Galasi Kristo-yab 3

1Galasi yab, i g mɔg yam baa waam ! B tiel’i yaa aa ? I nunŋ n ninŋ kaa k b bo ŋɔn’i Yiesu Kristo n kpe nand dapunpɔnn po ii ? 2Bonyenn kua i k n bua n bann: yin bo gaal Foŋanm nyan, i bo cɔln Moyis yiko i g gaal bii yin bo gbad Laabamann nba g tuo g gaal nyan po i ? 3Lann, i ji l luol yam canyiin yaa aa ? Yin bo cil yal nba yen Foŋanm paalu nyan, i ji bua n tug i yul po paalu i g juod ii ? 4Yin la yal nba i binbem n ne kul tie fam yaa aa ? L kan fid gii tie fam ! 5Yendu n tien’i Foŋanm g suun yaalidug tuona i siign ninŋ nyan, u tie nnyan g dugn yin cɔln yiko po bii, u tie g dugn yin cenŋ Laabamann g tuo g gaal nyan po i ? 6K Abraham i, n tua u bo dug Yendu po i g Yendu yiin’o nimɔn a. 7Lann, ŋanm g gbad man niimn, yab nba dug Yendu po n tie Abraham yaabuona. 8Yendu Kadaaɔg mɔno bo tuod g maad g Yendu bu yiin buolfanu yab nimɔnm g dugn b dindann po. Lann n te k u bo muand Abraham laabamann ne: « N yedŋanm bu nya a buol i g yad ŋanduna ne buoli kul po. » 9Lann yab nba mɔg dindann, Yendu bu yad u yedŋanm b mɔ yaa po nyan wan bo tien Abraham nand g dugn u dindann po nyan. 10Ama yab nba dug yiko po nuan, mɔpol n ŋua’b, g dugn l diɛn Yendu Kadaaɔg n g maad: « Yua nba g cɔln yal nba kul diɛn yiko kadaaɔg n ninŋ, Yendu mɔpol bu ŋuan’o. » 11L taan g tie wuodi bonn kaa, Yendu kan yed g sua tie nimɔn u nunŋ n g dugn k l daan cɔln yiko po ; k l maa l diɛn g maad g: « Yua nba tie nimɔn Yendu nunŋ n g dugn u dindann po n baa fo. » 12To, yiko cɔlmu nuan yen g tie dindann yal kaa. L diɛn g maad g: « Yua nba cɔln yiko n yed yal nba kul, l daan baa fo g dugn l yiko po i. » 13Kristo pa t po g nyan’ti mɔpol n ninŋ o, yiko n bo bu baal yen mɔpol nba t po nyan, wano n ji gaal, g dugn l diɛn Yendu Kadaaɔg n g maad g: « Yua nba k b jɔn’o daaɔg po kul, mɔpol ŋuan’o n nyan. » 14L tien nnyan g Yiesu Kristo po, buolfanu yab mɔ ń la yedŋanm nba g Yendu bo puon Abraham i, k t dindann po tin gaal Yendu n bo puon Foŋanm nba. 15N naataani, t tug man binbiug t binbem n ninŋ. Nil yam n bua yal nba k u diɛn kadaaɔg n, g nyii nuubil g pol k lan ŋɔn k wan bua yal nba n nyan, nifan ji kan fid g piin, lann i kaa g pugn siɛl l po. 16To, Abraham yen u yaabuonn i g Yendu bo puon’m puoni. L g diɛn Yendu Kadaaɔg n ninŋ g yed g « yen u yaabuona » kaa, l bo gii diɛn nnyan, l bo baa tie nyan b yab nyan i. L yen diɛn g « yen u yaabuonn » i, l ŋɔn k l maad g nyuan niyend i, lan tie Kristo. 17Min bua n maad yal nba n ne: Yendu n bo puon puoni nba g pol k u bu tien nyan, l bina kobiinna yen bina piintaa po yo g yiko tan yuand g baal, l yiko kan fid g yiin Yendu mɔbona ŋann fam, g piin l puoni. 18L gii tie g nil bu cɔln yiko i g gaal Yendu n bil yal nba g guun’o, lann nuan l ji g tie Yendu puoni yal kaa. Puoni po i k Abraham yen bo la Yendu ŋalbalg. 19L gii tie nnyan, yiko yen ji be bɛ po i ? Yiko nuan bo baal g pugn g niib ń bann k b bontitied g tuag yen Yendu yanbuam i. Yiko tuonn n bo baa tie yal nba n nyan saa yen yaa youg nba k Abraham yaabuonn bo bu baal, yua nba po g Yendu bo puon puoni nyan. Malɛg‑nba n bo gaal l yiko g baal yenn g tie nisaal k u te sandindaan. 20L gii tie niyend po kukua, l g bual g sandindaan ń gii be, Yendu nuan yen tie yeno kua i. 21L bua n maad g yiko yie g Yendu puoni g tie siɛl yaa aa ? Palb, lann kaa. L bo gii tie k t gaal yiko nba bu baal yen miɛl niib po, lann nil bo bu fid g cɔln l yiko g te nimɔn Yendu nunŋ n ninŋ. 22Yendu Kadaaɔg n ninŋ l yen diɛn g maad g biid yend ŋanduna munn kul o. L tien nnyan g Yendu ń te u niib i wan bo puon puoni nba g dugn ban dug Yiesu Kristo po nyan. 23Dindann youg n daa bo g pund nyan, yiko n daa bo diɛ’ti nyan dansali nyan, saa yen yaa youg nba g Yendu tan dɔgd dindann sɔnu t po. 24Yiko n bo yual’ti saa yen Kristo baalu youg, k tin ji gii dug u po g te nimɔnm Yendu nunŋ n ninŋ. 25Youg n yaan pund k t dug Kristo po nyan, t ji g be l biyual nuu n ninŋ. 26G dugn yin dug Yiesu Kristo po nyan, i kul ji tie Yendu bid i. 27Yen mɔni, i kul n yaan taan yen Kristo i nyunwulu youg nyan, yinm yen wano kul ji taan g tie bonyenn i. 28Lann, l ji g mɔg k u ne tie Suif k u ne tie buolfanu yua, k u ne tie yonm k u ne yal u kua, k u ne tie jua k u ne tie puo, g dugn i kul n taan yen Yiesu Kristo nyan, i ji tie niyend i. 29I gii tie Kristo‑yab, lann i tie Abraham yaabuona i, yinm n bu gaal wan bo puon’o yal nba nyan.

will be added

X\