Ebro-nba 12

1B yaa kul ji tie sieda‑nba i g kaan g lind’ti. L yaa po, t mɔnd g feg g lu tuga nba kul te k t kan fid g sonm, yen biid nba nya kaannaa kul g jalg’ti tonm tonm nyan. Lann, tin mɔnd man g juun g san g pund ban yed k tin san g gad naan nba. 2T gii siɛn, t ninbina ń gii maa Yiesu po. Wano n luod sɔnu g te k t mɔg dindann g biɛ bu te l dindann ń cie lan bual nand. U tuo k b kpaa’ɔg dapunpɔnn po, g g jie fai yen wan kpe l kubuolu. G dugn u bo tuod g ban g Yendu bu te wan gii be pamann n, g mɔlane k u ji kal Yendu badkog nuujendu po. 3Diid man Yiesu n juun g gaal fala nba kul g biiddanm bo ŋɔnŋ’o. Nnyan i k i mɔ kan ŋaa k lan wad i pala k i ji nyɔl g ŋaa. 4Yin yied g g bua k i tie biid nyan, i daa g ban g yie biid tienu hal k l tan baal yen i kuum. 5I g tiɛn Yendu n bo maad’i yal g paan i pala nyan bibaa n tu cegi u bid nand nyan ii ? U bo maad: « N big, Yonmdaan gii cegl’a, ŋan tug g sun yenn tuonn, u gii fu yen’a, ŋan daa wad a pal, 6g dugn Yonmdaan cegi yua nba k u bua’ɔg u, g yua nba kul k u tuo k u tie u big, u diɛl u yaa tubl i. » 7Juun man g gaal fala gii ban k l tie cegli i. Yin tie u bid po n te k u tie’i nnyan. Bilanŋ i, k u baa kan cegl’o i ? 8L gii tie k u g cegl’i nyan wan ceg’i bilei kul nand nyan, lann l ŋɔn k i tie kpiɛba i, k i g tie u bid kaa. 9I tiɛn k t baa‑nba nba tie niib tu cegi’ti, k t cɔln’m ; k l ji bu tien nle i, k t kan tuo g gaal t Baa nba be polu po cegli g la miɛl i ? 10Youg nba k t baa‑nba bu fid g cegl’ti nyan ban bua nand nyan, l tu g yab. Ama Yendu nuan tu cegl’ti k lan gii ŋan t po i, k tin fid gii ŋan canyiin nyan wano Yendu nyan. 11B gii cegi nil youg nba, u pal tu g man l po, u pal tu wad i. Ama l puol po, yab nba juun g gaal l cegli n laad nyuad nba tie yanduanm yen binbem nba dagd. 12L yaa po, ŋanm g sed man g biɛ gii diɛ man k l paa. 13Ko man sɔni nba soni, nnyan diɛnŋ tital ji kan sag kaa, l bu paag i. 14Mɔnd man g manu ń gii be yinm yen niib kul siign, k i biɛ gii ŋua Yendu yen i pal kul. Lann i kaa, baa sua kan la Yonmdaan. 15Guul man i kua k i ninŋ sua ń daa ŋaa Yendu ŋalbalg ń ciɛl’o. Sua ń daa tie nyan tibiig nyan, g pa i siign ninŋ g baal yen ŋmadl i po. 16I ninŋ, sua ń daa tie cunconm, sua ń biɛ daa juab bona nba tie Yendu yal g yiinn fam nyan Esaayu n bo kuad u nikped g gaal jied g dii taal yenm kua nyan. 17I ban k l puol po, u ji bo tan kpaan k u baa ń yad yedŋanm u po ama k u baa yie g bel’o. K u buud g mɔ kua g sua g youg pend o, g dugn l ji bo g mɔg lebdu. 18Yinm n yaan nagn Yendu buol, i g la yen i ninbina g biɛ gbad bona nba k Israyɛl yab bo la g biɛ gbad Sinaayi jual po. Lan tie muupienu nba bo so yen bunbɔncild yen faaciɛnu nba bo fu. 19B biɛ bo gbiɛ naatunn mɔni yen niɛlu nne k l maad. Israyɛl yab n bo gbad l niɛlu, b bo miɛl sugl k b ji g bua ban guan g gbad baa lanbonyenn g pugn. 20G dugn l maam bo paa g cie’b. L niɛlu bo maad k nne: « Yua nba gii sii jual ne, baa l gii tie bonkobg mɔno, b bu jaa’ɔg tana i g kpi’ug. » 21Yal nba bo tien bo mɔg jiwaani bonciɛnn g Moyis maad: « Jiwaani kua’n hal k n ji tan jegl. » 22Ama yinm nuan nagn jual nba buol k b yi Siyɔn i, Yendu nba fo doug. L doug n tie Serusalɛm nba be polu po. L buol i g malɛg‑nba taan lieb g g mɔg dindin g tie jaanm. 23Yin baal tintaanu nba ninŋ nyan, l tintaanu niib n tie Yendu bikpeli nba k b sana diɛn Yendu ŋaag n ninŋ. I baal Yendu buol i, wano nba bu nil kul buud. Yinm baal nimɔnm nba buol g Yendu te k b dindann cie lan bual nand i. 24I baal Yiesu buol i. Yendu n suol dɔnnpaanu nba yen niib nyan, wano Yiesu n tie l sandindaan. Wano n wul u sɔm g ŋanm’ti, k l sɔm laabaal man g cie Abɛl sɔm laabaal. 25Lann daa yie man k i kan cenŋ yua nba maad yen’i. Yua nba bo maad yen Israyɛl yab bo be tinŋ po ne i, k b yie k b kan cenŋ, k b dad b tubl. K l ji bu tien nle i k b ji kan dad t tubl, l gii tie k t yie k t kan cenŋ yua nba be polu po g maad yen’ti ni ? 26Wano nba bo maad siɛnyoug g tinŋ jeg nyan, wano n biɛ puon mɔlane g maad k nne: « N ji kan te g tinŋ kukua kaa ń jeg, n bu guan g te g tinŋ yen polu ń jeg. » 27Maam nba k u maad k u bu « guan g te » nyan ŋɔnŋ’ti g bona nba kul k u tag bu jeg g fuad g ŋaa yal nba kan fid g jeg nyan lan gii be. 28Lann, t tien Yendu balg g dugn wan tie’ti diem nba g mɔg k l jeg nyan po. T gii dond’o man nyan wan bua nand nba nyan, gii selm’o, gii jie’og. 29Yen mɔni, t Yendu tie yaa muu nba di bonn kul i.

will be added

X\