1 Mɔlane po, yinm ŋalmandanm, i buud man gii fabn man g dugn yubɔnn nba bu baal’i ne po. 2 I mɔgm dud o, bonfuoda mɔ biɛ mua i tiɛd o. 3 I ligli yen i wula kua tintontanmɔni u. L tintontanmɔni n tan bu te sieda g jalg’i, g di i gbannand nyan muu nyan. Ŋanduna nag juodu u, k yinm biɛ kpaan ŋalman g kul i kua waa ! 4 I g pa tuonsunna nba sun i kpaand n ninŋ b paaɔg, k yin wuon b paaɔg nba ji yign, k l tuonsunna yigni duo hal Yonmdaan, Paaciɛnudaan buol. 5 Tinŋ po ne, i mɔg yin bua yal nba kul, g tie yin bua nand. I di g gbenŋd nyan bonkobd nba k b dinŋ’b g guu b kod daal nyan i. 6 I tun niib biid k b yen g biil siɛl, g kpii’b k b g jiin’i baa siɛl. 7 N naataani, juun man g guul saa yen Yonmdaan baalu. Diid man kpakuol, u tu mind i, gii guu u bonkukuod benu, lan cil kpanyitaag saa yen taag juodu. 8 I mɔ ń di mindl, i pal ń gii paa g dugn Yonmdaan baalu nag o. 9 N naataani, i daa buln buln man i lieb po, g Yendu ń tan daa bu’i. Buuddaan nag o, u ji be i dimɔi n i. 10 N naataani, n tua i la Yendu sogni‑nba nba bo maad Yonmdaan sann po, n bo cagn nand g yen juun aa ? I mɔ ń ŋmaa b taabuoug n. 11 T pag l danm g dugn b juunn po. Jua nba k b yi’ug Sɔb nyan, n tua i gbad ban maad k u bo juun nand aa ? I ban Yonmdaan n bo tan tien yal nba u po, g dugn Yonmdaan tie yua nba k u pal siɛd niib po, k u biɛ jie niib ninbaaɔg u. 12 N naataani, yal ŋanm g tie bonmɔnn n ne: daa polg man polu, biɛ daa polg man tinŋ. Daa l polg man palb. Yal tie mɔni, yin yed k l tie mɔni. Yal g tie mɔni mɔ, yin yed k l g tie mɔni g Yendu ń tan daa bu’i. 13 I siign ninŋ, l gii tie g niyend be fala n ninŋ, wan jaand, lua mɔ gii be pamann n ninŋ, wan yin yani g dond Yendu. 14 Yend gii yiɛl i siign, wan yiin Kristo tintaanu liig yab k ban tien kpam u po Yonmdaan sann po, g jaand. 15 B gii jaand g mɔg dindann, l jaandi bu te yiɛn ń paag. Yendu bu fiin’o ; l biɛ gii tie k l daan mɔg biid, Yendu bu di sugl u biid po. 16 I maad man i lieb i biid, g biɛ gii jaand i lieb po g fid g la laafiɛ. Nimɔn jaandi mɔg paalu bonciɛnn. 17 Eli mɔ bo tie nil nyan tinm nyan i. U bo jaand yen u pal kul g taag ń daa baa. G taag mɔ kon l g baa bina ŋantaa yen ŋmaali yinluob. 18 K u biɛ tan guan g jaand g miɛl taag. G taag baa g bonkukuod tien. 19 N naataani, l gii tie k i ninŋ g sua tud g fagd yen mamɔni sɔnu, g lua gɔgl’o g guan yen’o, 20 yin bann g yua nba gɔgl biiddaan nba tud sɔnu, g guan yen’o nyan, bu fiel biiddaan nalnŋ kuum fiɛl n, g biɛ te Yendu ń piin biid bonciɛnn.
