Ebro-nba 5

1B tu lugd salg-yidkab kul ciɛn kul niib siign i, g kaan’o k wan gii suun Yendu tuonn niib po. U tuonn tie k wan tu pi Yendu paab i, g biɛ yid’o salg niib biid po. 2Nyan wano mɔno n tie gbalmdaan nyan, lann u bu fid g sɔnŋ yam g tod yab nba tie yanbɔndanm g tud sɔnu. 3L gbalm po i k l bual k wan tu yid salg, l g tie niib biid po kukua kaa, ama yen wano mɔno biid po. 4Sua g ban g din u kua yudand k wano n tie salg-yidkab kul ciɛn, ama Yendu n tu din nil nyan wan bo din Aharɔn nand nyan. 5L biɛ tie nnyan i Kristo mɔ yaa po. Wano mɔno kaa bo din u kua yudand k u tie salg-yidkab kul ciɛn, ama Yendu n bo din’o g maad: « A tie n Bija i, dinne min n tie a Baa. » 6G biɛ maad liel buol k nne: « Fin n tie salg-yidkua youg ń tuu youg nyan Mɛlkisedɛk nyan. » 7Yiesu n yaan bo be tinŋ po ne, u bo jaand g don niɛlu g buud g fabn g miɛl Yendu nba bu fid g nyan’o kuum n. Wan bo jiin u kua Yendu nunŋ n nyan po n te k u bo cenŋ u jaandi. 8Yen wan bo l tie Yendu Bija kul, wan bo cagn cicagbuolu nba kul bo te k u bann cɔlnn. 9Wan bo sun u tuonn kul g gbenn canyiin yaa youg nba, k u te g yab nba cɔlm’o kul la fielu nba g mɔg gbennu. 10G Yendu din’o salg-yidkab kul ciɛn Mɛlkisedɛk salg-yidkadinu sɔnu n ninŋ. 11T mɔg bona bonciɛnn g bu maad’i l po, ama l yen paa yen tin ŋanm g ŋɔn’i l niimn yin gbad g dugn i g gbiɛ bona niimn tonm. 12Lan pund yaa youg nba ne l ji bo bual k yinm ń gii tie canbaa‑nba i gii tund niib. Ama k i yen biɛ daa bua k ban gii tund’i ban tu kpiɛ g tund nil yal Yendu maam po. L ji bo tie k yin gii di jied nba kpai i, k i ŋaa lann o, g biɛ guan g bua biim. 13Yua nba mual biim mɔ yen daa tie sanpandg i. U daa kan fid g paad bonŋann yen bonbiil. 14Ama jied nba kpai tie ciɛnm yal i. Ban tun g di l jied nyan, banm n bu fid g mali g paad bonŋann yen bonbiil.

will be added

X\