ɔg yaa youg, g baa g gbaan u nintual n ninŋ g maad: « Yonmdaan, a daan bo gii be ne n ninja daan bo kan kpe. » 33Yiesu n la g Mari buud, g Suif‑nba nba bo siɛn g ŋua’ɔg mɔ buud nyan, k u tug n ninŋ kul ŋann ŋann, k u yam ŋmad. 34K u bual k b pii’ug lɛ i ? K b ŋmiɛn: « Yonmdaan, baal g diid. » 35G Yiesu mɔ ji caan bubuul. 36G Suif‑nba maad k b la i ? K u daan l bua’ɔg u paaa. 37K b ninŋ siɛb maad k wano nba daan te g juan nyuand, k u daan bo kan fid g te g Lasar ń daa kpe i ? 38G Yiesu tug n ninŋ yaan biɛ ŋann ŋann. Lann i k u gad kakul po. Kakul bo tie tanfalu i, g tann nne bii l mɔb. 39G Yiesu maad k ban biid l tann. Lann i g Mart, yua nba bo kpe nyan niipuo maad: « Diid a, Yonmdaan, u baa nuug o, daa ŋanna n nyan. » 40G Yiesu maad’o: « N g maad’a k a gii mɔg dindann, a bu la Yendu yudand ii ? » 41K b biid kakutann, g Yiesu yaad g diid polu po g maad: « N Baa, n tiend’a balg yen ŋan cenŋ n maam. 42N ban k a l cenŋ n maam youg kul. Ama n maad g dugn niib nba be ne po i, k ban bann yen mɔni, k fin n sun’n. » 43Wan maad nnyan g gbenn k u tiɛn g maad: « Lasar, nya l n ninŋ. » 44G kuum fiil g nyiɛ k u titala yen u nui kul luol yen caba, g kpalcad fuun u nunŋ po. G Yiesu maad k ban lod’o g ŋaa’ɔg k wan gii saa. 45Suif‑nba nba bo baal Mari buol nyan n la Yiesu n tien yal nba, k b ninŋ bonciɛnn ji cil g dug u po. 46G lieb nuan yen gad g la Farisiɛn-nba g dugn’m Yiesu n tien yal nba kul. 47Lann i g salg-yidkab ciɛnm yen Farisiɛn-nba taan Suif‑nba nikpela g maad’b: « I la i ? Jua ne suun yaalidug tuona bonciɛnn, t ji bu tien nle ? 48T gii ŋaa’ɔg k u suun nnyan niib kul ji tan baa dug u po i. L gii tien nnyan mɔ, Rom yab bu fiil g pua g mud t jaanddeciɛɔnŋ yen t doug u. » 49B ninŋ yend bo be k b yi’ug Kaayif, wano n bo tie salg-yidkab kul ciɛn l binn. K u gaal maam g maad: « I g gbiɛ bona niimn ninŋ. 50I g ban g niyend gii gaal t buolu po g kpe, lann n su i po yen doug munn ń biɛl ii ? » 51U yanbuam kaa k u bo maad l maam. L binn wan bo tie Yendu salg-yidkab kul ciɛn nyan i, g Yendu bo te k l maam nyiɛ u mɔb n g Yiesu bu kpe Suif‑nba buolu po. 52L kan gii tie l buolu po kukua kaa, u bu kpe g taan Yendu niib nba yad ŋanduna n ninŋ kul i, k ban gii tie bonyenn. 53L daal i g Suif‑nba yudanm lol k b bu kpi Yiesu. 54L po n te g Yiesu mɔ ji bo g gbiɛ k u saa niwulug n ninŋ, Suif‑nba yudanm n bo tu be naan buol. U ji bo gad g be dingbann nne ninŋ i k l g fag yen tinkuonŋ n ninŋ, dobig nne ninŋ k b yi Efraayim. Wano yen u ŋuantieb ji bo be l po i. 55Suif‑nba fielu jaanm bo nag g niib bonciɛnn nyiɛ dingbanbid n ninŋ g duo Serusalɛm g daan bu tien bogda g ŋanm b kua g sua g jaanm daa g pund. 56B ji bo kpaan Yiesu i. Ban bo be jaanddeciɛɔnŋ n ninŋ yaa youg k b ji maad maad yen lieb g tua k b mali nle i, k u bu l baal jaanm nuan ii ? 57Salg-yidkab ciɛnm yen Farisiɛn-nba bo tie mɔb, g yua nba gii ban Yiesu n be naan buol, k l daan ń maad’b k ban suol’o.

will be added

X\