Ebro-nba 1

1Siɛnyoug Yendu bo tɔgn sɔni bonciɛnn g te k u sogni‑nba maad yen t yaajanm k l g luol taal fuunu munŋaa. 2Ama dijijuog dani nba k t be ne, Yendu te k u Bija maad yen’ti. Yendu tag bonn kul yen wano i, g tug’o k u tie yua nba tan bu yend bonn kul. 3U ninŋ i k t nyuan Yendu yudand. Yendu n tie nand, u mɔ l tie nnyan i. U maam nba mɔg paalu nyan n te g ŋanduna n ninŋ, bonn kul sie l sinsienu n. U bo te g niib biid piin g gbenn, k u ji duo g kal Yendu yudanddaan jendu polu po, 4g Yendu te k u cie malɛg‑nba. Nyan Yendu n te k u cie’b nyan, k u pul’o sann nba mɔg yudand g cie b sana. 5Yen mɔni Yendu g ban g maad malɛg sua k nne: « A tie n Bija i, dinne min n tie a Baa. » U biɛ g ban g maad malɛg: « Min n baa tie u Baa, u mɔ baa tie n Bija i. » 6G nyaan Yendu n bo tan suun u Bija nba mɔg nuu bonn kul po yaa youg nba ŋanduna n ninŋ, k u maad g: « Malɛg‑nba kul ń gii pug’o. » 7Malɛg‑nba po nuan, Yendu maad k nne: « U tu te u malɛg‑nba ń te nyan faalu nyan i, g te u tuonsunna ń te nyan muupienu nyan. » 8Ama u Bija yaa po nuan Yendu maad: « Yendu, a baa kal a badkog po i, youg ń tuu youg. A baa diɛ a baddanml i g ŋmagd a niib yen mɔnkund. 9Ŋan buad mɔnkund g yie bonbiil nyan po n te k a Yendu lugd’a g tien kpam a yul po yen pamann. U buad fin i g cie a lieb kul. » 10G Yendu biɛ maad: « Yonmdaan, cilg youg fin n tag tinŋ, g biɛ tag polu yen a nui. 11Polu yen tinŋ bu bod, ama fin nuan baa l be i. L kul ne tan bu cad nyan liɛdl nyan i, 12ŋan pɔbn’m nyan ban tu pɔbn liɛdl nand nyan. B bu lebd’b nyan ban tu lebd tiɛɔg nand nyan i, ama fin nuan g mɔg lebdu, k a miɛl mɔ biɛ kan ban g gbenn. » 13Yendu biɛ g ban g maad malɛg sua k nne: « Kal n jendu, saa yen min tan bu te ŋan paad a ninnanda. » 14Malɛg‑nba tie b lɛ i ? B tie yab nba suun Yendu po, g dond’o i, k u tu sun’m k ban gad g tod yab nba bu la fielu.

will be added

X\