1 Nyan yin taan g yied yen Kristo nyan, ji gii kpaan man bona nba be polu po, Kristo n kal naan buol nba Yendu jendu nyan. 2 I kpaan man k yin gii mɔg yal nba be polu po, g nyaan, daa jaad man i kua tinŋ n ne bona po. 3 G dugn i bo kpe o, i miɛl ji wuo Kristo n ninŋ i Yendu buol. 4 Kristo n tie i miɛl. Wan tan bu dɔgd g ŋɔn u kua yaa youg nba, i mɔ tan bu taan g dɔgd yen’o i u yudand n ninŋ. 5 Lann yin ŋaa man ŋanduna ne niɛnŋ nba suun tuonn i ninŋ nyan. Lann n tie yal be i ninŋ g te k i suun cuncontuona yen jɔgntuona, g diɛ i gbannand g suun fai tuona, g mɔg niɛnŋ nba g ŋan, g mɔg kunkuam, kunkuam mɔ yen tie padl i. 6 L yaa tuonbiid kul ne n baad yen Yendu mutuol danm nba yie k b kan cɔlm’o nyan po. 7 Siɛnyoug, yin mɔ n bo tug i yul g kun yen biid nyan, i mɔ bo suun nnyan i. 8 Ama mɔlane nuan, ji feg man g lu bona nba ne kul: mutuol yen jad yen tonu. Daa ŋaa man g sugd lann i kaa siɛl yaa majɔgnn ń nya i mɔb n. 9 Yin ji daa fa man i lieb faaɔg, k l maa i ŋaa i tɔgbiiug yen l bontitied 10 g Yendu ji tie’i binbepaanm. L binbepaanm i k wano Yendu nba tie t tagtua nyan pandl youg kul k l naan yen wano mɔno yaa binbem k wan te k yin l bann’o yen mɔni. 11 L yaa po, paadu ji g be yab tie Suif‑nba yen yab g tie Suif‑nba siign, yab k b kɔnd’b Suif‑nba kɔnd yen yab k b g kɔnd’b siign. Paadu ji g be nisaanm yen muaɔg n yab siign, yonmi yen yab yal b kua siign. Ama Kristo n tie bonn kul g biɛ be yen sua kul. 12 Nyan Yendu n bua’i g lugd’i k i te u buolu nyan, lann ji gii jie man i lieb ninbaaɔg, g tie’b ŋanm, g jiind i kua, g ŋɔnŋ’b i manu, g mɔg sugl yen’m. 13 I mɔg man sugl yen i lieb. Sua gii biil’i yin di sugl u po nyan Yonmdaan n dii sugl i po nand nyan. 14 I gii tien l kul ne, yal pugd n tie k yin ŋanm gii bua i lieb yen mɔni, k l maa lann n bu te yin ŋanm gii taa mɔb. 15 Yanduanm nba nya Kristo buol ń gii be i pala n ninŋ g ŋmagd’i. Yendu yiin’i g te k i taan g te gbannanyend kua k i gii mɔg l yaa yanduanm i. I tiend man Yendu balg l po. 16 Kristo maam tie ŋalman nba yab i. Ŋaa man k l maam ń gii be i pala n ninŋ k yin fid gii tund i lieb, gii tien’m cegli yen yanfuom. I yiin man biɛyani yen Yendu dondl yani yen Foŋanm n ŋɔn’i yani nba, gii tiend Yendu balg yen i pal kul. 17 Yin l suun yal nba kul, l gii tie i maam n ii, lann i kaa i tuona n ninŋ ii, yin sun Yonmdaan Yiesu sann po gii tiend t Baa Yendu balg g dugn u po. 18 Yinm puob, i jiind man i kua i salb buol nyan lan bual g yab cɔln Yonmdaan ń gii tiend nand nyan. 19 Yinm puodanm, i bua man i puob g daa mɔg tonu yen’m. 20 Yinm bid, i cɔln man i danm bonn kul n ninŋ, k l maa lann n man Yonmdaan po. 21 Yinm bibaa‑nba, i daa donŋ man i bid mutuol k lan tan daa te k b pala ń wad. 22 Yinm yonmi, i cɔln man i yonmdanm bonn kul n ninŋ. Yin daa cɔln’m youg nba k b nyuan’i kua kaa. Yab nba tu bua ban manŋ niib pala n tu tie nnyan. Ama yin gii cɔln’m youg kul yen i pal kul, g dugn yin cɔln Yonmdaan nyan po. 23 Yin l suun yal nba kul, yin sun yen i pal kul nyan i suun Yonmdaan po nyan, k lan daa tie k i suun niib po kaa. 24 I tiɛn man k i tan bu gaal Yendu n bo puon k u bu te u buolu bonŋana nba. Yua tie Yonmdaan yen mɔni tie Kristo i, i suun u yaa po i. 25 Yua nba tie bonbiil, b tan bu dad u tubl g dugn bonbiil nba k u tien nyan po, k l maa Yendu yaa buol lugdm g be.
