1 « Yen mɔni, n maad’i, yua nba n bua kua pedel n ninŋ, g g kua dimɔb kaa, g yen yuug guonn g kua nyan, u tie naayig i, u tie bibiɛdg i. 2 Yua nba tɔg pedel dimɔb g kua n tie pekpaal. 3 Yua nba guu pei tu luod gann i, wan kua, pei ń gbad u niɛlu. Pei nba tie u yab kul, u tu yiin yua kul g taa u sann i, g nya yen’m cincann. 4 U gii nyan b kul cincann, wan gaal b liig ban gii ŋua u puol po, k l maa b ban u niɛlu. 5 B yen kan tuo g ŋuan saan nuan. B taan bu san mɔno g fagd yen’o i, g dugn b g ban u niɛlu. » 6 Yiesu n bo pua’b l makpanjam, ama b yen bo g gbad l niimn ninŋ. 7 Yiesu bo guan g maad lann i: « Yen mɔni n maad’i, min n tie pedel dimɔb. 8 Yab nba bo kpiɛ g baal g sua k n daa g baal kul, b bo tie naayiga yen bibiɛdi i. Pei yen bo g ŋuan’m. 9 Min n tie dimɔb, yua nba kua n buol, u ciɛl n nyan. U bu fid gii kua g gɔ g nya, g laad u jied g di. 10 Naayig nuan baad k wan jan, g kpi, g biɛn kukua i. Min nuan baal k ban la miɛl i, k ban la miɛl yen mɔni. 11 Min n tie pekpaamɔn. Pekpaamɔn n tu lu u miɛl g fiel u pei. 12 Ama yua nba kpaa pei ligli po, g yen g tie pekpaal yen mɔni, g biɛ g yen pei nuan gii la g fuabɔjɔug baad, u tu ŋaa pei i g san, fuabɔjɔug ń baal g kua pei n ninŋ g yaan’m. 13 U tu san g dugn u suun ligli po i, pei g tie siɛl u po. 14 Min nuan tie pekpaamɔn i. N ban n pei, k n pei mɔ biɛ ban’n, 15 nyan n Baa n ban’n k n mɔ ban n Baa nyan, n bu lu n miɛl g fiel n pei. 16 N biɛ mɔg pelei k b g tie pelol ne ninŋ yab. L tie k min kpaa b mɔ i. B mɔ bu cenŋ n maam, b kul ń ji taan gii tie peloyenn n ninŋ pei, gii mɔg pekpaayeno kukua. 17 N Baa bua’n g dugn n bu lu n miɛl g biɛ guan g gaal l miɛl. 18 Sua kaa bu fiel n miɛl, n yanbuam n i k n bu lu n miɛl. N mɔg yiko nba k n bu fid g lu n miɛl, n biɛ mɔg yiko nba k n bu fid g guan g gaal l miɛl. N Baa n yed k min sun yal nba n nyan. » 19 Yiesu n maad nnyan, k l yaan baal yen gigaɔg Suif‑nba yudanm siign. 20 B ninŋ bonciɛnn bo yed g sanpol n diɛ’ɔg, k u tie waad i, g bɛ po i k b cenŋ u maam i ? 21 G lieb yed g sanpol n ŋua yua nba g maad nne kaa, g sanpol bu fid g te juanm ń nyuand ii ? 22 Suif‑nba bo di jaanm nba k b tu guan g tiɛd jaanddeciɛɔnŋ ŋanmu po nyan. L bo tie fawaaɔg youg u, 23 g Yiesu be jaanddeciɛɔnŋ n, Salomɔn ciɛɔg n ninŋ, g sonm g saa g gɔ g leb. 24 G Suif‑nba yudanm gob g lind’o g bual’o: « Saa yen bɛ daal i k a biɛ daa bu ŋaa tin gii mali munle-le a po i ? A gii tie Kristo ŋan kad g maad’ti. » 25 G Yiesu ŋmiɛn’m: « N maad’i no, i g tuo i. Min suun yaalidug tuona nba n Baa sann po, l ŋɔnŋ min tie yua nba. 26 Ama yinm n g tuo k l tie mɔni, k l maa i g tie n pelol n pei. 27 N pei gbiɛ n niɛlu. N ban’m, k b ŋua’n. 28 N tien’m miɛl nba g mɔg gbennu. B kan ban g kpe, sua mɔ biɛ kan fid g nyan’m n nuu n ninŋ. 29 N Baa n tug’b g tie’n. U cie bonn kul. Sua kan fid g fiel siɛl n Baa nuu n ninŋ. 30 Min yen n Baa taan g tie niyend i. » 31 G Suif‑nba yudanm yaan gann tana g bu jaa’ɔg. 32 Lann i g Yiesu maad’b: « N sun tuonŋana bonciɛnn yen n Baa paalu k i la, i bua n jaa’n tana g dugn tuonlann po i ? » 33 G Suif‑nba yudanm ŋmiɛn’o: « T g bua n jaa’a tana g dugn siɛl yaa tuonŋann po. T bua n jaa’a tana g dugn ŋan yaan sugd Yendu nyan po i. A tie nifosaal i, g yen ji yi a kua Yendu. » 34 G Yiesu maad: « L g diɛn i Mɔmaam kadaaɔg n g maad g Yendu yed k i tie yendui i ? 35 Sua kul ban g Yendu Kadaaɔg n diɛni g mɔg piinu. Yendu yiin niib nba k u bo tie’b u maam g yendui, 36 k min nba k u ji tug’n, g sun’n ŋanduna n ninŋ k n sun u tuonn, k i yed k n sugd Yendu, g dugn min yed k n tie Yendu Bija po i ? 37 N gii g suun n Baa n yed k n sun yal nba, yin daa gaan n maam. 38 Ama n gii suun n Baa tuona, baa i gii g gaal n maam mɔno, yin yen tuo k n tuona nyiɛ u buol, g fid g bann k n Baa be n ninŋ k n mɔ be n Baa n ninŋ. » 39 G Suif‑nba yudanm yaan ji kpaan k ban suol’o, k u ŋmad g yaad. 40 G Yiesu guan g lebd Suurdɛn bɔnpuol, naan buol nba g San bo cind g wuul niib nyan, g ji be l po. 41 G niib bonciɛnn ji baad u buol g tua g « San bo g sun baa tuonyenn k l tie yaalidug bonn. Ama wan bo maad jua ne po yal nba kul bo tie mɔni i. » 42 L buol g niib bonciɛnn tuo g gaal Yiesu.
