Efes Kristo-yab 1

1Yendu yanbuam po i k min Pɔl tie Yiesu Kristo sundu. Min n da kadaaɔg ne, g fuond Yendu n lugd u niib nba k b be Efɛs g dug Yiesu Kristo po yen b pal kul. 2T Baa Yendu yen t Yonmdaan Yiesu Kristo ń yad yedŋanm i po, g te k i yam ń gii dua. 3Yendu sann ń do, wano nba tie t Yonmdaan Yiesu Kristo Yendu, g biɛ tie u Baa. U pii’ti Foŋanm paab nba be polu po diem n kul, g dugn tin taan g be yen Kristo po. 4U bo tuod g lugd’ti g sua k u daa g tag ŋanduna, k tin taan gii be yen Kristo gii ŋan canyiin, g daa mɔg siɛl yaa biid u nunŋ n ninŋ. U buam n ninŋ, 5u bo tuod g juab’ti k tin te u bid Yiesu Kristo po. U yam n bo suol k u bua yal nba n nyan. 6Lann, t gii dond man Yendu k l maa u pii’ti paab nba mɔg yudand, g dugn u Bibuadg po. 7Yiesu n wul u sɔm g nyan’ti bonbiil n ninŋ, g piin t biid. Nnyan i g Yendu ŋɔn’ti k u ŋalbalg g mɔg po. 8L ŋalbalg po i k u tie’ti yanfuom yen ninfanm bonn kul n ninŋ. 9Yendu n bo tuod g bobn yal nba yen u yanbuam k u bu te Kristo n tien, l youg tan gii pund nyan, u ji ŋɔn’ti l ŋasiil n nyan. Lann n tie k wan taan yal nba be polu po yen yal nba be tinŋ n ninŋ kul, g Kristo ń gii tie l kul yudaan. 11Kristo n ninŋ i, g Yendu nba suun bonn kul, nyan u yam n bua nand nyan, bo tuod g lugd’ti, k tin mɔ ń gii tie u yab. 12K tinm nba n bo cind g daan Kristo ninŋ ń gii dond Yendu g dugn u yudand po. 13I mɔ n yaan bo cenŋ mamɔni maam, lann n tie Laabamann nba tien’i fielu, i bo tuo g gaal wano Kristo i, g Yendu tien u banm i po. L banm tie, k u tie’i wan bo puon Foŋanm nba. 14Tin gaal Foŋanm nba ne, lann n ŋɔn k t bu di faal nba g Yendu bo bil g guun u niib nba k u tan bu nyan’m bonbiil n ninŋ canyiin. Lann, t gii dond man Yendu yudand. 15L po n te min yaan gbad k i mɔg dindann nba Yonmdaan Yiesu n ninŋ, yen yin bua Kristo‑yab kul nand, 16k n tiend Yendu balg youg kul i po. N tiɛn i po n jaandi n ninŋ, 17g miɛd t Yonmdaan Yiesu Kristo Yendu, t Baa nba tie yudanddaan, k wan te’i Foŋanm, k l Foŋanm ń te’i yanfuom, g fand’i, g ŋɔn’i Yendu, k yin ŋanm g bann’o. 18N biɛ miɛd’o k wan fand’i, k yin fid g bann wan yiin’i dindann nba po, g bann g faal nba k i bu di yen u niib ŋan g biɛ yab bonciɛnn. 19I bu bann u paaciɛnu nba g mɔg lua, k u tien tinm nba dug u po. L paaciɛnu i, 20k u bo ŋɔn Kristo n ninŋ, yaa youg nba k u bo yied’o kpienm siign ninŋ, g kaan’o u jendu yudand kinkaanu po, polu po. 21L buol i k wano Kristo ji be yal l be polu po kul liig, yikodanm liig, paaludanm liig, yen yab nba mɔg yudand kul liig. U sann n lii sana nba g nil bu fid g taa kul. L g tie ŋanduna ne ninŋ kua kaa, lann n be liig ŋanduna nba baad ninŋ mɔ. 22Yendu te g bonn kul gbaan dunn Kristo nintual n ninŋ, g tug’o g tien’o Kristo Tintaanu kul yudaan. 23L Tintaanu n tie Kristo gbannand. Lann n taan yen’o k u tie u munn kul, wano nba be bonn kul n ninŋ, kaannaa kul.

will be added

X\