Efes Kristo-yab 2

1Siɛnyoug Yendu bo g be yen’i, g dugn i tudm yen i tuonbiid po. 2I bo suun yin bua yal i, nyan ŋanduna ne niib nyan, g ŋua polu po cicilbiɛdi canbaa. L cicilg n be mɔlane niib nba g cɔln Yendu n ninŋ, g suun tuonn. 3T kul, t mɔ bo tie nyan banm nyan i, g suun lan tol’ti k tin sun yal nba. T gbannand yen t cicili n bua yal nba, t bo suun lann i. Tin bo be yaa binbem nyan, t bo g mɔg ciɛlu, Yendu mutuol bo tan bu lag t po i, nyan lan bu lag lieb nba tenn po nand nyan. 4Ama Yendu n jie’ti ninbaaɔg, g biɛ ŋanm g buad’ti po i, 5k u te k t guan g fo g dugn Kristo po, k t biid yen bo te k t kpe o. Yendu ŋalbalg po i, k i la fielu. 6Tin be yen Yiesu Kristo po n te k u taan g yied’ti k tin di bal yen’o polu po diem n ninŋ. 7U tien nnyan g niib kul ń bann g youg nba baad n ninŋ, u bu ŋɔn k u bua’ti yaa buam nba g mɔg po g dugn Yiesu Kristo po. 8K l maa Yendu ŋalbalg po yen i dindann po i, k i la fielu. L g tie i paalu po kaa, l tie Yendu paab i. 9L g tie i tuona nyuad kaa. Lann sua ń daa pua jipaad l po. 10G dugn wano Yendu n te k t guan g te nipaanm Yiesu Kristo n ninŋ, k t binbem n ninŋ tin gii suun tuonŋana nba k u bo tuod g bobn t po. 11I tiɛn man k ban mal’i k i g tie Suif‑nba, g biɛ g kɔnd b kɔnd nyan, siɛnyoug Suif‑nba bo yi’i buolfanu yab i, g yi b kua Yendu niib g dugn nifosaal nuu suun b gbannand po g kɔnd’b. 12L youg, i bo fag yen Kristo. I bo tie saanm i g g mɔg yiɛl Israyɛl buolu yab siign ninŋ. Yendu n bo puon puoni g suol dɔnnu nba yen u buolu mɔ, i biɛ bo g be l n ninŋ. I bo g mɔg siɛl yaa dindann, i biɛ bo g mɔg Yendu mɔ ŋanduna n ninŋ. 13Ama mɔlane yin taan yen Yiesu Kristo nyan, yinm nba bo be fagm kul ji nagn, k l maa Kristo wul u sɔm g yid salg i po. 14Wano mɔno n te g Suif‑nba yen yab g tie Suif‑nba taan g tie buolyenu kukua g manu baal t po. Wan cab u gbannand nyan, u mud guonn nba bo paad’b g te k b tie ninnanda n nyan. 15U te k ban bo diɛn Suif‑nba yiko kadaaɔg nba yen kɔa nba be l n ninŋ kul ji g tie siɛl. U tien nnyan k l buoli yinle kul ń taan g te buolpaanu i u ninŋ, buolyenu kukua, g sua kul ń gii be u yam n. 16U kpe dapunpɔnn po i g taan banm banle gbannanyend n ninŋ, g te k b guan g manŋ yen Yendu, k u buon nanŋ nba bo be b siign ninŋ. 17Kristo baal k wan muand’i laabaal nba bu te i yam ń duan i ; yinm buolfanu yab nba bo fag yen Yendu yen Suif‑nba nba bo kɔb yen Yendu kul. 18Kristo po i k tinm Suif‑nba yen yab g tie Suif‑nba kul kon bu fid g tɔgn sɔnyenu g nagn t Baa nunŋ n ninŋ yen Foŋanm todl. 19I ji g tie saanm kaa, i biɛ ji g tie dingbanfann yab mɔ kaa, yinm yen Yendu niib kul ji tie doyenu n yab i, i ji tie Yendu cugl n bid i. 20I mɔ ji tie ŋaag i g sie, g Yiesu sundi yen Yendu sogni‑nba tie l fiɛgl, g Yiesu Kristo mɔno tie l ŋaag fiɛgl tanjal. 21Wano n te g ŋaag sie g paa, k b maa k l kped g do, g bu te ŋaag nba baa tie Yonmdaan kukua yal. 22Yinm yen wano n taan po i k b tug i mɔ, k i kul ji taan g te ŋaag nba tie Yendu binbebuol, k u Foŋanm be l n ninŋ.

will be added

X\