Kolɔs Kristo-yab 4

1Yonmdanm, ŋanm man gii diɛ i yonmi k l tuag yen mɔnkund sɔnu, k l maa i ban k i mɔ mɔg Yonmdaan polu po. 2I jaand man g daa ŋaa, gii ceg man i kua po i jaandi n ninŋ, gii tiend Yendu balg. 3I jaand man t mɔ yaa po g Yendu ń cab’ti sɔnu k t muand u Laabamann g dɔgd g ŋɔn yal tie ŋasiil Kristo po. L Laabamann muandu po n te k n be dansalg. 4I jaand man n po k n fid g ŋanm g maad k n maam ń gii yien nyan min bo bu maad nand nyan. 5I be man yen yab nba g tie Kristo‑yab yen yanfuom, g yaa youg nba k i bu fid g tien bonŋann, yin mɔnd g tien. 6I maam ń tu gii man youg kul, g mɔg niɛnŋ niib po, k i fid g bann yin tu bu jiin yua kul nand. 7Tisiik bu ŋɔn’i n laabaal kul. U tie n ninja i g biɛ tie n dɔnnmɔn, g suun Yendu tuonn yen u pal kul. Min yen wano n taan g suun Yonmdaan tuonn. 8Yal nba po mand g te k n suun’o i buol tie k wan ŋɔn’i tin be nand i, g biɛ paan i pala. 9Wano yen i doug n big Onesiim n yeg. Wano Onesiim ŋua Yendu yen u pal kul, u mɔ tie n ninja i g biɛ tie n dɔnnmɔn. Banm banle kul bu ŋɔn’i bona nba kul tie ne buol ne. 10Min yen Aristark n be dansalg ne, u fuond’i. G Barnabas naataanu Mark mɔ fuond’i. Wano i k n daan ŋɔn ŋɔn’i bona u po, k u gii baal yin ŋanm g gaal’o nyan. 11Yiesu, yua k b biɛ yi’ug Sustus nyan mɔ fuond’i. Suif‑nba nba te Kristo‑yab kul, banm bantaa kua n taan g suun yen’n Yendu diem po g pugd’n papaal. 12I naataanu Epafras mɔ fuond’i. U tie Yiesu Kristo tuonsunn i. U kɔn jad bonciɛnn i po jaandi n ninŋ k yin fid gii sie k l paa, g tie danm nba k i dindann cie, g bobn g gbenn g bu tien Yendu n bua yal nba. 13N tie sieda k u suun tuonn bonciɛnn i po yen Lawɔdise Kristo‑yab po yen Yierapolis Kristo‑yab po. 14T dɔnnmɔn Luk nba tie dogda nyan, wano yen Demas mɔ fuond’i. 15Fuond man Lawɔdise Kristo‑yab yen Ninfa yen Kristo‑yab nba taand u ŋaag n ninŋ. 16I gii lii kadaaɔg ne, yin mɔnd g Lawɔdise Kristo‑yab ń mɔ ń lii l kadaaɔg, k i mɔ ń lii kadaaɔg nba bu nya Lawɔdise g baal i buol nyan. 17Maad man Arsiip k wan ŋanm g nyuand tuonn nba ninŋ g Yonmdaan kubn’o nyan, g sun lan bual nand. 18Min Pɔl mɔno n diɛn yen n nuu min fuond’i fuondi nba ne. Daa sunn man k n be dansalg kaa. Yendu ń yad u yedŋanm i po.

will be added

X\