Saak 1

1Min Saak, n tie Yendu yen Yonmdaan Yiesu tuonsunn i. Min n da kadaaɔg ne g tien yinm Israyɛl cuga piig yen ŋanle niib nba yad g be ŋanduna n ninŋ kul. N fuond’i. 2N naataani, bigna nba baal’i kul, yin tuo k l tie pamann i po. 3G dugn i ban g bigna gii baal’i k i g buon i dindann, l bu ŋanm g pugn’i juunn i. 4Ama mɔnd man gii mɔg juunn saa yen juog, g fid g te niib nba cie, k b yam gagd, g siɛl g pɔd’b. 5I ninŋ ne l gii tie g yanfuom pɔd sua, wan miɛl Yendu k u bu te’og. K l maa Yendu tien yua kul yen bulcind, g g jalg baa sua. 6Ama l bual k l daan gii miɛl, wan gii daan k u bu la g daa mali munle-le. Yua nba mali munle-le tie nyan faalu n donŋ mɔgl nyunguonn nba g lunn nyan i. 7L nibuolu ń daa mali k u bu la siɛl Yonmdaan buol. 8U tie yaa daan nba kan fid g suol bonyenn i. U waa g tɔbn tɔbn i. 9T naataani n ninŋ yua nba tie talg, u pal ń gii man yen Yendu n donŋ’o, 10yua nba tie mɔgd mɔ yaa pal ń gii man yen Yendu n jiind’o, g dugn mɔgd tie nyan mɔpuug nyan i, u kan wai yen wan kuol. 11Yendu gii siid yaa youg g cua muaɔg, u tu kuol i, u puug ń suod. U ŋanu po ń juab. L baa tie nnyan i mɔgd mɔ yaa po. Wan mali yaa youg k u tuona bu sonm nyan, l youg n tie u kuum. 12Nil nba g bignn baal’o k u juun g kub u dindann, pamann tie u yal i. G dugn wan ŋɔn k u mɔg juunn nyan, u bu la nyuad nba g Yendu bo puon k u bu te yab nba bua’ɔg: lan tie miɛl. 13Bignn gii baal nil, wan daa tua g Yendu n bign’o. G dugn siɛl kan fid g bign Yendu wan tien bonbiil, Yendu mɔ biɛ g bignd sua. 14Ama nil maalbiid n bɔnd’o, g diɛl’o g kuand’o bigna n ninŋ. 15U gii baa l bigna n ninŋ, u tu tien biid i, l biid mɔ tan gii yend u binbem, lan baal yen u kuum. 16N naataani, i ji daa bɔnd i kua man. 17Paab nba ŋan g dagd kul nya polu po i, t Baa buol. Wano n tag yendu, yen ŋmaalg, yen ŋmaabid k l sonm g tien yinyiem yen bunbɔnn k l lebd liel, ama wano nuan g lebd. 18U buam n i, k u tug’ti g tien u bid u maam nba tie mɔni nyan po, k wan tag yal nba kul n ninŋ, tin gii tie liig yab. 19N naataani, l tie k yin bann ne i. Tu cenŋ man ban maad’i yal, g mali u g fid g jiin. I pal ń biɛ daa be tonm tonm. 20G dugn nil nba k u pal bie kan fid g tien yal ŋan Yendu nunŋ n. 21Lann, ŋaa man tuonjɔgna kul yen bontitebiid kul, g jiin i kua g tuo g gaal Laabamann nba g Yendu bul i pal n ninŋ nyan, g dugn l Laabamann mɔg paalu g bu fid g fiel’i. 22Daa tu kpi man yam gii cenŋ kukua kaa, i tu gii gbad l Laabamann yin tug g sun yen tuonn, lann i kaa i bɔnd i kua i. 23Mɔni, nil gii gbad Laabamann g g tug g sun yenn tuonn, u tie nyan nil nba tu diid u kua ninnyuandg n ninŋ nyan i, g la u nunŋ po n naan nand. 24U gii diid u kua g gbenn g paan g saa, wan sunm l youg mɔno wan naan nand nba. 25Ama nil gii kpaan g fiid g bua k wan bann yiko nba ŋan g dagd, yal bu fid g nyan nil yabl n ninŋ, u gii ŋanm g ciib l n, g biɛ g tie nil nba tu cenŋ l yiko g sunm, ama g tie nil nba tu tug l yiko g sun yen tuonn, pamann tie u yal i, tuonn nba k u sun nyan po. 26Nil gii yed k u jaand, g yen kan fid g suol u mɔb, u bɔnd u kua i. U jaad u kua i k u jaand. 27Nil n baa suun yal nba t Baa Yendu nunŋ n, lan ŋɔn k u jaandi ŋan g biɛ tuag sɔnu n ne: u baa tod kpiebi yen pekɔa b cicagm n ninŋ, g biɛ daa ŋaa ŋanduna bona ń kuan’o biid n.

will be added

X\