Ebro-nba 9

1Yendu n bo kpiɛ g suol dɔnnu nba yen niib nyan, l dɔnnu bo mɔg yiko‑nba nba ŋɔnŋ’b ban baa dond’o nand nba yen ban baa dond’o naan nba ninŋ tinŋ po ne. 2Yen mɔni, b bo pua Yendu-cend‑buol-jounŋ u, k l mɔg gɔnn n yen denuagn. Gɔnn n ninŋ i k b bo yi ŋand buol k l mɔg ban tu son fida g tuan yal nba po, g tiebl sie k b maand l po kpanu nba k b piin Yendu paab. 3G cincenciɛɔnŋ juan g paad gɔnn n yen denuagn. L cincenciɛɔnŋ linn po n tie denuagn k b yi ŋand yaa ŋand buol. 4L ninŋ bo mɔg binbindl nne k b tabn wula l munn kul po, g juug ŋuba l po, g biɛ mɔg Yendu dɔnnu kpaɔg k b tabn l po mɔ wula l munn kul po. L kpaɔg n ninŋ bo mɔg sual nne k b tien yen wula, g jied nba k b yi mann nyan be l n. Aharɔn lanbann nba bo bund fapaand nyan bo kpie l n i. G tanpipaba nba k b bo diɛn Yendu Mɔmaam l po nyan mɔ kpie l kpaɔg n. 5B bo naan malɛg‑nba nba k b yi’b serubɛn-nba nyan, g tuan l kpaɔg bonbiil po, k l ŋɔnŋ g Yendu mɔno be l buol. K b kpinkpana sɔnŋu yil ban tu mii sɔm naan g Yendu ń di sugl b biid po nyan. Ama youg yen g cab k tin gii maad maam bonciɛnn l po mɔlane. 6Ban bo sen bona kul nand nba n nyan, g salg-yidkab kua Yendu-cend‑buol-jounŋ gɔnn n, g suun b tuonn. 7Ama denuagn ninŋ nuan, Yendu salg-yidkab kul ciɛn kua n bo kua binn n ninŋ taal yenm kua. U bo g kua l n ninŋ g g diɛ bonkobg sɔm g bu yid Yendu salg, k wan di sugl wano mɔno biid po yen niib n tud g tien biid nba po. 8Nnyan i g Foŋanm ŋɔnŋ’ti g sɔnu nba saa g kua polu po Yendu-cend‑buol-jounŋ n daa kan luod youg nba g tinŋ n yal daa be. 9L tie bonn nba tie mɔlane yaa ninnaɔnŋ u. L niimn tie g paab nba k b piin Yendu yen salg nba k b yid’o nyan kan fid g te g yua suun nnyan pal n ninŋ ń gii ŋan canyiin. 10L kul ne tie bogda nba tie gbannand yal i, g nyuan jied po yen daam po yen ban baa ŋami b kua nand. L bogda bo tie yal nba g niib bo baa cɔln saa yen youg nba g Yendu bo tan bu guan g lebd bonpaann i. 11Ama Kristo n baal g te Yendu salg-yidkab kul ciɛn nba baal yen bonŋana nba ne g tie’ti. Wan kua Yendu-cend‑buol-jounŋ nba ninŋ, l jounŋ mɔn bonn kul n ninŋ g cie jounŋ nba bo be. Niib kaa caan l jounŋ, l jounŋ biɛ g tie tinŋ n ne yal kaa. 12Kristo kua yenm kua i denuagn, wan kua u g tug ŋɔbɔa yen naatonpaani sɔm kaa g yid Yendu salg, u tug wano mɔno yaa sɔm i g yid salg g nyan’ti biid n ninŋ mɔlane yen youg nba g mɔg gbennu. 13L gii tie k b tu tug ŋɔbɔa yen naatonpaani sɔm yen naasal nba k b tu kod g juu yaa fantam g pag niib nba tien biid po, k lan nyan’m jɔgnd n, 14l bu tien nle i g Kristo sɔm yen ji kan ŋanm gii mɔg paalu g cie l kul ne i ? Foŋanm nba be youg ń tuu youg te k wano mɔno tug u kua g yid Yendu salg nyan bonkobg nba ŋan g dagd nyan, k u sɔm piin tuonbiid t pala n ninŋ k lan gii ŋan canyiin k tin fid gii tie Yendu nba fo tuonsunna. 