1 Lann min nba tie dansalg g dugn Yonmdaan po, n paand i pala k i binbem ń gii ŋan nyan wan yiin’i g bua k yin gii be nand nyan. 2 I jiind man i kua youg kul, gii mɔg pasɔnŋl yen mindl, gii mɔg sugl i lieb po. Yin gii tie l kul ne buam n ninŋ. 3 Foŋanm te g manu be i siign ninŋ k i mɔg mɔtaaɔg ; mɔnd man gii kub l mɔtaaɔg. 4 T kul taan g tie gbannanyend kua i. Foŋanm mɔ tie yend kua i. Yendu n yiin’i dindann nba po mɔ biɛ tie yenn kua i. 5 Yonmdanyeno kukua n be, tin dug yal nba ninŋ tie yenn i, nyunwulu bogdl tie yenn i, 6 Yenduyeno kua n be g tie niib kul Baa, g mɔg yikod niib kul po, g be b kul n ninŋ, g suun u tuonn. 7 Ama t ninŋ sua kul gaal u yul po paab k l dagd yen Kristo n jag nand g pii sua kul i. 8 Nyan lan kon bo diɛn Yendu Kadaaɔg n g maad nand nyan: « Wan duo hal polu polu yaa youg, u tug yonmi i g duo yen’m, g biɛ pii niib paab. » 9 « U duo » ŋann niimn ii ? L bua n maad k u bo kpiɛ g jiid hal tinŋ tinŋ po mɔ i. 10 Yua nba bo jiid nyan, wano n biɛ duo g daan pend polu yaa polu, k wan fid gii mɔg nuu bonn kul po kaannaa kul. 11 Wano n pii niib paab jiɛg jiɛg. U te g yenm tie u sundi, g lieb tie Yendu sogni‑nba, g lieb tie Yendu mamuanda, g lieb tie Kristo‑yab tintaanu canbaa‑nba, g lieb mɔ tie yab tund Yendu maam. 12 U bo tien nnyan g bua k wan bobn Kristo‑yab kul, g sua kul ń fid g sun u tuonn, g Kristo‑yab nba tie u gbannand nyan ń gii sie k l paa. 13 Nnyan i k t kul tan bu taan gii dug bonyenn po kua, k t banm Yendu Bija n ninŋ mɔ ja. L bu sua k t ji tie cegdkab i, g ji nand yen Kristo g gbenn canyiin. 14 L youg t ji kan gii tie bid kaa, g faaɔgdanm bɔnd’ti, g diɛ b tundl g pua g piɛd’ti g saa yen’ti ban bua naan buol kul, nyan nyunguona n tu tugd ŋadnbid nand nyan. B tie nnyan i g bɔnd niib yen b faaɔg tundl g kuand’b tudm n ninŋ. 15 Ama tinm nuan baa bua t lieb i, gii maad mamɔni Laabamann po. Nnyan i, k t baa kped bonn kul n ninŋ, g nand yen yua nba tie t Yudaan, lan tie Kristo. 16 Wano n te g gbannand bɔga kul taan g tuug yen liel‑nba lan bual nand, g dugn tugda be g diɛ bɔgl kul yen liel k l paa. Bɔgl kul gii suun u tuonn, gbannand baa kped i g cieg g dugn buam nba be b ninŋ nyan po. 17 Lann t Yonmdaan sann po, n bu maad’i bonyenn, g bua k yin ŋanm g gbad l niimn: i yaa binbem ń ji daa tie nyan yab g ban Yendu nyan. Banm sonm yen b yul po maalm i, k l g mɔg lan saa yen’m naan buol. 18 B maalm be bunbɔnn n i, b g ban siɛl, b biɛ g be Yendu n tien manpaann nba nyan ninŋ, g dugn yanbɔnm yen kangbadm yend b pala. 19 B ji g ban yal tie fai, b sun tuonkpiɛda kul, g ji kan fid g suol b kua yen jɔgnd tuona sunu. 20 Yinm nuan yen g bann Kristo nnyan kaa. 21 Yin gbad k b maad yal nba kon gii tie u po, ban tund’i yal nba gii nyiɛ u buol, g tuag yen mamɔni nba be wano Yiesu n ninŋ, 22 l tie k yin ŋaa i tɔgbiiug nba k i bo tu mɔg siɛnyoug u. Niɛnbiid n bo te k i mɔg l tɔgbiiug, k l bɔnd g kuand’i tudm n ninŋ. 23 L tie k yin ji pand i pala yen i maalm kul i canyiin, 24 g guan g te nipaanm, gii naan yen Yendu nba tag’i, g mamɔni ń te k i binbem ń gii tuag mɔnkund yen ŋand sɔnu. 25 L po n te k l bual k i kul ń ŋaa faaɔg. Sua kul ń gii maad u lua mɔni, g dugn t kul taan g tie gbannanyend i. 26 I pal gii bie, yin suol i kua g daa tie biid. Daa ŋaa man yendu ń baa k i biɛ daa be yen l mutuol. 27 Daa luod man sɔnu g te Sitaan. 28 Yua nba tu jaan ń ji daa jaan. Wan tien mɔndl g la tuonn gii suun yen papienn g laad wan bua yal nba, g biɛ tod tali. 29 Mabiid ń daa nya i mɔb n ninŋ. I maad man mamɔnm kua, yal nba bu fid g tod lieb k b pala ń ŋanm g paag, g yab nba cenŋ yin maad yal nba ń fid g do nyuad i maam po. 30 Daa ŋaa man g Yendu Foŋanm pal ń biil. G dugn Foŋanm n tie banm nba g Yendu tien i po, k l ŋɔnŋ g daal baad k u bu nyan’i bonbiil n ninŋ canyiin. 31 Buon man i siign ninŋ pabɔnn, pabienn, mutuol, tintandi, sugd yen yal l tie tonu kul. 32 I tie man i lieb ŋanm, gii jie’b ninbaaɔg. I di man sugl i lieb po nyan Yendu ń mɔ n yaan dii sugl i po g dugn Kristo po nyan.
