Galasi Kristo-yab 2

1L bo tien piig yen bina ŋanna yo, k n guan g gad Serusalɛm, min yen Barnabas. N bo tug Tiit mɔ k u ciɛn’ti. 2N bo guan g gad l po g dugn Yendu n bo maad k n gad. N bo ŋɔn l buol Kristo‑yab min muand buolfanu yab Laabamann nba, ama n bo la yab nba ŋanm g mɔg yudand i, k t tien tintaanu t kua n ninŋ k n ŋɔn’m, g dugn n bo g bua k min suun yal nba, lann i kaa min bo kpiɛ g sun yal nba kul ń te fam. 3Baa n yegnu Tiit nba n tie Grɛk mɔno, b bo g niin’o k wan kɔnd Suif‑nba kɔnd. 4G nyaan ŋalaacidanm yen bo ŋmad t siign g fa k b tie t naataani, banm nuan bo l ŋua k wan kɔnd i. B bo tien suoo g kua t siign g suli tin be yen Yiesu Kristo g yal t kua nand i, g bua ban kuan’ti yonmd n. 5T yen bo g tie’b nunmanŋ palb. T bo tien nnyan k yin fid gii diɛ mamɔni nba be Laabamann n ninŋ i. 6Ban bo yi yab nba Kristo‑yab tintaanu yudanm bo be, l danm n bo tie yab nba kul, lann g la’n, g dugn Yendu nuan g mɔg lugdm niib buol. L tintaanu yudanm bo g mabn’n k n pugn siɛl l po. 7B bo diid g sua g Yendu tie min i Laabamann muandu tuonn k n gii muand buolfanu yab, nyan wan bo tie Piɛr mɔ l tuonn g yed k wan gii muand Suif‑nba nyan. 8G dugn yua nba bo sun tuonn Piɛr n ninŋ k u te Yiesu sundu Suif‑nba buol nyan, wano n biɛ sun tuonn n mɔ yaa ninŋ k n muand buolfanu yab Laabamann. 9Niib bo nyuan g Saak yen Kefas yen San n tie Kristo‑yab tintaanu yudanm. Banm mɔno n bo bann g Yendu pii’n u paab, k l tie k min n bu sun l tuonn nyan, k b suol min yen Barnabas nui n g yog yog, k lan ŋɔn k tinm yen banm taan mɔb, k tinm ń gii saa g muand buolfanu yab Laabamann, k banm ń gii suun yen Suif‑nba. 10B bo maad k tin mɔnd gii tiɛn b tintaanu n ninŋ tali po kua i, k n kon tien nnyan yen n pal kul. 11Ama Kefas n baal Antiyɔs, Siiri diem n, u bo tien siɛl k n fiil g yie u po niib kul nunŋ n, g dugn u bo g mɔg mɔni. 12Yen mɔni, Saak bo sun niib nne t buol. L niib n daa bo g pund nyan, Kefas bo tu di yen yab nba g tie Suif‑nba i. Ama Saak sundi n pund yaa youg, g Kefas ji den g piɛd u kua g ŋaa’b, g dugn u bo jie yab nba bo ŋua g niib nba g tie Suif‑nba mɔ ń kɔnd Suif‑nba kɔnd i. 13Wan sun l jiwaantuonn nnyan, g Suif‑nba nba tenn mɔ ŋmaa u taabuod n, g Barnabas mɔno tan ŋaa k b kuan’o l munafigi bontitied n ninŋ. 14Min la k b tie nnyan k l yen g tuag yen mamɔni nba be Laabamann n ninŋ nyan, k n maad Kefas niib kul nunŋ n: « Fin tie Suif i, a yen daan g be nyan Suif nyan kaa, a daan be nyan buolfanu yua nyan i, k l tien nle i, k a ji bua ŋan niin buolfanu yab ban gii tie nyan b tie Suif‑nba nyan i ? » 15B mal tinm nuan k t tie Suif‑nba i, t g taa yen buolfanu yab nba tie biiddanm ne. 16T yen ban g nifosaal n suun tuona nba g Moyis yiko bual k wan sun po kaa g Yendu tu yiin’o nimɔn, u dindann Yiesu Kristo n ninŋ po i. T mɔ tuo g dug Yiesu Kristo po, g Yendu ń yiin’ti nimɔnm, k lan gii tie k t dindann Kristo po i, g daa tie k t sun yiko n bual yal nba po kaa, k l maa Yendu kan yed g sua tie nimɔn g dugn k l daan sun yiko n bual k wan sun yal nba. 17K tin yaan gbaa k tin te nimɔnm Kristo po nyan, l gii sua k t mɔ ji te biiddanm i, l bua n maad g Kristo n baad yen biid ii ? Palb, lann g be. 18Yen mɔni, n gii guan g maa min mɔno n bo pua g mud yal nba, n ji te biiddaan n nyan. 19G dugn yal nba tie yiko po nuan, min kpe yiko kuum o, n ji bua min gii fo Yendu po i. Min yen Kristo n taan g kpe dapunpɔnn po, 20lann min kaa ji fo, Kristo n be n ninŋ g fo. Min tie nifosaal g be binbem nba ne, n dug Yendu Bija po i g be, wano n buad’n g yid u kua salg n po. 21N kan ŋaa Yendu ŋalbalg ń te fam. K l maa, l gii tie g nil ń cɔln Yiko i Yendu ń yiin’o nimɔn, lann Kristo kpe fam i.

will be added

X\