15L po n te g dɔnnpaanu nba g Yendu suol yen niib nyan g Kristo tie l sandindaan. U kpe k wan nyan danm nba bo tu be biid n ninŋ dɔnnkpelu youg g Yendu yiin’m nyan, k ban fid g di faal nba g mɔg gbennu g Yendu bo puon’m nyan. 16Mɔni, nil gii diɛn g ŋɔn ban bu di u faal nand l gii tie k u kpe, l tie k u kuum puol po ban ŋɔn k u kpe yo g fid g di l faal. 17Youg nba g yua nba diɛn u faadinu kadaaɔg daa be g mɔg miɛl, l kadaaɔg daa g tie bonmɔnn. U kuum puol po i, k l kadaaɔg ji baa tie kadaaɔg nba mɔn. 18L po n te g Yendu n bo kpiɛ g suol dɔnnu nba yen u niib nyan, k l bo bual k ban kpi bonkobg g wul sɔm o, l dɔnnu ń fid g cil. 19Yen mɔni, Moyis n bo ŋɔn Yendu buolu kul Yendu Mɔmaam nyan lan diɛn nand Yendu Mɔmaam kadaaɔg n nyan g gbenn, u bo tug tiig nba k b yi isɔp nyan faad i g lol yen cabmɔnn nba k b tien yen pieog kobd, g nyua ŋɔbɔa yen naatonpaani sɔm nba ŋmad yen nyum nyan ninŋ, g cind g mii Yendu Mɔmaam kadaaɔg po, g yuand g mii mii niib po, 20g maad: « Sɔm ne tie Yendu n suol dɔnnu nba yen’i g yed k i gii cɔln nyan sɔm i. » 21Lann i g Moyis biɛ mii mii l sɔm Yendu-cend‑buol-jounŋ po yen bona nba kul k b bo diɛ g dond Yendu nyan po. 22L diɛn Yendu Mɔmaam kadaaɔg n g maad k b tu tug sɔm i g ŋanm bona bonciɛnn k lan gii ŋan g daa mɔg siɛl yaa jɔgnd, g sɔm gii g nyiɛ, Yendu kan di sugl niib biid po. 23Lann, l gii tie k b tu ŋanm bona nba tie polu po bona yaa ninnaɔnŋ nnyan, l bual g salg nba cie niib n yaan tie yal nba nyan i ń ŋanm polu po bona mɔno. 24G dugn Kristo g kua Yendu-cend‑buol-jounŋ nba ninŋ g niib caan kaa. L jounŋ bo tie polu po jounŋ mɔno yaa ninnaɔnŋ u. Ama u kua polu po Yendu-cend‑buol-jounŋ n mɔno i k wan gii be mɔlane Yendu nintual n g maad yen’o t po. 25Kristo nuan kua l n ninŋ yenm kua i g tug u kua g yid salg t po. U g tun g kua nyan Suif‑nba Yendu salg-yidkab kul ciɛn n tun g kua binn kul denuagn ninŋ yen bonkobg sɔm nyan kaa. 26L bo gii tie nnyan, man ne Kristo g luol g cagn taal fuunu munŋaa hal ŋanduna n cil o. Mɔni, dana nba k t be k l ji tie dijijuog dani n ne, Kristo ŋɔn u kua taal yenm i, g tug u kua g yid salg k wan piin niib biid. 27T ban g nil kul bu kpe yenm kua i, l puol po Yendu n bu’ug. 28Nnyan i g Kristo mɔ tug u kua g yid salg taal yenm kua k wan piin niib bonciɛnn biid. U tan bu guan g baal k l ji g tie k wan piin biid kaa, ama l ji baa tie k wan fiel yab nba guu u baalu i.

will be added

X\