Efes Kristo-yab 6

1Yinm bid, i cɔln man i danm nyan Yonmdaan n bua nand nyan. Lan bual nand n nyan. 2« Cɔln a naa yen a baa » lann n tie Yendu mɔmacincinn, g ji pugn puoni ne: 3« Nnyan i k a baa be a yam n, g la manfagl tinŋ po ne. » 4Yinm bibaa‑nba mɔ ń daa tie man i bid yal nba bu nyan b yam, b pala ń be i po. I kub’b man, gii tien’m cegli g ŋmagd’b nyan Yonmdaan n bua nand nyan. 5Yinm yonmi, i cɔln man yab nba tie i canbaa‑nba ŋanduna ne ninŋ, gii jie’b, g jegl b nunŋ n. I suun man b tuona yen i pala kul nyan i suun Kristo po nyan. 6L g tie yaa youg nba k b nyuan’i kua kaa k i tu bu ŋanm gii suun b tuona, nyan i bua k i manŋ b pala nyan. I suun man yen i pala kul nyan Kristo yonmi nba kpaan k ban tien Yendu buam nyan. 7I suun man yen pamann, k lan gii tie nyan i suun Yonmdaan po i, g daa tie nifosaal po kaa. 8I tiɛn man g Yendu tan bu ŋmiɛn yua kul u ŋanm nyuad i, yua tie yonm yen yua g tie yonm kul. 9Yinm yonmdanm, yin mɔ ń ŋanm gii diɛ i yonmi. Daa ŋua’b man yen ninmɔnn. I yen ban k yinm yen banm kul taa Yonmdaan i, yua nba be polu po. Wano g mɔg lugdm. 10Min bu juod g maad yal n ne: i kpaan man i paalu Yonmdaan buol, k u paaciɛnu ń te k yin ŋanm g paag. 11Juab man Yendu n tie’i jakɔntiɛd nba kul, g fid gii sie k l paa, g nya Sitaan ninfansɔni n ninŋ. 12Tin mɔg kunkɔnn yen yab nba g tie yab mɔg gbannand yen sɔm kaa. Tin baa kɔn yen yab nba tie ŋanduna ne ninŋ bunbɔnn n yudanm, yen l yikodanm yen l paaludanm, yen polu po cicilbiɛdi i. 13Lann juab man Yendu n tie’i jakɔntiɛd nba kul, gii sie k l paa, g dabiiug daal yin fid g kɔn g nya l n ninŋ g biɛ l sie. 14Lann, i sie man k l paa. Tug man mamɔni k lan te i gbann k i lol i siɛg n, g tug mɔnkund k lan te i kudliɛdl. 15I pala ń gii kɔn k yin gii muand Laabamann nba te g nil yam dua. L pakɔnn n baa tie i taacaad k i pil. 16Tug man dindann youg kul, k lan gii tie gbankɔnŋl nba k i tu bu tegn g junn Bonbiildaan n yeg’i pieni nba kul k l so muu nyan. 17Tuo man fielu k lan gii tie i kudfeglg. Yendu maam ń gii tie i po jugfuaɔg nba g Foŋanm tien. 18I jaand man youg kul, g Foŋanm ń gii ŋmagd’i i jaandi n ninŋ yen yin miɛd yal nba kul ninŋ. Ŋanm man gii ceg i kua po, gii jaand yen ninmɔnn Kristo‑yab kul po. 19I jaand man n mɔ yaa po, k n tu gii yaad mɔb, Yendu ń ŋɔn’n min bu maad yal nba, k n fid g muand ŋasiil nba wuo Laabamann n ninŋ g daa jie siɛl. 20L po i k n tie Yiesu sundu g ji be dansaldieog n ne. Lann, i jaand man k n fid g muand l Laabamann lan bual nand, g daa jie siɛl. 21N bua k i mɔ ń bann min be nand yen min suun yal nba. Lann, t ninja Tisiik nba k n bua’ɔg bonciɛnn, k u suun t Yonmdaan tuonn yen papienn bu baal g te’i laabaal nba be kul. 22L po n ŋanm g te k n sun’o i buol k wan ŋɔn’i tin be nand, g biɛ paan i pala. 23T Baa Yendu yen t Yonmdaan Yiesu Kristo ń te k yinm Kristo‑yab kul yam ń gii dua, g biɛ te’i buam yen dindann. 24Yendu ŋalbalg ń gii be yen yab nba n bua t Yonmdaan Yiesu Kristo buam nba g mɔg juodu.

will be added

X\