1 N naataani, i gii la k i lua tie biid, yinm nba g Yendu Fuom be i ninŋ nyan ń mɔnd g fuon yam o g ŋmagd l daan g guan yen’o sɔnŋanu n ninŋ. Fin nba ŋmagd a lua nyan ń mɔ ń gii ban a kua po g tan daa baa bignn n ninŋ. 2 I tod man i lieb nba k l paa b po. I gii tie nnyan, i cɔln Kristo mɔmaam n nyan. 3 Nil gii mali k u tie nigbenŋl g yen g tie siɛl, u bɔnd u kua i. 4 Nil kul ń ŋanm g diid wan diɛ u kua nand, yua nba diid g sua k u binbem dagd, u pal bu fid gii man u kua po, ama lan daa tie k u pua g kpabnd u kua yen lua kaa, 5 g dugn sua kul tan bu tug u yul po tugl i. 6 Yua nba k b tund’o Yendu maam ń bɔgd wan mɔg yal nba g te yua nba tund’o nyan. 7 Daa bɔnd man i kua, sua kan fid g laa Yendu. Nil kul n bul yal nba, u tan bu yend lann i. 8 Yua nba bul u gbannand n bua yal nba, u tan bu yend yal nba tie gbannand yal i, lan tie kuum. Yua nba bul Foŋanm n bua yal nba, u tan bu yend yal nba tie Foŋanm yal i, lan tie miɛl nba kan ban g gbenn. 9 Lann, tin daa yed k t cɔg yen ŋanm tienu. G dugn t gii g wad t pala, daal gii pund t bu yend tin daan bul yal nba. 10 Lann, yaa youg nba k t bu l fid kul, tin gii tie niib kul ŋanm, mandg yab nba tie t naataani Kristo‑yab. 11 N tua i la diɛngbenŋi ne waa, min mɔno n diɛn’i yen n nuu. 12 Yab nba niind’i k yin kɔnd nyan, banm n ŋɔnŋ b kua g bua niib ń gii pag’b. B suun l kul ne g kpaan k ban lɔgl fala nba g niib laad g dugn ban muand Kristo kuum dapunpɔnn po nyan i. 13 Yab nba kɔnd mɔno g cɔln yiko n bual k ban sun yal nba, b bua yin kɔnd k ban ji gii pua jipaad k b kɔnd’i nii. 14 Min nuan yen g pua jipaad siɛl po, l gii g tie t Yonmdaan Yiesu Kristo kuum dapunpɔnn po i kaa. G dugn l dapunpɔnn po n te g ŋanduna ji g tie siɛl n po, k n mɔ g tie siɛl ŋanduna po. 15 K l maa nil gii kɔnd ii, u gii g kɔnd ii, l g pugd siɛl. Yal nba tie bonmɔnn tie k wan guan g te nipaan i. 16 Yab nba kul tɔgn l sɔnu yen yab nba tie Yendu buolu yen mɔni, Yendu ń te’b yanduanm g jie’b ninbaaɔg. 17 Sua ń ji daa fann g mabn’n, g dugn min gaal fala nba kul, l banm be n gbannand po g ŋɔnŋ g Yiesu n yen’n. 18 N naataani, t Yonmdaan Yiesu Kristo ń yad u yedŋanm i po. Amɛnn.
