Ebro-nba 3

1N naataani, yinm nba tie Yendu yab k u yiin’i k yin taan g te u buolu nyan, lann, i ninbina ń gii maa Yiesu po. Yendu sun wano i k tin dug yal nba po g maad niib nunŋ n nyan, wan gii tie l salg-yidkab kul ciɛn. 2U bo lugd wano i k wan sun l tuonn, k u biɛ sun l tuonn lan bual nand nyan Moyis n bo sun nand Yendu ŋaag n yab po g g kpiɛd nyan. 3Yiesu bo dagd yenn i g gaal yudand nba yab g cie Moyis yal. L tie nyan tanmaal n tu maa ŋaag nyan i. B tu pag tanmaal i, b g pag ŋaag kaa. 4Yen mɔni ŋaag kul mɔg yua nba maa’ɔg u. Ama Yendu n maa bonn kul. 5Moyis bo tie tuonsunn i, g sun lan bual nand Yendu ŋaag n yab po. U tuonn bo tie k wan gii ŋɔnŋ niib Yendu n bo tan bu maad yal i. 6Mɔlane Kristo n ji suun lan bual nand. Ama wano tie Yendu Bija i, g mɔg nuu u Baa Yendu ŋaag po. Tinm n tie u ŋaag, l gii tie k t pala paa k t biɛ mɔg pamann tin daan yal nba po. 7L po n te g Foŋanm maad k nne: « Dinne, i gii gbad Yendu niɛlu, 8yin daa nyal i tuba nyan i yaajanm n bo yie k b kan cenŋ Yendu, g bign’o youg nba k b bo be tinkuonŋ n ninŋ nyan. 9Yendu bo maad: “ L tinkuonŋ n ninŋ i, k i yaajanm bo bign’n k ban diid’n, yen ban bo l la n tuona 10bina piinna siign kul. Lann i k n pal bie b po k n maad: ‘B l tun g tud sɔnu i, B g bann n sɔni.’ 11L pabienn n ninŋ k n pol g maad: ‘B kan ban g kua doug nba ninŋ k min Yendu bo bobn b po, k ban kua g fuod nyan.’ ” » 12Lann n naataani, suol man i kua k i ninŋ baa sua ń tan daa mɔg maalbiiug u pal n ninŋ, g yie g nyɔl dindann k lan fagn’o yen Yendu nba fo. 13Ama i paand man i lieb pala daal ń tuu daal yaa youg nba k t ji be ne, k i siign ninŋ sua ń tan daa baa biid n ninŋ k lan te k wan yie Yendu. 14Yen mɔni, t te Kristo yegni n nyan, l gii tie k t ŋanm g sie k l paa saa yen juog, nyan tin bo kpiɛ g sie nand nyan. 15Lan diɛn Yendu Kadaaɔg n g maad yal nba n ne: « Dinne, i gii gbad Yendu niɛlu, yin daa nyal i tuba nyan i yaajanm n bo yie k b kan cenŋ Yendu nyan. » 16Yen mɔni, b lɛ n bo gbad Yendu niɛlu u, g yie g g cenŋ’o i ? L g tie yab nba kul bo nyiɛ Esipt doug n ninŋ g Moyis ŋmagd’b nyan kaa aa ? 17Yendu pal bo bie b lɛ po i bina piinna siign i ? L g tie yab nba bo tien biid g kpe tinkuonŋ n ninŋ nyan kaa aa ? 18K b lɛ i g Yendu bo pol g maad k b kan ban g kua doug nba ninŋ k u bo bobn b po k ban kua g fuod nyan i ? L g tie yab nba bo yie k b kan cenŋ’o nyan kaa aa ? 19Lann t la k b bo g fid g kua g dugn b bo g dug Yendu po.

will be added

X\