1 N bua k i bann k n l gbaa yen ninmɔnn i i po yen Lawɔdise Kristo‑yab po yen yaa danm nba kul g ban’n po. 2 N tie nnyan g bua k b pala ń paag i, g buam ń te k ban gii taa mɔb, k b pala ń gii paa k b mɔg ninfanm canyiin. K l ninfanm bu fid g te k ban bann Yendu ŋasiil, lann n tie Kristo. 3 Yanfuom yen banm kul tie ŋalman i g wuo wano Kristo n ninŋ. 4 N maad’i l bona kul ne k yin daa ŋaa g baa sua ń manŋ mɔb g bɔnd’i nii. 5 Baa n gii fag yen’i, n yen mali i po nuan. N pal man yen min la g sua kul sie u sinsienu n, k i biɛ dug Kristo po yen i pal kul. 6 Yin bo tuo g Yiesu Kristo te i Yonmdaan nyan, i be yen’o man i binbem n ninŋ kul. 7 Ŋanm man gii dug u po, gii diɛ k l paa g saa liig. Ŋanm man g kub i dindann nyan ban bo tund’i nand nba nyan, gii tiend Yendu balg youg kul. 8 Suol man i kua g daa ŋaa g sua ń tug nifosaal yanfuom g nyan maalm nba g tuag sɔnu g diɛn’i diɛɔg k i baa l n. L yaa kul ne tie faaɔg u, l nya niib danm bogda buol yen ŋanduna ne paaludanm buol i, l g nya Kristo buol kaa. 9 K l maa Kristo gbannand n ninŋ i g Yendu be u munn kul. 10 Yin taan g be yen Kristo i k i mɔg bonn kul, wano nba tie yikodanm yen paaludanm kul Yudaan. 11 Yin taan g be yen’o po n te k b kɔnd’i, ama l g tie nyan nifosaal n tu tug u nuu g suun u lua gbannand po g kɔnd’o nand nyan kaa, l kɔnd tie Kristo kɔnd i, g nyanŋ yal nba be nil n ninŋ g te k u tie biid. 12 K l maa ban bo wul’i nyum yaa youg, b bo taan g pii yinm yen Kristo i, k i biɛ guan g yied yen’o l nyunwulu n ninŋ, g dugn i bo dug Yendu paalu po i, paalu nba bo yied Kristo kpienm siign ninŋ nyan. 13 Youg nba pend, i bo tien biid g biɛ g kɔnd. L po n bo te k i tie nyan yab nba kpe nyan. Ama mɔlane nuan, Yendu guan g yied yinm yen Kristo o. U pii’ti t biid kul sugl o. 14 Kadaaɔg nba bo ŋɔnŋ k t tie biiddanm g biɛ jalg’ti nyan, u bo gbenn l yaa maam yaa youg nba k b bo kpaa Kristo dapunpɔnn po o. 15 L dapunpɔnn po i k u bo biil Sitaan yen cicilbiɛdi paalu kul, g fil’b niib kul nunŋ n g ŋɔn k u paa’b. 16 Lann yin daa ŋaa g sua ń jalg’i yin di yal nba po yen yin nyu yal nba po. Biɛ daa ŋaa man g sua ń jalg’i jaanm dana po, ŋmaapaanŋ dana po yen fuodu dana po. 17 L yaa bona kul ne tie yal nba bo tan bu baal nyan yaa jinjunŋ u, ama yal nba be g tie mɔni n tie Kristo. 18 Daa ŋaa man g yab nba k b pala man k ban gii jiind b kua g dond malɛg‑nba nyan ń gii jalg’i. B donŋ b kua g dugn ban laad bona nba b damiid n ninŋ nyan po i. B diɛ nifosaal maalm i g bund g donŋ b kua. 19 B yie k b kan tugn yen Kristo, wano nba tie yul. B sunn g yul mɔ n yen tien gbannand yal l tie bonmɔnn kul. Yul n te g tugda yen jiina kul taan g ŋanm g diɛ yen liel. G Yendu mɔ te k l gbannand kpaad g pugd. 20 I gii taan g kpe yen Kristo k u fiel’i g nyan’i yal nba be ŋanduna n ninŋ g mɔg paalu kul nuu n ninŋ, laabaal k i binbem n ninŋ k i biɛ tuo g cɔln l ŋanduna n ninŋ kɔa nyan i mɔ biɛ daa l tie l ninŋ yab nyan i ? Ji daa cɔln man kɔa nba tua: 21 « Daa di ne ! Daa lenm ne ! Daa ŋud ne ! » 22 L kɔa yen l tunda kul tie nifosaal maalm i. K l maa bondikal yen bonnyukal nuan be g niib ń di g nyu i, l puol po l ji g mɔg buam. 23 Yen mɔni, nil ń jiin u kua g dond malɛg‑nba g cagn u gbannand, l yaa kul tie nyan yanfobonn nyan i, ama l yaa tunda kul ne yen tie fam i, l be k lan tod nil k wan gii tie u gbannand n bua yal nba i.
