Ebro-nba 11

1Gii dug Yendu po tie k a pal n gii paa k a bu la ŋan daan yal nba, g biɛ gii diɛ a pal n ninŋ g bona nba g nil g nyuan yen ninbina l be i yen mɔni. 2Siɛnyoug niib bo dug Yendu po nnyan i, g Yendu pal man b po. 3Tin dug Yendu po i, k t ban g Yendu bo maad maam i g tag ŋanduna. U bo tug tin kan fid g la yal nba i g tag ŋanduna nba k t nyuan ne. 4Abɛl n bo dug Yendu po i, k u bo yid’o salg nba ŋan g cie Kayɛn yal. U dindann po i g Yendu bo yiin’o nimɔn g tuo g gaal u paab. Abɛl nuan kpe o ama u dindann po, u biɛ daa l maad yen’ti dinne. 5Enɔk n bo dug Yendu po nyan n te k u bo g kpe. Yendu bo nyan’o ŋanduna ne ninŋ g don’o u buol g sua ji g la’ɔg. Yendu Kadaaɔg maad g Yendu pal bo man wano Enɔk po g sua k u daa g nyan’o ŋanduna ne ninŋ. 6Lann nil nba g dug Yendu po, Yendu pal kan fid gii man u po, g dugn yua nba nagd Yendu buol, l bual k wan gii dug g Yendu be i, g biɛ gii ban g yua nba kpaan’o kul, u bu te wan do nyuad l po. 7Nowe n bo dug Yendu po i, k u bo kpaa ŋadunŋ nba yab k wano yen u ŋaag yab kua l n ninŋ g ciɛl. Yendu bo tuod g maad’o bona nba bu baal k l yen daa g nyuan yen ninbina, k u tug l kul g bil u pal n ninŋ. Nnyan i k u bo ŋɔn g ŋanduna niib kul mɔg biid, k u dindann po, g Yendu yiin’o nimɔn. 8Abraham mɔ n bo dug Yendu po i, k u bo tuo Yendu yiinu, g fiil g saa doug nba g Yendu bo bu te wan yend. U bo fiil g saa g yen daa g ban wan saa naan nba. 9Wan bo dug Yendu po nyan i, k u bo gad g tie saan g kua doug nba ninŋ g Yendu bo puon’o nyan. U bo pua jounŋ u g be l n ninŋ nyan Isaak yen Sakɔb n mɔ bo tan tien nand nyan. Banm n bo tan bu yend doug nba g Yendu bo puon Abraham nyan. 10Abraham bo tien nnyan g dugn u bo guu k wan tan kua doug nba ninŋ k l fiɛgl g mɔg begnu i. Yendu mɔno n bo diɛn l doug g biɛ maa’ɔg. 11Abraham n yaan bo dug Yendu po nyan n te, yen wan bo l ciɛnd g pend yen wan mal big, k u ŋaapuo Sara mɔ l tie ŋɔlg yal kul, g Yendu te k u mal big. Yen mɔni, Abraham bo diɛ u pal n ninŋ g yua nba puon’o l puoni dagd yen wan gii dug u po. 12Nnyan i k wano niyend nba bo ciɛnd g nag kuum nyan tan la yaabuona k b mal mal g yab nyan polu po ŋmaabid lann i kaa mɔgl n tanbiini nyan, g g mɔg dugl. 13B yaa kul ne bo tan kpe g daa l dug Yendu po i. B daa bo g gaal Yendu n bo puon’m bonŋana nba, ama b dindann po, b bo tuod g la wan bo puon’m yal nba k l daa be fagm k b pala manŋ. K b tuo k b tie saanm yen wuwaada i tinŋ po ne. 14Yaa danm nba maad nnyan ŋɔnŋ yen mɔni k b kpaan b yul po doug u. 15L bo gii tie k b maalm guan ban bo nyiɛ doug nba nyan ninŋ, man ne b bo lebd o. 16Yen mɔni, b bo kpaan k ban kua doug nba cie ban nyiɛ naan nyan i, lann n tie Yendu ŋaag. L po n te g Yendu g jie fai yen ban gii yi’ug k b Yendu, g bobn doug nba k u bu te’b. 17Abraham n bo dug Yendu po i, k u bo g yie yen wan tug u bijayenml Isaak g yid’o salg youg nba g Yendu bo bign’o. U bo tuo g yen ban g Yendu bo puon’o 18g biɛ maad’o k Isaak n tan bu te wan gii mɔg tennm. 19Abraham bo maad u pal n ninŋ g Yendu mɔg paalu g bu fid g yied nil kpienm siign ninŋ. L po n te g Yendu bo ŋmiɛn’o u bija. L bo tie yiedu ninnaɔnŋ u. 20Isaak n bo dug Yendu po i, k u bo yad yedŋanm Sakɔb yen Esaayu po k l nyuan bona nba tan bu tien po. 21Sakɔb n bo dug Yendu po i, k u bo yad yedŋanm Sosɛf bid po youg nba k u bo bua n kpe. U bo nyii u lanbanu po i g pug Yendu. 