Ebro-nba 2

1L po n te k l bual k tin ŋanm g gaal tundl nba k t gbad g tan daa tud sɔnu. 2G dugn malɛg‑nba n bo muand t yaajanm laabaal nba gii tie yal nba g niib dug l po, k l biɛ bo gii tie g nil kpiɛd g g cɔln l laabaal, k l baal yen tubdadu u po k l dagd yen wan kpiɛd nand nba nyan, 3l ji bu tien nle i k l kan baal yen tubdadu t yaa po, l gii sua k t nyɔl g g yiin l fielu maam nba mɔn nyan siɛl i ? G dugn Yonmdaan mɔno n bo kpiɛ g maad l fielu maam. G yab nba bo gbad maad’ti k l maam tie mɔni. 4G Yendu mɔ ŋɔn k l maam tie mɔni g sun yaalidug yen palug tuona, g biɛ pii niib Foŋanm paab nyan u yam n bua nand nyan. 5Yen mɔni tin maad ŋanduna nba po ne, Yendu g cab malɛg‑nba kaa k ban gii mɔg nuu l po. 6L yen diɛn Yendu Kadaaɔg n siɛl buol k nne: « Yendu, nifosaal tie bɛ i, k a baa tiɛn u po i, Nifuog tie bɛ i, k a baa nyuan u ninŋ i ? 7A bo yuan’o youg waam nne g malɛg‑nba cie’og, g yuand g tie’og yudand yen sel, 8g te k u mɔg nuu bonn kul po. » Yendu n bo cab’o k u mɔg nuu bonn kul po nyan, siɛl g tenn k u g mɔg nuu l po. Ama tinm yen daa g nyuan k u mɔg nuu bonn kul po. 9G nyaan tin la yal nba n ne: yua nba g Yendu bo yuan’o youg waam nne g te g malɛg‑nba cie’og nyan, Yiesu i. Ama mɔlane Yendu guan g tie’og sel yen yudand, g dugn u tuo g cagn g kpe niib kul po. Yendu ŋalbalg po i k u tuo l cicagkuum. 10Yen mɔni, Yendu n tag bonn kul, bonn kul tie u yal i. U bo bua k u bid bonciɛnn ń gaal u yudand i. L po n te k l bo dagd yen wan te g Yiesu ń gii tie yua nba dagd yen wan sun u tuonn, g dugn wan tuo g gaal fala nba nyan po. Yiesu n kon tie yua nba luod sɔnu g te g lieb la fielu. 11Wano n te g niib ŋan g dagd Yendu po. Wano yen yab nba k u te k b ŋan g dagd Yendu po nyan kul taa Baa i. L po n te k u g jie fai yen wan yiin’m u ninjanm, 12g biɛ maad: « N bu ŋɔn n ninjanm ŋan tie yua nba, a tintaanu siign min yin g dond’a. » 13G Yiesu biɛ maad k nne: « N baa dug n Yendu po i. » G biɛ maad: « Min yen bid nba g Yendu kubn’n n nyan. » 14Lann, nyan l bid n tie nifoi g mɔg gbannand yen sɔm nyan, Yiesu mɔ bo te nifuog nyan banm nyan i, g kpe k wan biil Sitaan, yua nba mɔg paalu kuum po, 15g yab nba k b binbem ninŋ kul k b bo jie kuum g tie yonmi nyan, wan nyan’m l n ninŋ. 16Yen mɔni Yiesu bo g baal k wan tod malɛg‑nba kaa, u bo baal k wan tod Abraham yaabuona i. 17L po n te k u bo bu nand canyiin yen u ninjanm k wan fid g te salg-yidkab kul ciɛn nba jie niib ninbaaɔg, g ciib Yendu tuonn n ninŋ. Nnyan i k u bu fid g tug u kua g yid salg g piin niib biid. 18Bignn n bo baal’o k u la fala bonciɛnn nyan po n te g yab nba g bigna baal’b, k u bu fid g tod’b.

will be added

X\