Saak 4

1Kunkɔna yen mɔniɛɔg nya lɛ i, i siign i ? L nya yin tug i buam g tien bona nba ninŋ i. L bona n be i pal n ninŋ g kɔn yen’i. 2I gii bua bonn g kan la, i ji tu kpaan k yin kpi kuum i. I biɛ gii niɛn bonn g kan nand, l ji tu baal yen kunkɔna yen mɔniɛɔg u, i siign. I tu g la yin kpaan yal nba, g dugn i tu g miɛl Yendu l bonn. 3Lann i kaa i tu miɛl Yendu g kan la, g dugn i tu miɛd g mɔg maalbiid i: i miɛd k yin tien yin bua yal nba i. 4Yinm yab waa g tɔbn tɔbn nyan cuncona nyan, i g ban k i gii buad ŋanduna, i ji kan gii bua Yendu uu ? Yua nba buad ŋanduna ji tu tie Yendu ninnand i. 5Daa bii i mali g fam i, g Yendu Kadaaɔg maad: « Yendu buad fuom nba k u tien t ninŋ nyan, g kɔn l po. » 6Yen l kul ne, u yen tien’ti ŋalbalg nba yab bonciɛnn. L po n te g Yendu Kadaaɔg maad: « Yendu kɔn yen jipaadanm i, g yen nyuan yen nunmanŋ yab jiind b kua u nunŋ n. » 7Lann, tug man i kua g cab Yendu, g yie Sitaan k wan san g fagd yen’i. 8I nagd man Yendu, k u mɔ baa nagd’i. Yinm biiddanm, nid man g nyan i biid, yinm nba waa g tɔbn tɔbn, ŋuul man i pal. 9I be man pabɔnn n ninŋ ; i buud man gii fabn. Lebd man i laad k lan te bubuul, k i pamann mɔ ń te pabɔnn. 10Jiin man i kua Yendu nunŋ n k u bu don’i. 11N naataani, daa maad man mabiid i lieb po. Yua nba maad mabiid u ninja po, lann i kaa g bu u ninja, u maad Yendu mɔmaam i l mabiid, g biɛ bu l mɔmaam. Lann l gii tie k a bu Yendu mɔmaam, a ji g tie yua cɔln l mɔmaam kaa, a ji yiin a kua buuddaan n nyan. 12Yendu kua n nyanŋ yiko g biɛ tie buuddaan. Wano kua n bu fid g fiel nil, lann i kaa g biɛn’o. K fin yua n bu a lua nyan, a mɔ yi a kua ŋmaa i ? 13Cenŋ man ne, yinm nba n tua: « Dinne lann i kaa wonn, t bu gad doug ne ninŋ g tien binn, g kpend kpinkpeonŋ g la ligli bonciɛnn », 14i g ban wonn yal bu baal’i. I binbem tie bɛ i ? I tie nyan ŋunn nba tu baa l gii yann waam, lan yand nyan i. 15Yin bo tu bu maad yal nba n ne: « Yendu gii bua, t baa mɔg miɛl g sun ne, lann i kaa ne ! » 16Ama mɔlane, i mɔg jipaad g donŋ i kua. L jipaabuolu mɔ yen g ŋan. 17Lann, yua nba kul ban yal dagd yen wan sun g yen g sun, l daan tun u kua biid i.

will be added

X\