Galasi Kristo-yab 4

1Min bua n maad yal nba n ne: yua nba tan bu yend u baa faal daa gii tie big, mɔni, wano n l yen bonn kul faa, g nyaan wano yen yonm kul yen daa tie yenm i. 2U daa baa be yab nba kub’o g ŋmagd’o yen yab nba nyuan u faal nyan nui n ninŋ i, saa yen youg nba k u baa bo sen. 3T mɔ l tien nnyan i. Tin daa bo tie nyan bid nyan, t bo cɔln ŋanduna ne ninŋ bona nba k t g nyuan ama k l yen mɔg paalu g diɛ niib dansalg i. 4Ama Yendu n bo sen youg nba bo tan pund, k u sun u Bija, g puo mal’o yiko youg, 5k wan nyan yab nba bo be yiko yonmd n ninŋ, g te k t kul ń te Yendu bid. 6Yal nba ŋɔn k i tie Yendu bid yen mɔni n ne: u sun u Bija Fuom t ninŋ. L Fuom n te k t bu fid g yiin Yendu k t Baa. 7Lann, a ji g tie yonm kaa, a ji tie Yendu big i. Ŋan tie Yendu big nyan, lann a bu gaal wan bo puon u bid yal nba. 8Siɛnyoug, i daa bo g ban Yendu, i bo ŋua tingbana i g tie b yonmi nyan b tie Yendu nyan k b yen g tie siɛl. 9Mɔlane po, i ji ban Yendu, nnyan kaa mɔno, Yendu ji ban’i. G bɛ po i k i biɛ ji bua n lebd gii cɔln bonfinfana nba g mɔg siɛl yaa paalu g bual siɛl yaa buam, g biɛ guan g te yonmi nyan siɛnyoug nyan i ? 10I ŋanm g cɔln diyena, ŋmaayeni, binyena, g mɔg binn n ninŋ youg nba k i ŋanm g cɔln. 11N ji jie g tuonn nba k n sun i po ne kul ń te fam i. 12N naataani, n balm’i, i tie man nyan min nyan, g dugn n mɔ tien n kua nyan yinm nyan i. I g biil’n baa siɛl. 13I yen ban k n yiɛlu po n bo te k n cind g muand’i Laabamann. 14N gbannand bo g mɔg nyuandu, i yen bo g nund’n, i biɛ bo g sinŋ’n. I bo ŋanm g gaal’n nyan yin bo bu gaal Yendu malɛg, lann i kaa Yiesu Kristo mɔno nand nyan i. 15I pamann ŋann ji tɔgn lɛ i ? Yen mɔni, n tie sieda, k l bo gii bu fid, man ne i bo kpigd baa i ninbina mɔno g tie’n o. 16G mɔlane po i, min yaan maad’i mɔni nyan, n ji tie i ninnand yaa aa ? 17Niib nba ŋua g tabd’i nyan, b g ŋua’i yen ŋani kaa. B kpaan k ban paad’i yen’n i, k yin ji tug i kua g cab’b. 18L yen ŋan k yin tug i kua g cab yal nba ŋan i youg kul, l g tie yaa youg nba k n be yen’i kukua kaa. 19N bid, puo n tu bua n mal k l yiɛl’o nand nyan, l yaan biɛ guan g yiɛl n mɔ nnyan i i po, saa yen yaa youg nba k i binbem tan bu nand yen Kristo yal. 20N bo sun k n gii be i buol mɔlane, g bann min bu maad yen’i nand, g dugn l lid’n yen min ji bu tien’i nand i. 21Diid a, yinm nba bua g yiko ń gii mɔg nuu i po nyan, i l gbiɛ yiko n maad yal nba nuan ii ? 22L diɛn g maad k Abraham bo mɔg bijabi banle i. Yonm n bo mal yend, g yua g tie yonm mɔ mal lua. 23Yonm bija malu bo nyiɛ nifosaal buol i, ama yua g tie yonm bija nuan l bo tien nyan Yendu n bo puon nand nyan i. 24L maam tie majɔug u, g mɔg bundl. Banm puob banle ne tie dɔnnu munle nba g Yendu bo suol nyan ninnaɔnŋ u. Cincinn dɔnnu n tie Sinaayi jual po yal, Agaar n tie l dɔnnu binbiug, wano maal yonmi i. 25Agaar n tie Sinaayi jual nba be Arabi tinŋ n ninŋ nyan ninnaɔnŋ. Wano n tie mɔlane Serusalɛm ninnaɔnŋ, g dugn Serusalɛm yen u niib kul be yonmd n i. 26Ama polu po Serusalɛm nuan g be yonmd n. Wano n tie t yaa naa. 27Yen mɔni, l diɛn Yendu Kadaaɔg n g maad: « Fin puoŋɔlg, i kpanm, fin nba g ban g mɔ madyiɛlu, i yign yen pamann, g dugn ban nyɔl puo nba nyan, u bid tan baa yab g cie puobuado bid ». 28N naataani, yinm nuan tie Yendu puoni bid i, nyan Isaak nyan. 29Siɛnyoug, big nba k b bo mal’o nifosaal yanbuam n ninŋ nyan bo diɛ big nba k b bo mal’o Yendu Fuom paalu po g cagn’o i. Mɔlane mɔno, l biɛ l tie nnyan i. 30Yendu Kadaaɔg maad bɛ i ? « Bel g yaan yonm ne yen u bija, l g dagd g yonm bija yen yua g tie yonm bija ń taan g di faal. » 31N naataani, tinm nuan yen g tie yonm bid kaa, t tie yua nba g tie yonm yaa bid i.

will be added

X\