Ebro-nba 10

1Moyis yiko tie bonŋana nba baad yaa junjunŋ u. L g tie yal nba be yen mɔni kaa. L po n te g salg nba k b tu yid binn ń tuu binn nyan kan fid g te niib nba nagd Yendu buol ń ji daa mɔg biid. 2L bo gii tie k l salg yidu bo fid g te g niib ŋan canyiin Yendu nunŋ n, b bo bu yid yenm kua i g ji ŋaa, k lan ŋanm’b k ban ji daa mɔg biid. 3Ama salg nba k b tu yid nyan tu te ban guan g tiɛd b biid po binn kul. 4Yen mɔni, naatonpaani yen ŋɔbɔa sɔm kan fid g piin nil biid. 5L po n te g youg nba g Kristo bo bu jiid tinŋ po ne, k u bo maad Yendu: « A g bua padg a biɛ g bua siɛl yaa paab mɔ. A yen tag gbannand g tie’n. 6A g bual g sua ń kod bonkobg g juu g yid’a salg a biɛ g bual g sua ń kod bonkobg g te’a k a di sugl u po. 7Lann i k n maad: “ N Yendu min n nyan, n baad tinŋ po ne k min tien a buam nyan lan diɛn a Mɔmaam kadaaɔg n ninŋ n po nand nyan i. ” » 8Kristo n bo cind g maad yal n ne: « A g bua padg, a biɛ g bua siɛl yaa paab mɔ, a g bual g sua ń kod bonkobg g juu g yid’a salg, a biɛ g bual g sua ń kod bonkobg g te’a k a di sugl u po. » K b yen bo tie l salg kul nyan lan diɛn Yendu Mɔmaam kadaaɔg n nand nyan i. 9K u biɛ pugn g maad: « Yendu, min n nyan, n baad tinŋ po ne k min tien a buam i. » Nnyan i g Yendu yiin salg nba bo kpiɛ g be kul fam, g te g Kristo salg ji gaal l yiɛl. 10Yiesu Kristo n tien Yendu buam g tug u kua g yid salg yenm kua nyan i, k u te k t ŋan Yendu nunŋ n. 11Yendu salg-yidkua kul tu sie daal ń tuu daal g suun u tuonn, g tun g yid salbuolyenu kua i, k l kan ban g fid g piin nil biid. 12Ama Kristo nuan yid salg yenm kua i t biid po, k l salg dagd mɔlane yen youg nba baad, g ji kal Yendu jendu, 13g guu saa yen youg nba g Yendu bu te k wan paad u ninnanda. 14G dugn wano yid salg yenm kua i g te g niib nba k u nyan’m biid n ninŋ nyan ji be ŋand n ninŋ youg kul. 15Foŋanm mɔ bo cind g maad lann n nyan: 16« Min Yonmdaan n maad, l dana po gii pend, dɔnnu nba k n bu suol yen’m n ne: “ N bu diɛn n Mɔmaam b pala n ninŋ, g kuan l Mɔmaam b maalm n ninŋ. ” » 17L puol po k u biɛ maad: « N ji kan ban g tiɛd b biid yen b tuonbiid po. » 18Lann Yendu n dii sugl niib biid po nyan, l ji g bual k ban yid salg g miɛl sugl l po. 19N naataani, Yiesu sɔm nba wul nyan n te k t ji bu fid g kua Yendu-cend‑buol-jounŋ denuagn ninŋ g siɛl kan pan’ti. 20Yiesu n luod sɔnpaanu nba tien miɛl. Wan tug u kua g yid salg nyan n te g cincenciɛɔnŋ nba tu juan g lieg Yendu-cend‑buol-jounŋ denuagn nyan pad k t ji bu fid g kua l n ninŋ. 21Mɔlane t ji mɔg salg-yidkab kul ciɛn nba mɔg nuu Yendu ŋaag yab po. 22Tin nagn man Yendu yen papienn, gii dug u po yen t pal kul. Tin nagn’o man yen pal nba k t ŋuul g siɛl yaa jalgi ji g be l n, yen gbannand nba k t wul yen nyum nba ŋan k l g mɔg siɛl yaa jɔgnd. 23Ŋaa man k t ŋanm g kub tin mɔg dindann nba g diɛ g maad niib nyan, g daa ŋaa, g dugn Yendu gii puon yal nba, u tu tien lann i. 24Mɔnd man k tin gii paand t lieb pala k tin fid gii bua t lieb g biɛ gii suun tuonŋana. 25Siɛb nyɔl g ji g saa Kristo‑yab tintaanu. Tinm n daa tie nyan banm nyan. Ama tin gii paand t lieb pala mandg yin ji nyuan g Yonmdaan daal nagd ne. 26Yen mɔni, t gii bann mamɔni u, k l puol po k t yuand g tiɛ g tien biid, salg ji g be k t bu yid k lan nyan’ti l biid n. 27L ji tenn k tin gii guu Yendu buud nba mɔg jiwaani ne, yen muu nba bu di u ninnanda i. 28N tua i ban g nil gii yie g g cɔln Moyis yiko, g niib banle lann i kaa niib bantaa baal g maad k u tien nnyan, b kan jie’og ninbaaɔg a ? L tie k ban kpi’ug u. 29L bu tien nle i g nil nba yiin Yendu Bija fam, g yed g sɔm nba po g Yendu guan g suol dɔnnu yen niib, g piin u biid nyan g tie siɛl, g sugl Foŋanm nba tien’ti ŋalbalg, k l daan yaa tubdadu ji kan ŋanm gii biɛ i ? 30T yen ban yua nba maad k nne: « Min n bu tuu pann, min n bu guan g pa yua kul pann. » G biɛ maad: « Min Yonmdaan n bu bu n buolu. » 31L baa biɛ yen nil ń kua Yendu nba fo kpatam n ninŋ. 32Tiɛd man lan bo tie nand i po youg nba pend. Youg nba g Yendu yinyiem bo fand’i, l puol po i bo la fala bonciɛnn g yen juun g kɔn jad. 33Yenn youg b bo tu sugd’i g cagn’i niib siign, liel youg mɔ i bo tu taan yab nba k b cagn’m nyan po i. 34Yen mɔni i bo tuo g cagn yen yab nba be dansaldieog n nyan ; k ban biɛ bo fiel yin mɔg yal nba nyan, i bo tuo i k i pala biɛ man g dugn i ban k yin mɔg yal nba nyan cie tinŋ po ne yal, k l mɔgm biɛ g mɔg gbennu. 35Lann, daa ŋaa man yin mɔg papaal nba, i bu la nyuad nba yab. 36L bual k yin gii mɔg juun i g fid g tien u buam, nnyan i k i bu la wan puon’i yal nba. 37Yen mɔni Yendu Kadaaɔg maad: « L gii yann waam g pugn, yua nba bu baal bu baal, u ji kan wai. 38Yua nba tie nimɔn Yendu nunŋ n u baa fo g dugn u dindann po. Ama u gii ŋaa g g dug n po, n pal kan gii man u po. » 39Tinm g tie yaa danm nba tu ŋaa g ji daa dug Yendu po g biɛl kaa, ama t tie yaa danm nba dug u po g bu la fielu i.

will be added

X\