22Youg nba g Sosɛf dana ji bo g fag yen wan kpe, wan bo dug Yendu po i, k u bo maad Israyɛl yab k b tan bu nya Esipt doug n g biɛ ŋɔn’m ban tan bu tien u kpaba nand l gii tie k u kpe. 23Moyis baa‑nba mɔ n bo dug Yendu po i, k b bo mal’o g wuon’o ŋmaali yintaa g dugn b bo la g big ŋan, k b biɛ bo g jie bad n bo nyan yiko nba. 24Moyis n bo tan te ciɛn youg nba, wan bo dug Yendu po i, k u bo yie k ban daa yi’ug Faraaɔn bipuo bija. 25U bo diid g sua k u gii taan g cagn yen Yendu buolu, lann n su yen wan gii be biid n ninŋ, g di manu g yen ban k l kan wai. 26U bo diid g sua k b gii sugd’o Mɛsi po, k lann n mɔg nyuad g cie Esipt ŋalman kul, g dugn u bo nyuan nyuad nba be liig g baad k u tan bu gaal i. 27Wano Moyis n bo dug Yendu po i, k u bo nyiɛ Esipt doug n g g jie bad mutuol. U bo g lebd u maalm k l maa l bo tie nyan u nyuan Yendu nba g nil g ban g la’ɔg nyan i. 28Wan bo dug Yendu po i, k u bo te k Israyɛl yab cil g tie b Fielu jaanm, g te k b faan faan sɔm b dimɔi po, g malɛg nba kpi kuum nyan tan gii baal g la sɔm, wan daa kua g kpi b bijakpela. 29Israyɛl yab n bo dug Yendu po i, g sɔnu bo duan mɔgl nba k b yi mɔgmɔnn nyan ninŋ k b puod tinkuonŋ. Ama Esipt yab n yaan bign k ban mɔ n puod, g nyum dii’b. 30Ban biɛ bo dug Yendu po i, k b bo tu sonm g lind Seriko doug guonjal daal kul g daan biin daa nlile, k l guonjal baa. 31Puocunconn nba k b bo yi’ug Rahaab nyan, u mɔ n yaan bo dug Yendu po i, k b bo kpii yab g cɔln Yendu nyan g ŋaa’ɔg, g dugn u bo gaal Israyɛl niib nba bo baal g bua n suli doug nyan. 32N biɛ bu maad bɛ i g pugn i ? N gii yed k n ŋanm g maad Sedeyɔn po yen Barak po yen Samsɔn po yen Sɛfte po yen Dafiid po yen Samiɛl po yen Yendu sogni‑nba po youg bu pɔd’n o. 33Ban bo dug Yendu po i, g yenm bo pua tɔb g paad batieb g fiel b tini, g lieb tɔgn mɔnkund sɔnu, g lieb gaal Yendu n bo puon’m yal nba, g lieb mɔ mubn yanbɔla mɔi, 34g lieb mɔ junn muupienu nba bo so, g lieb mɔ ciɛl k b g fid g kpii’b yen jug, g lieb mɔ bo g mɔg paalu g ji tan kpand paalb, g lieb mɔ pua tɔb g paad buolfanu sijenm g bel g yaan’m. 35G puosiɛb mɔ, k b yied b niib g guan g ŋmiɛn’m. Nilieb mɔ, b bo cagn’m bonciɛnn g kpaan k ban ŋaa Yendu sɔnu i g la miɛl, k b mɔ yie. Yen mɔni, b bo yie g dugn b bo bua ban tan yied kpienm siign g ji gii be binbem nba ŋan g cie b binbekpelm i. 36G lieb mɔ k b sugl’b g puab’b naapuna, g tan lol’b yen kudsiseli mɔno, g luon’m dansaldieog n. 37G jaa lieb tana g kpii’b, g pod lieb yen kanpinda jug, g kpii lieb mɔ yen jug. Siɛb mɔ bo tie tali i g waa g tuan g liɛ pegband lann i kaa ŋɔgband, g niib cagn’m g ŋɔnŋ’b fala. 38B bo waa tinkuoni n ninŋ yen jɔa n ninŋ, g dua tanfali n yen fali n ninŋ. L niib bo tie nimɔnm i. Ŋanduna ne niib bo g dagd yen ban gii be b siign. 39Niib ne kul n bo dug Yendu po i, k b bo kun mɔni b po k l ŋan. Ama b yen bo g gaal Yendu n bo puon k u bu te’b yal, 40g dugn Yendu bo tuod g bobn t po yal nba ŋanm g ŋan g cie liel‑nba i, lann n tie k ban daa liid g pund t dindann n saa yen’ti naan g ŋaa’ti.

will be added

X\