Galasi Kristo-yab 1

1Min Pɔl n da kadaaɔg ne. N tie Yiesu sundu i, niib kaa sun’n, nifosaal mɔ biɛ kaa te k n tie Yiesu sundu. Yiesu Kristo yen t Baa Yendu nba yied’o kpienm siign nyan n te k n tie Yiesu sundu. 2Min yen t naataani nba be n buol ne fuond yinm Galasi Kristo‑yab. 3T Baa Yendu yen Yonmdaan Yiesu Kristo ń yad yedŋanm i po g te k i yam ń gii dua. 4Wano Kristo n yid u miɛl salg k wan piin t biid, g fiel’ti g nyan’ti mɔlane binbebiiug nba n yend ŋanduna ne ninŋ. U bo tien t Baa Yendu yanbuam n nyan. 5Yudand tie wano Yendu yal i, mɔlane saa yen youg nba g mɔg juog. Amɛnn. 6L suol’n yaalidug bonciɛnn yen yin gbaa g nyɔl Yendu nba bo yiin’i g dugn Kristo ŋalbalg po, g ji ŋua laabamanfann. 7Yen mɔni, l g tie g laabamanfann be kaa, niib n be i siign g ŋmad i yam g kpaan k ban lebd Kristo Laabamann. 8Nifan gii baal, baa tinm mɔno gii baal, lann i kaa malɛg gii nyiɛ polu po g baal g muand’i Laabamann, k l g taa yen tin bo kpiɛ g muand’i yal nba nyan, l daan ń biɛl fam ! 9T daan kpiɛ g maad’i no, n ji gɔ g maad g led i, g nil gii muand’i Laabamann k l g taa yen yin bo gaal yal nba, l daan ń biɛl fam ! 10K nnyan i, n kpaan niib pinpagd bii Yendu yal i ? N kpaan k min manŋ niib pala yaa aa ? N bo gii kpaan k n manŋ niib pala man ne n ji g tie Kristo tuonsunn. 11N naataani, min n maad’i, Laabamann nba k n muand g nyiɛ nifosaal buol kaa. 12G dugn nifosaal kaa maad k n gbad, nifosaal kaa biɛ ŋɔn’n l Laabamann mɔ, Yiesu Kristo mɔno n dɔgd l Laabaal g ŋɔn’n. 13Yinm mɔno yen gbad min bo ŋua Suif‑nba jaandi g suun yaa tuonn nba. N bo diɛ jad kua i g ŋɔnŋ Yendu tintaanu niib fala, g gbaa k n l pua g yod b tintaanu canyiin. 14Tinm Suif‑nba jaandi n ninŋ, n bo cie n baɔnŋ n yab bonciɛnn, min n bo ŋanm g kɔn t danm bogda po yen n pal kul g cie’b. 15Ama Yendu bo tuod g lugd’n g sua k n daa be n naa tug n i, u ŋalbalg po, k u yiin’n k n sun u tuonn. Wan bo tan jag g sua g youg ji pund 16yen wan ŋɔn’n u Bija, k min fid g muand buolfanu yab wan tie yua nba, k u kon ŋɔn’n. Wan ŋɔn’n, min ji bo g bual nifosaal siɛl yaa cegli po, 17n biɛ bo g gad Serusalɛm mɔ k min la yab nba bo kpiɛ g te Yiesu sundi yen’n. N bo fiil l youg mɔno g gad Arabi i, g nyiɛ l po g guan Damas. 18L bo tien bina ŋantaa yo, k n tan duo Serusalɛm k min bann Kefas. N bo tien piig yen daa ŋanmu i yen’o. 19Ama n bo g la sundlei, l gii g tie t Yonmdaan ninja Saak i kaa. 20Min da g maad’i yal nba ne, n maad Yendu nunŋ n i, n g fa faaɔg kaa. 21L puol po i k n gad Siiri yen Silisi dingbana n ninŋ. 22Suude niib nba tie Kristo‑yab bo g ban g la’n palb, 23ama b bo gbiɛ g niib maad n po k nne: « Yua nba bo ŋua g cagn’ti siɛnyoug nyan mɔ ji muand niib Laabamann i, k wano mɔno yen bo gbaa k wan biɛn niib nba bo mɔg dindann l Laabamann po. » 24G Kristo‑yab ji pag Yendu g dugn n po.

will be added

X\