Ebro-nba 7

1Wano Mɛlkisedɛk bo tie Salɛm bad i, g biɛ tie Yendu Badciɛn salg-yidkua. Abraham n bo pua tɔb g paad batieb, g leb g kun, wano Mɛlkisedɛk n bo tuog’o, g yad yedŋanm u po. 2K Abraham tug wan bo pua tɔb g fiel yal nba kul, g bɔgd taal piig, g tug yenn g tie Mɛlkisedɛk. Yenm, Mɛlkisedɛk sann niimn tie bad nba tie mɔnkundaan. G munle po k u tie Salɛm bad, k l niimn tie laafiɛ bad. 3Sua g ban Mɛlkisedɛk naa lann i kaa u baa, lann i kaa u yaaja sua. L g diɛn siɛl buol g maad u mad daal po lann i kaa u kuum po. U tie nyan Yendu Bija nyan i, g baa tie salg-yidkua youg ń tuu youg. 4I la Mɛlkisedɛk n bo tie nigbenŋl nba waa ! T yaaja cincinn Abraham mɔno bo tug wan bo pua tɔb g fiel yal nba kul, g bɔgd taal piig, g tug yenn g tie’og. 5Moyis yiko bo cab Lefi yaabuona nba tie salg-yidkab nyan, k ban gii gaan Israyɛl yab buol ban la yal binn n ninŋ, l bɔgdm piig n ninŋ yenn. B ninjanm Israyɛl yab buol i, k b bo tu gaan, k b mɔ yen tie Abraham yaabuona i. 6Mɛlkisedɛk nuan bo g tie Lefi yaabuonn kaa, ama u yen bo gaal Abraham n bo pua tɔb g fiel yal nba kul bɔgdm piig n ninŋ yenn, g biɛ yad yedŋanm wano Abraham nba bo gaal Yendu puoni nyan po. 7L g mɔg tama tama, sua kul ban g yua nba tie ciɛn n tu yad yedŋanm big po. 8Lefi yaabuona nba gaan niib n tu la yal binn n ninŋ bɔgdm piig n ninŋ yenn nyan tie niib nba tan bu kpe i. Ama Mɛlkisedɛk nba gaal Abraham buol bɔgdm piig n ninŋ yenn nyan nuan, tie yua nba fo i, nyan lan diɛn u po nand Yendu Kadaaɔg n nyan. 9T bu fid g maad k Abraham n bo tie Mɛlkisedɛk bɔgdm piig n ninŋ yenn nba nyan, g Lefi mɔ bo tie u yal n nyan, wano nba k u yaabuona gaan niib n tu la yal binn n ninŋ bɔgdm piig n ninŋ yenn. 10G dugn Mɛlkisedɛk n bo cend Abraham youg nba nyan, l bo sua k wano Lefi daa be Abraham sɔm n ninŋ i, k b daa g mal’o. 11Yendu bo tie Israyɛl yab u yiko, k l yiko ŋɔnŋ g Lefi cugl n yab kua n baa tie salg-yidkab. Ama l bo gii tie g salg nba k b bo yid nyan te k Israyɛl yab ŋan canyiin Yendu nunŋ n, salg-yidkua nba bo bu baal kul bo baa tie nyan Aharɔn nyan i. L salg n bo kan fid g te g niib ń gii ŋan canyiin Yendu nunŋ n nyan po n bo te g salg-yidkafano baal g tie nyan Mɛlkisedɛk nyan. 12Lann, l gii tie g salg-yidkadinu lebd, l tie g yiko mɔ ń lebd i. 13T Yonmdaan nba g Yendu Kadaaɔg maad u po ne, u tie cugfann n ninŋ yua i. L cugl n ninŋ, baa sua g ban g sun salg binbindl tuonn. 14Sua kul ban k t Yonmdaan tie Suuda cugl n jua i. Moyis kadaaɔg n ninŋ, naan buol nba k u maad salg-yidkab po, u g maad baa siɛl l cugl po. 15Diid man, yal nba te k l ji ŋanm g fand t nuni po tie g salg-yidkafano baal g tie nyan Mɛlkisedɛk nyan. 16Wano g te salg-yidkua nyan yab nba g yiko bo lugd b cugl nyan kaa. Wan mɔg miɛl nba kan ban g gbenn paalu po i, k u te salg-yidkua. 17Yen mɔni, l diɛn Yendu Kadaaɔg n g maad u po k nne: « Fin n tie salg-yidkua youg ń tuu youg nyan Mɛlkisedɛk nyan. » 18Nnyan i k b piin yiko nba bo kpiɛ g be, g dugn l yiko bo g mɔg paalu, l biɛ bo g mɔg nyuad. 19Yen mɔni, yal l be ŋanduna n ninŋ kul, Moyis yiko bo g fid g te k l ŋan canyiin Yendu nunŋ n ninŋ. Ama Yendu n ji yuand g baal yen dindann nba t po ne ń ŋanm g mɔn. Lann n bu fid g te tin nagn Yendu nunŋ n. 20Yal nba pugn tie g Yendu biɛ bo puon puoni i g pol. Lieb nuan te salg-yidkab g siɛl yaa puoni g pugn l po. 21Ama Yiesu nuan, yua nba din’o salg-yidkua bo puon’o g pol g maad’o: « Min Yonmdaan n puon ne g pol, min yed yal lann n bu tien, n kan ban g lebd: “ A baa tie salg-yidkua youg ń tuu youg ”. » 22Nnyan i g Yiesu po, Yendu n ji suol dɔnnu nba yen’ti ŋanm g mɔn bonciɛnn. 23Yal n biɛ pugn tie g yab nba bo te salg-yidkab bo yab g dugn kuum bo te k b kan fid gii tun g be g suun b tuonn. 24Ama Yiesu nuan l fo i youg kul, k u salg-yidkua tuonn g mɔg gbennu youg ń tuu youg. 25L po n te k u mɔg paalu nba g mɔg gbennu g bu fid g fiel yab nba nagd Yendu g dugn u po, k l maa wano l fo i youg kul g jaand g miɛd Yendu b po. 26Lann, Yiesu n tie salg-yidkab kul ciɛn nba dagd yen’ti. Wano i g Yendu pal man u po, k u g kpiɛdl, g biɛ g mɔg siɛl yaa biid, k u paad’o yen biiddanm, g don’o polu yaa polu. 27Wano g tie nyan salg-yidkab ciɛnlieb nyan kaa. L g bual g daal kul wan tu kpiɛ g yid salg u biid po o, g yuand g yid salg niib biid po. U tug u kua i g yid salg yenm kua. 28Moyis yiko n bo kaand salg-yidkab ciɛnm nba nyan bo tie yab nba bu fid g tien biid i. Ama Moyis yiko puol po, Yendu maad i, g pol g kaan u Bija k u ji baa tie salg-yidkab kul ciɛn nba dagd yen wan sun u tuonn youg ń tuu youg.

will be added

X\