Galasi Kristo-yab 5

1Kristo nyan’ti yonmd n ninŋ k tin yal t kua i canyiin. Lann, ŋanm man gii diɛ k l paa g ji daa guan g kuan i kua yonmd n. 2Ŋanm g cenŋ man ne. Min Pɔl, min n maad’i, i gii ŋaa k b kɔnd’i, Kristo n tien yal nba kul ji kan gii tie siɛl i po. 3N bua n ŋanm g maad’i bonyenn g led: nil nba te k b kɔnd’o kul, l tie mabl i l daan po k wan gii cɔln yiko n bual yal nba kul. 4Yinm nba kpaan k yin gii cɔln yiko g te nimɔnm Yendu nunŋ nyan, i paad yen Kristo, g nyan i kua Yendu ŋalbalg n ninŋ n nyan. 5Tinm nuan dug g Foŋanm n bu te k t dindann po tin te nimɔnm Yendu nunŋ n. Tin daan yal nba n nyan. 6G dugn yua nba be yen Kristo, u gii kɔnd ii, u gii g kɔnd ii, l g pugd siɛl. Bonmɔnn tie g nil ń gii mɔg dindann i, g ŋɔn u buam n ninŋ k u mɔg dindann. 7I bo cil g sonm k l ŋan o, g ŋmaa n ji tan jiɛl i sɔnu g pan’i k i kan fid g cɔln mamɔni i ? 8Yal nba pan’i nyan g nyiɛ Yendu buol kaa, g dugn wano n yiin’i. 9I g ban g dibina waam nne n tu te g kpanu yom kul ń fid ii ? 10Ama Yonmdaan yen te k n yaa pal paa i po, n ban k yin bu mali yal nba kan gii be jiɛg yen n maalm. Ama yua nba n ŋmad i yam nuan, wan l tie yua nba kul, Yendu bu dad u tubl. 11N naataani, k min i ? L bo gii tie mɔni i k n biɛ daa l muand g nil kul ń kɔnd, bɛ po i k b biɛ bo baa ŋɔnŋ’n fala i ? L bo gii tie nnyan, tin muand g Kristo kpe dapunpɔnn po nyan, l ji bo kan gii tie yaalidug sua po. 12Yab nba baad yen ŋmadl i siign nyan taan gii bua ban jiɛl b jatiɛd kul g lu mɔno ! 13N naataani, yinm nuan Yendu yiin’i k yin yal i kua i. Ama yin daa ŋaa k l yal‑n‑kua binbem ń te k yin ji gii suun yin niɛn yal nba k l g ŋan nyan. Mɔnd man gii suun g tod i lieb k lan ŋɔn k i bua’b. 14Yendu Kadaaɔg n mɔmaam kul taan g be mɔmayenm ne ninŋ i: « I bua a lua nyan a kua nyan ». 15Ama i gii jund lieb nyan muaɔg n bonkobd nyan, g janmd lieb, yin gii ban k l saa k yin biɛn lieb i. 16Lann, min bua n maad’i yal nba n ne: ŋaa man g Foŋanm ń gii ŋmagd i binbem. Nnyan, i ji kan fid gii suun yin niɛn yal nba k l g ŋan nyan. 17G dugn nifosaal n niɛn yal nba g tuo Foŋanm po. Foŋanm n mɔ n bua yal nba g tuag yen nifosaal buam. Lann bona ŋanle kɔn yen liel i, lann n te k i kan fid g tien yin bua yal nba. 18Ama l gii sua g Foŋanm n ŋmagd’i, lann yiko ji g mɔg nuu i po. 19Nil kul ban nifosaal niɛnbiid n kuand’o bontitied nba ninŋ: lan tie cunconm n ninŋ, jɔgntuona n ninŋ, naayigdm n ninŋ, 20pada n ninŋ, yen nyɔgdinu n ninŋ. L niɛnbiid n tu te g niib pala ŋub b lieb po, k b kɔn yen lieb, g nan lieb, g be yen mutuol, g bua b yal kua, k l baad yen lugdm yen paadu b siign. 21B nuni fu lieb n mɔg yal nba po i. B nyu daam g buog youg kul, g saa jaanm nba ninŋ g sua g so u kua, g tuonbilied biɛ be g naan nnyan k b suun g pugd. N bua n ŋanm g maad’i nii, nyan min daan kpiɛ g maad’i nyan: yab nba suun l tuonbiid g mɔg yiɛl Yendu diem n. 22G nyaan Foŋanm nuan gii ŋmagd nil, wan bu te l daan yal nba u binbem n ninŋ n ne: u baa bua u lieb, g be pamann n, k u yam dua, k u pal sɔnŋ, k u tod lieb, g tie ŋanm, g niib dug u po. 23U baa tie yua nba k u yam dinŋ, k u so u kua. Yendu mɔmaam g be g yie l yaa bona. 24Yiesu Kristo n yen yab nba nuan, banm tug yal nba be b pala n ninŋ g tie nifosaal pakɔnn yen u niɛnbiid kul g kpaa dapunpɔnn po o. 25Foŋanm n yaan tien’ti miɛl nyan, tin ŋaa man k wan gii ŋmagd t binbem mɔ. 26Tin daa bund g donŋ t kua fam, tin ŋaa makpaaɔnŋ yen nanŋ t lieb po.

will be added

X\